ဖဲမုၢ်ယူာ်အနံၤ, လၢတၢ်မၤဟူးဂဲၤနီၢ်ခိကျးန့ၣ် ပှၤကဘၣ်လဲၤဟးတရံးတၢ်အကျိၤဆူ စုထွဲတကပၤန့ၣ်လီၤ. ယမါဒီးပှၤအခီၣ်ထံးတဖုန့ၣ် လဲၤဟးတရံးဝဲဒၣ် လၢစုထွဲတကပၤ န့ၣ်လီၤ. ဘၣ်ဆၣ်, ပိာ်မုၣ်တဂၤ လဲၤဟးတရံးပှၤလဲၤတၢ်အကျိၤ လၢစုစ့ၣ်တကပၤန့ၣ်လီၤ. အတံၤသကိးတနီၤန့ၣ် ပာ်ဖှိၣ်လဲၤဟးတရံးတၢ်ဒီးအီၤ, ဒီးပှၤတဂၤဘၣ်တဂၤ လူၤပိာ်ထွဲ အဝဲသ့ၣ်အခံန့ၣ်လီၤ. တကီၢ်ခါန့ၣ်, တၢ်ဂ့ၢ်ကီအိၣ်ထီၣ်ဝဲလၢ ပှၤလဲၤဟးတၢ်အကျဲအဃိ, ဒ်သိးဒီးတၢ်ကဘၣ်လိာ်ဘၣ်စးက့ၤအဂီၢ်, တၢ်ဆၢကတီၢ်ယံာ်ဝဲဒၣ် တစိၤဖိန့ၣ်လီၤ. ပှၤလဲၤဟးတၢ်ဖိလၢ ကျဲအကမၣ်တဖၣ်န့ၣ် တပညိၣ်ဝဲလၢ ကမၤကီမၤခဲတၢ်ဘၣ်ဆၣ်, အဝဲသ့ၣ်အတၢ်မၤ ဒိၣ်စိလုာ်ဘၢတၢ်အဂ့ၢ်န့ၣ် ဒ်သိးယတဆိကမိၣ်ထီၣ် ယဲဒၣ်န့ၣ် ယအိၣ်တသ့လၢၤဘၣ်န့ၣ်လီၤ. ပှၤလၢအလဲၤကမၣ်ကျဲတဂၤန့ၣ် နဲၣ်ဆှၢဝဲ ပှၤတဂၤဝံၤတဂၤဆူ ကျဲအကမၣ်န့ၣ်လီၤ. လီၤဂာ်ဒီးလံာ်ကတိၤဒိ ၁၃:၂၀ အတၢ်ပာ်ဖျါ “ပှၤလၢအလဲၤတၢ်ဒီးပှၤကူၣ်တၢ်သ့န့ၣ် ကကဲထီၣ်ပှၤကူၣ်တၢ်သ့လီၤ. မ့မ့ၢ်ပှၤဒီတံၤဒီသကိးဒီးပှၤဟးဂီၢ်ဖိန့ၣ် ကတုၤလၢတၢ်ဟးဂီၤ” န့ၣ်လီၤ. တၢ်လူၤပိာ်ထွဲ ပှၤလဲၤတၢ်လၢအကျဲကမၣ်တဂၤအခံန့ၣ် ကတူၤဃီၤဝဲဒၣ်ဆူ တၢ်အိၣ်အသးမၤအသးအကီအခဲ န့ၣ်လီၤ.

ကလၤတံ အဆၢဒိၣ် ၅ န့ၣ် စီၤပီလူး ပာ်ဖျါဝဲလၢ တၢ်လဲၤကမၣ်ကျဲ ဒ်သိးအံၤ တဖၣ်န့ၣ် ဆိကတီၢ် ပသူၣ်ဂ့ၢ်သးကျိၤ အတၢ်လဲၤထီၣ်လဲၤထီအဂ့ၢ်န့ၣ်လီၤ. “သုဃ့ၢ်တ့ၢ်ကစီဒီလီၤ. မ့ၢ်မတၤတြီသု ဒ်သိးသုသုတစူၢ်ဘၣ်တၢ်မ့ၢ်တၢ်တီတဂ့ၤန့ၣ်တဂၤလဲၣ်. တၢ်လွဲအံၤတဟဲဘၣ်လၢ ပှၤလၢအကိးက့ၤသုဘၣ်” (:၇-၈) န့ၣ်လီၤ. ကစၢ်ယွၤ မ့ၢ်ပှၤလၢအသးအိၣ်ဘၣ် တၢ်ဒိကနာ်တဂၤအဃိ, တနဲၣ်ဆှၢပှၤဆူ ကျဲလၢအဟးဖးဒီးတၢ်မ့ၢ်တၢ်တီအကျဲ, ဒီးဆူ “တၢ်သဘံၣ်ဘူၣ်တဖၣ်” (:၁၀) န့ၣ်လီၤ. ဘၣ်ဆၣ်, ပှၤလၢအထီဒါ ကစၢ်ယ့ၣ်ရှူးအတၢ်မ့ၢ်တၢ်တီတဖၣ်န့ၣ် ဒ်သိးကမၤတံာ်တာ် ပသူၣ်ဂ့ၢ်သးကျိၤအတၢ်လဲၤ, ခီဖျိလၢတၢ်မၤလီၤဖးပှၤဒီးကစၢ်ယ့ၣ်ရှူးန့ၣ်လီၤ.

ကစၢ်ယွၤ အဲၣ်ဒိးကဲထီၣ် ပှၤလၢအနဲၣ်ဆှၢပကျဲတဂၤန့ၣ်လီၤ. ဖဲပလဲၤတၢ်ဒီးကစၢ်ယွၤ အကတီၢ်, တမ့ၢ်လၢပကဟးဖးဆူ ကျဲအကမၣ်နီတဘျီဘၣ်န့ၣ်လီၤ.