သ့ၣ်ဘ့ၣ်ဘၣ်, ဒီးတၢ်တ့ဆီထီၣ် လံာ်စိၤပိာ်ခိၣ် အပိးလီတဖၣ် အိၣ်ရၤလီၤအသးလၢယမဲာ်ညါအကတီၢ်, ဖဲယအိးထီၣ်ဖးကွၢ် တၢ်ဆီထီၣ် လံာ်စိၤပိာ်ခိၣ် အလံာ်နဲၣ်ကျဲန့ၣ်ဒီး, ယထံၣ်တၢ်လၢပကဘၣ်မၤ, ဒီးပတဘၣ်မၤတဖၣ်န့ၣ်လီၤ. လၢလံာ်ကဘျံးပၤတထံၣ်အလိၤန့ၣ် ပာ်ဖျါထီၣ်ဝဲဒၣ် (X) အတၢ်ပနီၣ်ဖးဒိၣ်,ဃုာ်ဒီးပှၤကညီတဂၤအက့ၢ်ဂီၤ, ကွၢ်စုၢ်ဝဲ သ့ၣ်ဘ့ၣ်ဘၣ်, ဒီးတၢ်တ့ဆီထီၣ် လံာ်စိၤပိာ်ခိၣ် အပိးလီတဖၣ်, လီၤဂာ်ဒီး ယတၢ်အိၣ်အသးမၤအသးလၢ အပူၤကွံာ်စှၤမံးနံးအတီၢ်ပူၤန့ၣ်လီၤ. လၢလံာ်ကဘျံးပၤ အထွဲတကပၤန့ၣ် ပာ်ဖျါထီၣ်ဝဲဒၣ် “တၢ်တ့ဆီထီၣ် လံာ်စိၤပိာ်ခိၣ်ကျိၤကျဲအဘၣ်” န့ၣ်လီၤ. တၢ်လၢအလီၤဆီတမံၤန့ၣ် ပှၤအိၣ်ဝဲဒၣ်ခံဂၤ, ဒီးအဝဲသ့ၣ်အမဲာ်သၣ် ဖျါနံၤကမှံ, မ့ၢ်လၢအဝဲသ့ၣ်ခံဂၤတ့ဆီထီၣ်သကိး လံာ်စိၤပိာ်ခိၣ်န့ၣ်လီၤ.

လၢတၢ်န့ၣ်အဃိ, ယကိးယဝၤ, ဒီးဒုးနဲၣ်အီၤ တၢ်ဂီၤလၢလံာ်နဲၣ်ကျဲအပူၤ, ဒီးစံးဘၣ်အီၤ “လံာ်နဲၣ်ကျဲစံးဝဲဒၣ်လၢ ယလိၣ်ဘၣ်နတၢ်မၤစၢၤ” န့ၣ်လီၤ. အဝဲနံၤဝဲဒၣ်, ဒီးပတ့ဆီထီၣ်သကိး လံာ်စိၤပိာ်ခိၣ်န့ၣ်လီၤ. ယမ့ၢ်ဃုကျဲ, ဒီးတ့ဆီထီၣ် လံာ်စိၤပိာ်ခိၣ်, လၢယကစၢ်ဒၣ်ဝဲန့ၣ် သ့ဝဲဒၣ်ဘၣ်ဆၣ်, လံာ်နဲၣ်ကျဲအတၢ်ပာ်ဖျါလၢ ပတဘၣ်မၤထဲ တဂၤဧိၤအဂ့ၢ်န့ၣ် မ့ၢ်ကျိၤကျဲလၢအဘၣ်န့ၣ်လီၤ.

လံာ်ရိမ့ၤ အဆၢဒိၣ် ၁၂ အပူၤန့ၣ် စီၤပီလူး ဟ့ၣ်သဆၣ်ထီၣ်ဝဲဒၣ် ပှၤစူၢ်က့ၤနာ်က့ၤတၢ်သီတဖၣ် အသုတဂုာ်ကျဲးစၢးတ့သူၣ်ထီၣ် တၢ်အိၣ်မူလၢ ကစၢ်ယ့ၣ်ရှူးအပူၤ, ထဲအကစၢ်ဒၣ်ဝဲတဂၤဧိၤအဂ့ၢ်န့ၣ်လီၤ. လၢတၢ်ထံၣ်လီၤက့ၤအသး, ဒ်အမ့ၢ်ပှၤအလၢအပှဲၤ, ဒီးဆိကမိၣ်လီၤက့ၤအသးလၢ “အတၢ်ပာ်သူၣ်ပာ်သးထီန့ၢ်ဂ့ၤန့ၢ်ပှၤဂၤ” (:၃) အလီၢ်န့ၣ်, ကဘၣ်ထံၣ်လီၤက့ၤအသး ဒ်အမ့ၢ် နီၢ်ခိက့ၢ်ဂီၤတဖၣ် လၢနီၢ်ကစၢ်တဂၤဃီအလိၤ, ဒ်သိးဒီးကမၤစၢၤလိာ်သးကဒဲကဒဲအဂီၢ် (:၄-၈) န့ၣ်လီၤ.

ပှၤစူၢ်က့ၤနာ်က့ၤတၢ်ဖိကဒဲကဒဲ အတၢ်လိၣ်တဖၣ်, အတၢ်နးတၢ်ဖှီၣ်တဖၣ်, ဒီးအတၢ်သူၣ်ခုသးခုတဖၣ် (:၁၃၊၁၅) န့ၣ် တမ့ၢ်လၢပကဘၣ် ဟံးဃာ်ထဲပကစၢ်ဒၣ်ဝဲတဂၤဧိၤန့ၣ်ဘၣ်. ကစၢ်ယ့ၣ်ရှူး မၤစၢၤပှၤလၢ ပကမၤလိန့ၢ်ဝဲဒၣ် “တၢ်အဲၣ်လိာ်ကွံလိာ်သးဒ်ဒီပုၢ်ဝဲၢ်တံၢ်တံၢ်အသိး” (:၁၀) အဃိ, ပကလဲာ်ခီဖျိကလၢၢ်ဘၣ် တၢ်အိၣ်မူလၢအအိၣ်ဃူအိၣ်ဖိးလိာ်သးကဒဲကဒဲ သ့ဝဲဒၣ်န့ၣ်လီၤ.