ဖဲမုၢ်လ့ၤဧိၤ ဟါလီၤခီအကတီၢ်, တၢ်လၢအညီနုာ်မၤန့ၣ် ဘရဲဒၣ်ဒီးအဲးဒံၣ် ကစးထီၣ်မၤဝဲဒၣ်အဂီၢ်, နုာ်လီၤဆူသိလ့ၣ်ပူၤဝံၤ,အဲၤဒံၣ် သံကွၢ်ဝဲအမါလၢ “မ့ၢ်နအဲၣ်ဒိးအီၣ်ဟါတၢ်အီၣ်တၢ်အီဖဲလဲၣ်” န့ၣ်ဒီး, ဘရဲဒၣ် စံးဆၢဝဲလၢ “ဖဲတၢ်လီၢ်တတီၤဂ့ၤတတီၤဂ့ၤ တၢ်ဂ့ၢ်ကီတအိၣ်ဘၣ်” န့ၣ်လီၤ. အပူၤကွံာ်န့ၣ် အဲးဒံၣ် လဲၤအီၣ်ဘၣ်တၢ်လီၢ်အိၣ်ဝဲတတီၤအဃိ, သံကွၢ်ကဒိး “ဂ့ၤလံ, ပမ့ၢ်လဲၤအီၣ်ဖဲ ဝ့မ့(လ) (The Windmill) ကျးမီၣ်, နဆိကမိၣ်ဒ်လဲၣ်” န့ၣ်လီၤ. ဘရဲဒၣ် အသးဒိၣ်ထီၣ်သတူၢ်ကလာ်, ဒီးစံးဝဲဒၣ်လၢ “ပတလဲၤဖဲန့ၣ်ဘၣ်. ပကလဲၤအီၣ်ကျးတဖျၢၣ်ဂ့ၤ,တဖျၢၣ်ဂ့ၤန့ၣ် မ့တမ့ၢ်ဖဲန့ၣ်ဝံၤလီၤ.” အဲးဒံၣ် သါသဖှိထီၣ်, ဒီးစံးဘၣ်အမါလၢ “နမ့ၢ်စံးဒ်န့ၣ်ဒီး, နအဲၣ်ဒိးလဲၤဖဲလဲၣ်” န့ၣ်လီၤ. ဘရဲဒၣ် စံးကဒီးဝဲလၢ “ဖဲတၢ်လီၢ်တတီၤဂ့ၤတတီၤဂ့ၤ တၢ်ဂ့ၢ်ကီတအိၣ်ဘၣ်” န့ၣ်လီၤ.

လီၤဂာ်ဒီးတၢ်ဂီၤမူလၢ အမၤလီၤနံၤလီၤအ့ပှၤအသိး, မ့ၢ်လၢပသ့ၣ်ညါ တၢ်မၤအသး ဒ်သိးအံၤ, မ့ၢ်တၢ်အကတီၢ်ဖိလၢ အမၤတံာ်တာ်ပသးထဲလဲၣ်န့ၣ် ပမ့ၢ်ကွၢ်စိလၢတၢ်အယံၤန့ၣ် ကဲထီၣ်တၢ်လီၤနံၤလၢပဂီၢ်န့ၣ်လီၤ.

ဘၣ်တဘျီဘျီ, လၢပတၢ်အိၣ်မူ ပဃ့ထုကဖၣ်တၢ်အပူၤစ့ၢ်ကီး, တၢ်မၤအသးသ့ဝဲဒၣ်ဒ်သိးအံၤန့ၣ်လီၤ. ပအိၣ်ဒီးတၢ်သးဒ့ဒီအါမးန့ၣ်လီၤ. တၢ်လၢတဒံးသိးလိာ်အသးဒီးပှၤန့ၣ် ဝံဒၤနံးယ့လး အဆၢဒိၣ် ၉ ပာ်ဖျါဝဲဒၣ် တၢ်လၢ စီၤဒၤနံးယ့လး အဲၣ်ဒိးဝဲန့ၣ် ဃ့ထုကဖၣ်ဝဲလၢတၢ်သးဒူန့ၣ်လီၤ. အဆိကတၢၢ်, စီၤဒၤနံးယ့လး အၢၣ်လီၤဝဲ အပှၤဂီၢ်မုၢ်အတၢ်ဒဲးဘး, “ပမၤကမၣ်လံတၢ်, ဒီးပမၤလံတၢ်ဒဲးဘး, ဒီးပမၤအၢလံ” (:၅), ဝံၤန့ၣ်ဒီး, “ခဲကနံၣ်အံၤ, ပကစၢ်ဧၢ, ကနၣ်နခ့နပှၤအတၢ်ထုကဖၣ်, ဒီးအတၢ်ဃ့ကညး” (:၁၇) န့ၣ်လီၤ. ဒီးအဆၢဖိ ၁၉ န့ၣ် စံးဝဲဒၣ် “ကစၢ်ဧၢ, ကနၣ်တၢ်တက့ၢ်, ကစၢ်ဧၢ, ပျၢ်တၢ်တက့ၢ်, ကစၢ်ဧၢ, ကနၣ်တၢ်ဒီးမၤတၢ်တက့ၢ်” (:၁၉) န့ၣ်လီၤ. လၢအဂီၢ်, ယွၤကဘၣ်မၤဝဲသပှၢ်တၢၢ်န့ၣ်, တၢ်ဂ့ၢ်လီၤဆီတအိၣ်နီတမံၤဘၣ်. မ့ၢ်လၢ စီၤဒၤနံးယ့လး နာ်သန့ၤ ကစၢ်ယွၤ “အဘျုးဒိၣ်အဖှိၣ်အါ” အဃိ (:၁၈) န့ၣ်လီၤ. စီၤဒၤနံးယ့လး အသးကလၢၢ်ဘၣ်ဝဲဒၣ် တၢ်လၢအဲၣ်ဒိးဝဲတဖၣ် လၢတၢ်သဘျ့အပူၤန့ၣ် စိာ်ဆှၢထီၣ်ဝဲဆူ ယွၤအအိၣ်သ့ဝဲဒၣ်န့ၣ်လီၤ.

တချုးလၢ ကစၢ်ယ့ၣ်ရှူး ဘၣ်တၢ်ပျၤထီအီၤလၢထူၣ်စုညါအလိၤ, ဒ်အဃ့ထုကဖၣ်ဝဲဆူ အပၢ်ကစၢ်ယွၤအအိၣ် “ဘၣ်ဆၣ်ဒီး, ဖဲဒၣ်ယသးတမ့ၢ်ဘၣ်, မ့ၢ်ဖဲဒၣ်နသးလီၤ” (မး ၂၆:၃၉) အသိး, ပမ့ၢ်ဃ့ထုကဖၣ်တၢ်န့ၣ် ဘၣ်ဝဲဒၣ်ထီဘိန့ၣ်လီၤ. ဘၣ်ဆၣ်, ခါဆူညါအတၢ်ဂ့ၤတၢ်ဝါအဂီၢ်, အကတီၢ်ကအိၣ်ဝဲစ့ၢ်ကီးလၢ ပကဘၣ်ပာ်ဖျါထီၣ် တၢ်လၢပလိၣ်ဘၣ်တဖၣ် လၢတၢ်သူၣ်ဒူသးဒူအပူၤန့ၣ်လီၤ. လၢတၢ်ပီၢ်ယၢ်လီၤက့ၤသးအပူၤ ပမ့ၢ်ဟဲဆူယွၤ အအိၣ်န့ၣ် ကစၢ်ယွၤ ပာ်လုၢ်ပာ်ပှ့ၤ ပတၢ်သူၣ်ဒူသးဒူန့ၣ်လီၤ. လၢတၢ်န့ၣ်အဃိ, တၢ်အိၣ်လၢနသးကံၢ်ပူၤန့ၣ် ဃ့ထုကဖၣ်နဲလၢ တၢ်သူၣ်ဒူသးဒူ, ဒီးနာ်သန့ၤ ကစၢ်ယွၤလၢအဘျုးဒိၣ်အဖှိၣ်အါတဂၤန့ၣ်တက့ၢ်.