ဒ်ယမ့ၢ်ပိာ်ခွါဖိသၣ်တဂၤအသိး, ယအဲၣ်ဖး ပီၣ်လဲၣ်တမျာ်အဂ့ၢ် တၢ်တဲပူတဖၣ်န့ၣ်လီၤ. တၢ်လဲၤခီဖျိ လၢအလီၤသူၣ်ပိာ်သးဝးအံၤ မ့ၢ်မၤဆူၣ်ထီၣ်ယသးအတၢ်ထံၣ်ဆိကမိၣ်မှံတဖၣ်ဒ်လဲၣ်. ခဲကနံၣ်အံၤ, ယအိၣ်ဆိးယဲဒၣ်လၢ လီၢ်ကဝီၤတတီၤ, ဖဲတမျာ်လၢအမံၤ တဟူထီၣ်သါလီၤဒိၣ်မးတဖၣ်အကျါတဂၤ, လၢအမ့ၢ် ဘလဲးဘံယၢး (Blackbeard)- မံၤနီၢ်ကီၢ်, (Edword Teach)- အလီၢ်ခၢၣ်သး အိၣ်အလီၢ်န့ၣ်လီၤ. ကဘီဟးဂီၤတခိၣ်လီၤဘျၢဝဲဒၣ်လၢပီၢ်လဲၣ်ထံယိာ်, လၢအအိၣ်ယံၤဒီးပီၣ်လဲၣ်နံၤဖဲအံၤန့ၣ် မ့ၢ် ဘလဲးဘံယၢးအကဘီ, နီၢ်ပၤမုၣ် အဲ(န) ရဘဲး (Queen Anne’s Revenge) န့ၣ်လီၤ.

လၢတၢ်စံၣ်စိၤတဲစိၤအပူၤ, ကဘီဟးဂီၤတဖၣ်, ဒီးပီၣ်လဲၣ်ပူၤ တၢ်လဲၤခီဖျိတဖၣ် လၢအလီၤသူၣ်ပိာ်သးဝးအဂ့ၢ်န့ၣ် ပထံၣ်ဆိကမိၣ်မှံအီၤ သ့ဝဲဒၣ်ညီကဒၣ်ဖိန့ၣ်လီၤ. ပှၤတၢ်မၢဖိ စီၤပီလူး ကွဲးပာ်ဖျါ ကဘီဟးဂီၤအဂၤတမံၤအဂ့ၢ်, လၢအဟ့ၣ်ပလီၢ်ပှၤ, ဒီးလၢအဟ့ၣ်သဆၣ်ထီၣ်ပှၤန့ၣ်လီၤ. စီၤပီလူး ကွဲးဆှၢလီၤအလံာ်ပရၢဆူ စီၤတံၤမသ့းအအိၣ် အခီၣ်ထံးတဘ့ၣ်အပူၤန့ၣ်, ဟ့ၣ်ပလီၢ်ဝဲဒၣ် ဖိလၢအစူၢ်က့ၤနာ်က့ၤတၢ်တဂၤလၢ, “အိၣ်ဒီးတၢ်နာ်, ဒီးသးလၢအသ့ၣ်ညါဒၣ်တၢ်လၢအဂ့ၤ, လၢပှၤတနီၤနီၤ ပာ်ကွံာ်ဝဲသတးဒီး လၢတၢ်နာ်အဂ့ၢ်န့ၣ် အကဘီဟးဂီၤဝဲ” (၁ တံၤ ၁:၁၉) န့ၣ်လီၤ. ကဘီဟးဂီၤတမံၤအံၤကမ့ၢ်တၢ်မနုၤလဲၣ်. လၢတၢ်သးဟးဂီၤဒိၣ်ဒိၣ်အပူၤန့ၣ် စီၤဟူးမးနဲဒီးစီၤအလ့းစၣ်ဒြူး ခံဂၤ, စူးကွံာ်ညိကွံာ်ဝဲ တၢ်စူၢ်တၢ်နာ်အမ့ၢ်အတီ, “ဒီးဒ်သိးတၢ်ကသိၣ်လိအီၤလၢ အသု တဒုၣ်ဒွဲၣ်တၢ်တဂ့ၤ” (:၂၀) အဂီၢ်, စီၤပီလူး ဟ့ၣ်လီၤအဝဲသ့ၣ်ဆူ မုၢ်ကီၤလံၢ်အစုပူၤ န့ၣ်လီၤ. အဝဲသ့ၣ်ကပီၢ်ယၢ်လီၤက့ၤအသးအဂီၢ်, စီၤပီလူး ဆၢမုၢ်လၢ်ဘၣ်ဆၣ်, အဝဲသ့ၣ် အတၢ်မၤအစၢလၢ အပိာ်ထွဲထီၣ်အခံတဖၣ်န့ၣ် မ့ၢ်တၢ်လၢအလီၤပျံၤလီၤဖုးဒိၣ်မးန့ၣ်လီၤ.

ပတၢ်စူၢ်တၢ်နာ်န့ၣ် တမ့ၢ်တၢ်အသံဘၣ်, အိၣ်ဆိးဝဲလၢ တၢ်လီၢ်လီၤဟိအပူၤ တန့ၢ်တသ့ဘၣ်. ပကဘၣ်အိၣ်မူဟူးဂဲၤဝဲဒၣ်နီၢ်နီၢ် လၢတၢ်သူၣ်ထီၣ်, ဒုးဒိၣ်ထီၣ်, ပတၢ်ရ့လိာ်ဘၣ်ထွဲဒီးကစၢ်ယွၤ အဂံၢ်ကဆူၣ်ထီၣ်, ဒိၣ်ထီၣ်အါထီၣ်, ဒ်သိးဒီးပတၢ်စူၢ်တၢ်နာ်, ဒီးသးလၢအသ့ၣ်ညါတၢ်ဂ့ၤန့ၣ် ကကဆှီဝဲအဂီၢ်န့ၣ်လီၤ. ခီဖျိလၢကစၢ်ယွၤအသးစီဆှံ အတၢ်ဟံးဃာ်ပၢၤဃာ်ပှၤအပူၤန့ၣ်, မ်ပကပာ်ဖှိၣ်မၤသကိးတၢ်ဒီးပှၤစူၢ်က့ၤနာ်က့ၤတၢ်အဂၤတဖၣ်, ဒီးပကပျဲကစၢ်ယွၤ မၤတၢ်လၢပတၢ်အိၣ်မူအပူၤန့ၣ်တက့ၢ်. ပတၢ်စူၢ်တၢ်နာ် အကဘီအသုတဟးဂီၤအဂီၢ်, ပတြီဆၢဒီဒၣ်သ့ဝဲဒၣ်န့ၣ်လီၤ.