အဝၤ ကလံၤကျီအီၤဝံၤ, စါ(န) (Sun) တဂၤ အတၢ်အိၣ်မူ ဆီတလဲအသးတကီၢ်ခါန့ၣ်လီၤ. တနံၤဘၣ်တနံၤန့ၣ် စါ(န) ဘၣ်မၤစၢၤဝဲဒၣ် အဝၤအတၢ်ဂ့ၢ်တၢ်ကျိၤတဖၣ်, ဒီးဘၣ်ကျဲးစဲးဘှါဆှဲ အဝၤအသးအတၢ်ဂ့ၢ်ကီတဖၣ်န့ၣ်လီၤ. လၢတၢ်သူၣ်တီသးလိၤအပူၤန့ၣ် ကွၢ်ထွဲကဟုကယာ်အဝၤလၢ တၢ်ဆၢကတီၢ် ၁၇ နံၣ်အတီၢ်ပူၤန့ၣ်လီၤ. ဘၣ်ဆၣ်, အဝၤလီၤဃံၤ, ဒီးတၢ်အိၣ်ဆူၣ်အိၣ်ချ့နးဒိၣ်ထီၣ်အဃိ, တၢ်ကွၢ်ထွဲကဟုကယာ်အဝၤ အတၢ်မၤန့ၣ် ကဲထီၣ်တၢ်ဝံဃၢနးနးကျံးကျံးလၢအဂီၢ်, ဒီးတူၢ်ဘၣ်ခီၣ်ဘၣ်ဝဲ နီၢ်သးအတၢ်ဆီၣ်သနံးန့ၣ်လီၤ. အဝဲစံးဝဲဒၣ် “ယသးတူၢ်ဘၣ်ယဲ ဒ်ယတၢ်စူၢ်တၢ်နာ် လီၤမၢ်ကွံာ်ယဲ, ဒီးယတထံၣ်ကစၢ်ယွၤလၢၤဘၣ်” န့ၣ်လီၤ.
ဘၣ်ဆၣ်, စါ(န) ကွၢ်ကဒါက့ၤအတၢ်အိၣ်မူ, ဒီးနာ်ဝဲဒၣ်လၢ ကစၢ်ယွၤထံၣ် အတၢ်နးတၢ်ဖှီၣ်န့ၣ်လီၤ. လၢအဝၤအတၢ်ဆါအယံာ်အထၢအဂီၢ်, မ့ၢ်လၢကစၢ်ယွၤ ကတဲာ်ကတီၤန့ၢ်အီၤ ကသံၣ်ကသီတဖၣ်, ဒီးလၢဟံၣ်လၢဃီတၢ်ကွၢ်ထွဲယါဘျါ ပှၤဆူးပှၤဆါ, ဒီးပှၤတဝၢအပှၤမၤစၢၤဟ့ၣ်ကူၣ်တၢ်တဖၣ် ဒ်သိးကမၤစၢၤဝဲဒၣ် စါ(န) လၢတၢ်ရဲၣ်ကျဲၤဘှါဆှဲ နီၢ်သးအတၢ်ဆီၢ်သနံၤ, အတၢ်ဂ့ၢ်ကီ အိၣ်ဟဲကဲထီၣ်အသး, ခီဖျိလၢတၢ်ကွၢ်ထွဲကဟုကယာ်အဝၤအကတီၢ်န့ၣ်လီၤ.
နီၢ်ဟၤကၢ် အဂ့ၢ်န့ၣ် ကစၢ်ယွၤ လီၣ်ဖျါထီၣ်အသး ဒ်ယွၤလၢ အထံၣ်တၢ်တဂၤန့ၣ်လီၤ. ၁ မိၤ အဆၢဒိၣ် ၁၆ န့ၣ် မ့ၢ်လၢအကစၢ်မုၣ် (နီၢ်စၤရဲ) မၤနးမၤဖှီၣ်အီၤအဃိ, အကုၢ်ပိာ်မုၣ် နီၢ်ဟၤကၢ် ဘၣ်ဃ့ၢ်ဟးထီၣ်ကွံာ်လၢအမဲာ်ညါ (:၆), ဒီး “ယွၤအကလူးတဂၤ ထံၣ်န့ၢ်အီၤ လၢထံထီၣ်ပၢၤတပူၤအဃၢၤ လၢပှၢ်လၢ်ကျါ” န့ၣ်လီၤ. ဒီးယွၤအကလူးတဂၤစံးဘၣ်အီၤ, “က့ၤကဒါက့ၤဆူ နကစၢ်မုၣ်အအိၣ်” (:၉), ဒီး မၤလီၤတံၢ်ဝဲဒၣ် နီၢ်ဟၤကၢ်လၢ အတၢ်ဆိၣ်ဂ့ၤတဖၣ်န့ၣ်လီၤ. နီၢ်ဟၤကၢ် တဂၤ လၢအပှၤတဝၢအပူၤန့ၣ် တမ့ၢ်တၢ်နီတမံၤဘၣ်ဒၣ်လဲာ်, ကစၢ်ယွၤ ကွၢ်ထွဲကဟုကယာ်အတၢ်ဂ့ၢ်တၢ်ဝါအဂီၢ်န့ၣ်လီၤ. လၢတၢ်စံးဘျုးစံးဖှိၣ်ယွၤအဂီၢ်, နီၢ်ဟၤကၢ် စံးဝဲဒၣ်လၢ “ပှၤလၢအထံၣ်ယၤတဂၤန့ၣ် မ့ၢ်ထံၣ်တၢ်ကစၢ်” (:၁၃) န့ၣ်လီၤ.
ဖဲပဘၣ်ကီဘၣ်ခဲအကတီၢ်စ့ၢ်ကီး, ကစၢ်ယွၤ ထံၣ်ပှၤန့ၣ်လီၤ. ပပၢ်ကစၢ်ယွၤ လၢအအဲၣ်ပှၤတဂၤန့ၣ် မ့ၢ်ပှၤလၢအသ့ၣ်ညါ ပတၢ်ဂ့ၢ်ကီတဖၣ်အဃိ, ပတမ့ၢ်ထဲ ပကစၢ်ဒၣ်ဝဲတဂၤဧိၤဘၣ်. ကစၢ်ယွၤန့ၣ် မ့ၢ်ပှၤလၢပနာ်န့ၢ်အီၤသ့တဂၤန့ၣ်လီၤ. လၢတၢ်မၤစၢၤအဂီၢ်, ပကိးထီၣ်အီၤသ့ဝဲဒၣ်, ဒီးကစၢ်ယွၤ ကမၤပူၤမၤဖျဲးပှၤန့ၣ်လီၤ.
