တၢ်လဲၤခီဖျိတူၢ်ဘၣ် တၢ်ဆူးတၢ်ဆၢယံာ်ယံာ်ထၢထၢတမံၤန့ၣ်, မၤလီၤဘှံးလီၤဘှါ ကၠ့မံၣ် (Jimmy) နးနးကျံးကျံးန့ၣ်လီၤ. အဝဲအသးအိၣ်ရ့လိာ်သးဒီးကစၢ်ယွၤ- ခီဖျိလၢတၢ်ဃ့ထုကဖၣ် ကစၢ်ယွၤ, ဒီးတၢ်ကွၢ်ထံဆိကမိၣ် ယွၤအကလုၢ်ကထါ ကိးမုၢ်ဂီၤဒဲးဘၣ်ဆၣ်, လၢအလီၢ်ဆ့ၣ်နီၤအလိၤန့ၣ် ကဆ့ၣ်နီၤ, ဒီးကပာ်ဝဲအနီၢ်ကစၢ် ဒ်လဲၣ်န့ၣ် တထံၣ်န့ၢ်ဝဲဒၣ်ကျိၤကျဲန့ၣ်ဘၣ်. အဝဲဃၣ်ကပၤအသးဆူအံၤတခီ, ဆူနုၤတခီဘၣ်ဆၣ်, တၢ်ဘၣ်အီၤတမုာ်တလၤဘၣ်. အကတၢၢ်န့ၣ်, လၢတၢ်သူၣ်ဟးဂီၤသးဟးဂီၤအပူၤ, လီၤဃံၤဝဲဒၣ်လၢတၢ်ချံးလီၤခီၣ်အပူၤန့ၣ်လီၤ. ဖဲအမၤဝဲ တၢ်ထုကဖၣ် အက့ၢ်ဂီၤဒ်သိးအံၤန့ၣ် မၤဆံးလီၤ စှၤလီၤ တၢ်ဆါဆၢ်အ့ၣ်ထုးတဖၣ်လၢ အတူၢ်ခီၣ်ဝဲတမုာ်ဘၣ်အီၤန့ၣ်လီၤ. မုၢ်ဂီၤလၢအပိာ်ထွဲထီၣ်အခံတဖၣ်န့ၣ်, ကၠ့မံၣ် ရ့လိာ်အသးဒီးကစၢ်ယွၤ လၢတၢ်ချံးလီၤခီၣ်အပူၤ- ဒိးန့ၢ်ဝဲဒၣ် သးအတၢ်မုာ်တၢ်ပၢၤ, ဖဲအဃ့ထုကဖၣ် ကိးထီၣ်ယွၤအကတီၢ်န့ၣ်လီၤ.

ယူဒၤအစီၤပၤ, စီၤယဟိၤရှၤဖး စ့ၢ်ကီး, ဘၣ်ကွၢ်ဆၢၣ်မဲာ်ဝဲ တၢ်ဒုးတၢ်ယၤတမံၤန့ၣ်, တမ့ၢ် တၢ်ဆူးတၢ်ဆါဘၣ်, မ့မ့ၢ်လၢဒုၣ်ဒါတဖၣ် အတၢ်မၤပျံၤမၤဖုး (၂ ကွဲး ၂၀:၁-၂) န့ၣ်လီၤ. စီၤပၤ ယဟိၤရှၤဖး န့ၣ် “ပျံၤတၢ်, ဒီးဃၣ်အသးဒ်သိးအကဃုယွၤ” (:၃) န့ၣ်လီၤ. ပှၤယူၤဒၤဖိတဖၣ်ခဲလၢာ်အိၣ်ဖှိၣ်ရိဖှိၣ် ဒ်သိးကဃုန့ၢ် “ယွၤအတၢ်မၤစၢၤ” စ့ၢ်ကီး (:၄) န့ၣ်လီၤ. ကစၢ်ယွၤ ဒိကနၣ် အဝဲသ့ၣ်အတၢ်ထုကဖၣ်, ဒီးယွၤအသးဟဲလီၤလၢ ပှၤလ့ၤဝံဖိ စီၤယၤဃစအ့လးအလိၤ, ပှၤလၢအစံးဘၣ်တဲဘၣ် တၢ်ကစီၣ်လၢ ကမၤမုာ်ထီၣ်စီၤပၤအသး, “ပျံၤတၢ်တဂ့ၤ. ဘၣ်ယိၣ်တၢ်တဂ့ၤ… ယွၤအိၣ်ဝဲဒီးသု” (:၁၅,၁၇) န့ၣ်လီၤ. “စီၤပၤ ယဟိၤရှၤဖး ဆုးလီၤအခိၣ်ဆူဟီၣ်ခိၣ်,” ဒီးပှၤယူဒၤဖိခဲလၢာ်န့ၣ်…. “ထိၣ်လီၤပှီၤအသးလၢ ယွၤအမဲာ်ညါ, ဒီးဘူၣ်ထီၣ်ဘါထီၣ်ယွၤ” (:၁၈) န့ၣ်လီၤ.

လၢတၢ်နးတၢ်ဖှီၣ်, ဒီးလၢတၢ်တၤအကတီၢ်တဖၣ်အပူၤန့ၣ်, ကစၢ်ယွၤ အိၣ်ဘူးဒီးပှၤန့ၣ် ကျိၤကျဲလၢဒိၣ်စိဒိၣ်ကမိၤအပူၤ, ပလဲၤခီဖျိကလၢၢ်ဘၣ်တလီၢ်လီၢ်န့ၣ်လီၤ. ဒ်ယွၤမၤစၢၤပှၤ, ဒ်သိးပကဟ့ၣ်လီၤအးလီၤပသးလၢ ယွၤအတၢ်ဘၣ်သးအပူၤ, ဒီးပာ်ဖျါထီၣ် တၢ်သးအိၣ်ထုကဖၣ် အတၢ်ပာ်သးန့ၣ်ဒီး, ပကဃုထံၣ်န့ၢ် တၢ်မၤမုာ်ထီၣ်က့ၤပှၤ, ဒီးသးအတၢ်ဃူတၢ်ဖိးလၢ ကစၢ်ယွၤအပူၤသ့ဝဲဒၣ်န့ၣ်လီၤ.