ဘၣ်တနံၤ, ဖဲမုၢ်ဃ့ၢ်လီၤအကတီၢ်, ယၤဒီးပဟံၣ်ကပၤ ပှၤဆူၣ်ဒၣ် (Sudanese) အဟံၣ်ဖိဃီဖိတဖၣ်န့ၣ် ပတ့ခဲၣ် ပှၤလဲၤဟးလ့ၢ်လိၤတၢ်အကျဲ လၢဟီၣ်ခိၣ်ဝါတဖၣ်လၢအအိၣ်ဒီးအလွဲၢ်အကလုာ်ကလုာ်န့ၣ်လီၤ. လၢအဝဲသ့ၣ်အဟံၣ်အကပၤ, ပှၤအိၣ်ဝဲတဖု ဘူၣ်ထူဘါယွၤ, ဒီးပနၢ်ဟူ အဝဲသ့ၣ်သးဝံၣ်တၢ်န့ၣ်လီၤ. မိၢ်သးစၢ်လၢ ကတိၤတၢ်ဒီးယၤတဂၤန့ၣ် အဲၣ်ဒိးသ့ၣ်ညါဝဲ တၢ်ဂ့ၢ်တၢ်ကျိၤအဃိ, အဝဲဒီးယၤ ပလဲၤခိးကနၣ် ပှၤသးဝံၣ်တၢ်န့ၣ်လီၤ. ဒ်သိးပကဘူၣ်သကိးဘါသကိးတၢ်အဂီၢ် အဝဲသ့ၣ်ကွဲမုာ်ပှၤန့ၣ်လီၤ. ကမါလၢပှၤမၤပှဲၤပာ်ထံအကပၤန့ၣ် လၢတၢ်ဒိးဘျၢထံအဂီၢ်, ပှၤသးစၢ်တဂၤ အိၣ်ဂဲၤဆၢထၢၣ်ဝဲဒၣ်, ဒီးစံးဝဲဒၣ်လၢ ဒိးန့ၢ်တၢ်ပျၢ်တၢ်ဒဲးဘး, ဒီးဟ့ၣ်လီၤအးလီၤအသး, ဒ်သိးကပိာ်ကစၢ်ယ့ၣ်ရှူးအခံအဂီၢ်န့ၣ်လီၤ.
တၢ်အံၤမ့ၢ်ခွဲးဂ့ၤယာ်ဘၣ်လီၤဆီလၢပဂီၢ်, မ့ၢ်လၢပနၢ်ဟူဘၣ် ပှၤအုၣ်အသး, ဘၣ်ဃးဒီး တၢ်အုၣ်က့ၤခီၣ်က့ၤအဂ့ၢ်, လၢပဟံၣ်ကပၤအဃိန့ၣ်လီၤ. ပှၤတဖုအံၤ မ့ၢ်ဝဲဒၣ် ကစၢ်ခရံာ် အတၢ်အိၣ်ဖှိၣ် လၢပခိၣ်ပဃၢၤန့ၣ်လီၤ.
ကစၢ်ယ့ၣ်ရှူး တ့သူၣ်ထီၣ် အတၢ်အိၣ်ဖှိၣ် လၢဟီၣ်ခိၣ်ဒီဘ့ၣ်န့ၣ်လီၤ. တချုးကစၢ်ယ့ၣ်ရှူး က့ၤထီၣ်ဆူမူခိၣ်ဒံးဘၣ်န့ၣ် စံးဘၣ်တဲဘၣ် အပျဲၢ်အဘီၣ်တဖၣ်လၢ ကဆှၢလီၤ သးစီဆှံ ဒ်သိးကအိၣ်ဆိးလၢအပျဲၢ်အဘီၣ်တဖၣ် အသးကံၢ်ပူၤ, ဒီးအပျဲၢ်အဘီၣ်တဖၣ် ကကဲထီၣ် ပှၤအုၣ်အသး, “ပၢၢ်လၢဟီၣ်ခိၣ်အကတၢၢ်” (တ ၁:၈) န့ၣ်လီၤ. ကစၢ်ယ့ၣ်ရှူး ကတ့သူၣ်ထီၣ် အတၢ်အိၣ်ဖှိၣ်, ခီဖျိလၢသးစီဆှံ အတၢ်ဟ့ၣ်စိဟ့ၣ်ကမီၤ, ဒီးအပျဲၢ်အဘီၣ်တဖၣ် အတၢ်စံၣ်တဲၤတဲလီၤ, သိၣ်လိနဲၣ်လိတၢ်အပူၤန့ၣ်လီၤ. ဒီး “ပှၤတုၤလၢတၢ်အုၣ်က့ၤခီၣ်က့ၤအီၤတဖၣ်န့ၣ် ယွၤပာ်ဖှိၣ်က့ၤဝဲလၢတၢ်အိၣ်ဖှိၣ်အပူၤသ့သ့တနံၤ” (၂:၄၇) န့ၣ်လီၤ.
လၢပခိၣ်ပဃၢၤန့ၣ် ပမ့ၢ်အိၣ်မူအိၣ်ဂဲၤ ဒ်ပတၢ်စူၢ်တၢ်နာ်အသိး, ဒီးပမ့ၢ်နီၤဟ့ၣ်ခီ တၢ်လၢကစၢ်ယ့ၣ်ရှူး မၤတ့ၢ်လံလၢပဂီၢ်တဖၣ်ဆူ ပှၤဂုၤပှၤဂၤန့ၣ်ဒီး, ကမ့ၢ်တၢ်တ့သူၣ်ထီၣ်သကိး ကစၢ်ခရံာ် အတၢ်အိၣ်ဖှိၣ်န့ၣ်လီၤ. ဒ်သိးကစၢ်ယွၤ ကပျၢ်ပတၢ်ဒဲးဘး, ဒီးပကဒိးန့ၢ်တၢ်မူအထူအယိာ်အဂီၢ်, ကစၢ်ယ့ၣ်ရှူး စူးကွံာ်ညိကွံာ်အသးသမူ, ဒီးဂဲၤဆၢထၢၣ်သမူထီၣ်က့ၤဝဲဒၣ်န့ၣ်လီၤ. ခ့ခါအဆၢကတီၢ်, လၢအတၢ်အိၣ်ဖှိၣ်အပူၤ, ဒ်သိးပကမၤလိန့ၢ် တၢ်မၤဂ့ၤမၤစၢၤပှၤဂုၤပှၤဂၤစံးတၢ်န့ၣ် ကမ့ၢ်တၢ်ဒ်လဲၣ်န့ၣ်, ကစၢ်ယ့ၣ်ရှူး ကမၤစၢၤပှၤန့ၣ်လီၤ.
