ယဖိဒိၣ်မုၣ်ဖိခံဂၤ အနီၢ်ဆံးဒံးအကတီၢ်, ဖဲပဟံးန့ၢ်ဟါတၢ်အီၣ်ဝံၤန့ၣ်ဒီး, မၢန့ၢ်ဆီၣ်ခံယၤလၢတၢ်ကတိၤကပုာ်လုးဖိ ဒ်သိးယကလိၣ်ကွဲသကိးဒီးအဝဲသ့ၣ်အဂီၢ်န့ၣ်လီၤ. အဝဲသ့ၣ် မၤလီၤပံာ် တၢ်ကပီၤတဖၣ်လၢဟံၣ်ပူၤ, ဒီးပဟးထွဲတရူာ် ပခီၣ်လၢတၢ်ခံးကျါ, ပဖီၣ်ဃာ်လိာ်သးတဂၤဒီးတဂၤလၢတၢ်နံၤတၢ်အ့အပူၤန့ၣ်လီၤ. အဝဲသ့ၣ်မုာ်လၤသးခုဝဲဒၣ် တၢ်မၤပျံၤမၤဖုးလီၤက့ၤသး, ခီဖျိတၢ်ဃုထၢလဲၤတၢ်လၢတၢ်ခံးကျါ, မ့ၢ်လၢအဝဲသ့ၣ်သ့ၣ်ညါဝဲဒၣ်လၢ တကတီၢ်ဂ့ၤတကတီၢ်ဂ့ၤန့ၣ် အိးထီၣ်ကဒါကၤ မ့ၣ်အူအတၢ်ကပီၤသ့ဝဲဒၣ်အဃိန့ၣ်လီၤ.
ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်အဂီၢ်, ပှၤတၢ်မၢဖိ စီၤယိၤဟၣ် စံးကတိၤပာ်ဖျါထီၣ် တၢ်ဃုထၢလဲၤတၢ်လၢတၢ်ခံးကျါ အဂၤတကလုာ် လၢအလံာ်ပရၢအပူၤန့ၣ်လီၤ. ၁ ယိၤ ၁:၆ ပာ်ဖျါဝဲဒၣ် တၢ်ဒဲးဘး ဒ်အမ့ၢ် “တၢ်ခံး” န့ၣ်လီၤ. မ့ၢ်လဲၤတၢ်လၢ တၢ်ခံးကျါန့ၣ် တမ့ၢ်တၢ်တပာ်သူၣ်တပာ်သးမၤတၢ် တစိၢ်ဖိဧိၤအဂီၢ်ဘၣ်. မ့မ့ၢ်တၢ်ဃုထၢမၤကမၣ်တၢ် ဆူညါကွ့ၢ်ကွ့ၢ်န့ၣ်လီၤ. စီၤယိၤဟၣ် မၤသ့ၣ်နီၣ်ထီၣ်ပှၤလၢ ယွၤပကစၢ်အစီအဆှံတဂၤမ့ၢ် “တၢ်ကပီၤ,” ဒီး “တၢ်ခံးတအိၣ်ဘၣ်လၢအပူၤနီတမံၤဘၣ်” (:၅) န့ၣ်လီၤ. လၢတၢ်န့ၣ်အဃိ, ဖဲပစံးလီၤပသးလၢ ပရ့လိာ်သးဒီးယွၤဘၣ်ဆၣ်, လၢတၢ်သးအိၣ်အပူၤန့ၣ် ပမၤဒံးတၢ်ဒဲးဘးအဖၢမုၢ်အဃိ, ကမ့ၢ်ဝဲဒၣ် “ပကတိၤတၢ်ကဘျံးကဘျၣ်, ဒီးပတမၤဘၣ်တၢ်မ့ၢ်တၢ်တီဘၣ်” (:၆) န့ၣ်လီၤ. ဒ်သိး “ပှၤလၢအပိာ် (အ) ခံတဖၣ်န့ၣ်, တဟးဘၣ်ဝဲလၢ တၢ်ခံးကျါဘၣ်, ဒီးကန့ၢ်ဘၣ် တၢ်မူအတၢ်ကပီၤ” (ယိၤ ၈:၁၂) အဂီၢ်, ကစၢ်ယ့ၣ်ရှူး လၢအမ့ၢ် ဟီၣ်ခိၣ်အတၢ်ကပီၤန့ၣ် ဟဲဝဲဒၣ်န့ၣ်လီၤ.
ခီဖျိလၢကစၢ်ယွၤအဘျုးအဖှိၣ်အဃိ, ဖဲပဟးဝ့ၤဝီၤလၢနီၢ်သးအတၢ်ခံးကျါဝံၤနံၣ်ဒီး, လၢတၢ်ပီၢ်ယၢ်လီၤက့ၤသးအပူၤန့ၣ်, ပဃၣ်လိၤက့ၤပသးဆူ ယွၤအအိၣ်, ပလဲၤကဒီးလၢ အတၢ်ကပီၤအပူၤ, လၢအကျဲဒီးအတၢ်ပညိၣ်တဖၣ်အပူၤ သ့ဝဲဒၣ်န့ၣ်လီၤ. ၁ ယိၤ ၁:၉ စံးဘၣ်ပှၤလၢ, အဝဲ “ကပျၢ်ကွံာ်ပတၢ်ဒဲးဘး, ဒီးသ့စီကွံာ်ပှၤလၢ ကယဲၢ်တၢ်အၢတၢ်သီခဲလၢာ်” န့ၣ်လီၤ. ပမ့ၢ်အိၣ်မူအိၣ်ဂဲၤ ထဲဒၣ်လၢတၢ်ဒိကနၣ် ကစၢ်ယွၤအပူၤန့ၣ်, ပမုာ်လၤသးခုတၢ်ဆိၣ်ဂ့ၤအလၢအပှဲၤ, အိၣ်ဟဲခီဖျိလၢတၢ်ရ့လိာ်သးဒီးကစၢ်ယွၤ,ဃုာ်ဒီးပှၤစူၢ်က့ၤနာ်က့ၤအဂုၤအဂၤတဖၣ် ကသ့ဝဲဒၣ် (:၇) န့ၣ်လီၤ.
