တၢ်တိာ်ကျဲၤအတၢ်မၤ မူဒါခိၣ်, လွံစၣ် (Louise) တဂၤ, မ့ၢ်လၢအဃုထၢမၤ နီၢ်ကစၢ် အတၢ်မၤသဘျ့အဃိ, ပီၢ်ယၢ်လီၤက့ၤအသးန့ၣ်လီၤ. ပှၤလၢအဟဲဟ့ၣ်အီၤတၢ်ဖံးတၢ်မၤ,ဃုာ်ဒီးပှၤတ့ထုးထီၣ်တၢ်အက့ၢ်ဂီၤဒိခံဂၤလိာ်န့ၣ် မၤကွၢ် အတၢ်ဝံသးစူၤန့ၣ်လီၤ. အဝဲဆိကမိၣ်ထီၣ်ဝဲဒၣ် “ဘၣ်မနုၤအဃိ, တၢ်မၤတမံၤအံၤ ကီခဲဝဲဒိၣ်နီၢ်မးန့ၣ်လဲၣ်. ဘၣ်မနုၤအဃိ, ပှၤသ့ၣ်တဖၣ်အံၤ တဃုနၢ်ပၢၢ်လိာ်အသး တသ့ဝဲဒၣ်လဲၣ်” န့ၣ်လီၤ.
စှၤနွံပူၤကွံာ်ဝံၤအလီၢ်ခံန့ၣ်, ဖဲအဝဲဖး လံာ်တၢ်ကတိၤဒိ ၂၇:၁၇ န့ၣ် ထံၣ်ဝဲဒၣ် လီၤလီၤဆီဆီလၢ “ထးကျ့ထး” အဂ့ၢ်န့ၣ်လီၤ. တယံၢ်ဘၣ်န့ၣ် အဝဲစံးဘၣ် အကရူၢ်ဖိတဖၣ်လၢ “တၢ်လၢအကိၤဒီးအတဘျ့တဖၣ်န့ၣ် နကတြူာ်ကျ့မၤဘျ့အီၤလၢ တၢ်အကပုာ်လုးဖိ ဒ်သတိၢ်န့ၣ် တန့ၢ်တသ့ဘၣ်. နလိၣ်ဘၣ်တၢ်လၢအကိၤတမံၤမံၤ, လီၤဂာ်ဒ်ထးအသိး” န့ၣ်လီၤ.
လွံစၣ် သ့ၣ်ညါနၢ်ပၢၢ်ထီၣ်ဝဲဒၣ် လၢအတၢ်တိာ်ကျဲၤအတၢ်မၤအပူၤ တၢ်တၤတဖၣ် စံးတၢ်န့ၣ် မ့ၢ်တၢ်လၢကမၤဘျ့မၤဂ့ၤထီၣ် အတၢ်ဖံးတၢ်မၤ လၢအတလဲၤသးဘျ့ဘျ့ဆှီဆှီတဖၣ်န့ၣ်လီၤ. ဒ်သိးအကမ့ၢ်ပှၤလၢ အကမၤအါထီၣ် တၢ်ဝံသးစူၤဒီးတၢ်ဆီၣ်လီၤသး, ဒီးကဃုထံၣ်န့ၢ် တၢ်မၤလၢကျိၤကျဲ လီၤဆီအဂၤတဖၣ်အဂ့ၢ်န့ၣ် လွံစၣ် မၤလိန့ၢ်ဝဲဒၣ်န့ၣ်လီၤ. လွံစၣ် မၤကတၢၢ်အတၢ်ကတိၤလၢ, ကစၢ်ယွၤ စူးကါဝဲဒၣ် အတၢ်တိာ်ကျဲၤအတၢ်မၤ ဒ်သိးကဒုးနဲၣ်ဖျါထီၣ် အတၢ်ဂံၢ်စၢ်ဘါစၢ်တဖၣ်, ဒီးသိၣ်လိအီၤလၢ တၢ်မၤလိအသီ, ဘၣ်ဃးဒီးတၢ်မၤသကိးတၢ်ဒီးပှၤဂုၤပှၤဂၤအဂ့ၢ်န့ၣ်လီၤ.
လံာ်တၢ်ကတိၤဒိ စံးပတြၢၤပာ်ဒိၣ်ဝဲ တၢ်ကူၣ်သ့အလုၢ်အပှ့ၤလၢ အဘၣ်ယွၤအသးတဖၣ်အါမးဘၣ်ဆၣ်, တၢ်ကူၣ်သ့တဖၣ်အံၤ တဟဲဝဲဒၣ်ညီညီဘၣ်. အလီၢ်အိၣ်ဝဲလၢ တၢ်ကဘၣ်လူၤဃုဖီၣ်န့ၢ်အီၤ လၢတၢ်စူၢ်ဒိကနၣ်, ဒီးသးအတၢ်သ့ၣ်ညါ (၃:၁၃, ၁၃:၂၀, ၁၉:၂၀), ဒီးဘၣ်တၢ်မၤစီအီၤလၢ သပၢၤဒီးမ့ၣ်ဖၣ်ကပူၤ, ဆၢၣ်ဒီးဆၢၣ်တိၢ်ဘိတဖၣ် (၂၇:၂၁-၂၂), တၢ်အခီပညီကမ့ၢ်ဝဲဒၣ်လၢ ကတူၢ်ဘၣ်တၢ်နးတၢ်ဖှီၣ်တစိၢ်တလီၢ်န့ၣ်လီၤ.
ဘၣ်ဆၣ်, လံာ်စီဆှံဟ့ၣ်ပလီၢ်ပှၤလၢ တၢ်ကီတၢ်ခဲတဖၣ် ဟဲစိာ်ဃုာ်ဝဲ တၢ်လၤကပီၤအခိၣ်ဖး- လၢတၢ်ဃုထံၣ်န့ၢ် ကစၢ်ယွၤ အတၢ်ကူၣ်သ့စွံကတုၤ, ဒီးတၢ်စူၢ်ဒိကနၣ် ကစၢ်ယွၤအကျဲတဖၣ်အပူၤန့ၣ်, ပကထံၣ် တၢ်ဘံၣ်တၢ်ဘၢအမ့ၢ်အတီ, တၢ်သူၣ်မံသးမုာ်, ဒီးတၢ်ဆိၣ်ဂ့ၤနီၢ်နီၢ် (:၂၆-၂၇) န့ၣ်လီၤ.
