ရ့ ပရံးခၠၢး (Ray Pritchard) ကွဲးဝဲဒၣ် အလံာ် “ပှၤလၢအအိၣ်ဒီးအလၤကပီၤ” (Man of Honor) အပူၤန့ၣ်, ဟ့ၣ်ခီနီၤဝဲဒၣ် အတၢ်လဲၤဟးကသုၣ်လၢ တၢ်သွၣ်ခိၣ်အလီၢ်တတီၤ, ဒီးထံၣ်ဝဲဒၣ် ပှၤတဂၤအသွၣ်ခိၣ်အတၢ်ပနီၣ် ပာ်ဖျါထီၣ် ပှၤတဂၤအံၤအတၢ်ဂ့ၤတၢ်ဝါတဖၣ် လၢတၢ်ကတိၤအါဖျၢၣ်အဂ့ၢ်န့ၣ်လီၤ. ဘၣ်ဆၣ်, လၢခံထံၣ်ဝဲဒၣ် အဝဲကွဲးပာ်ဖျါဝဲဒၣ် ပှၤတဂၤအံၤ အဖိခွါ အတၢ်သွၣ်ခိၣ်အလၢၢ်ဘ့ၣ်ဘၣ်လၢ ပှၤမ့ၢ်ထံၣ်ဒီးကပာ်သူၣ်ပာ်သးညီဝဲဒၣ်, ဒီးလၢအလိၤန့ၣ်တၢ်စိးပျၤဃာ်ဝဲ “ပှၤအတီအလိၤနီၢ်နီၢ်တဂၤ” (A man of unquestioned integrity) န့ၣ်လီၤ. ပရံးခၠၢး ကွဲးပာ်ဖျါဝဲဒၣ် “တၢ်ကတိၤယဲၢ်ဖျၢၣ်လၢ အတဲဖျါ သးသမူဒီစိၤအဂ့ၢ် လၢတၢ်ကတိၤစှၤဖျၢၣ်န့ၣ်လီၤ. တၢ်ပာ်ဖျါထီၣ် သးသမူအတၢ်လဲၤခီဖျိ အနံၣ်ဃုဆံဘျဲၣ်န့ၣ် လၢတၢ်ကတိၤ ယဲၢ်ဖျၢၣ်ဖိန့ၣ်လီၤ. ဘၣ်ဆၣ်, မ့ၢ်အတဲဖျါထီၣ် တၢ်အမ့ၢ်အတီမနုၤတဖၣ်လဲၣ်.”

ထါစံးထီၣ်ပတြၢၤ ၁၅:၁ အပူၤန့ၣ်, ပကထံၣ်ဘၣ် တၢ်သံကွၢ်တဖၣ် လၢအသံကွၢ်ဝဲဒၣ် ပှၤအိၣ်လီၤဆီ တကလုာ်အဂ့ၢ်, “ယွၤဧၢ, မ့ၢ်မတၤကအိၣ်ဝဲဆိးဝဲ လၢနဒဲပူၤတဂၤလဲၣ်, မ့ၢ်မတၤ ကအိၣ်ဝဲလၢ နကစၢၢ်စီဆှံအလိၤတဂၤလဲၣ်” (:၁) န့ၣ်လီၤ. တၢ်စံးဆၢ “ပှၤလၢအလဲၤတၢ်လၢလၢပှဲၤပှဲၤ, ဒီးမၤတၢ်တီတၢ်လိၤ, ဒီးကတိၤတၢ်မ့ၢ်တၢ်တီလၢအသး” (:၂) အပူၤန့ၣ် ပာ်ဃုာ်ဒီးတၢ်အိၣ်မူဖံးတၢ်မၤတၢ်တီတီလိၤလိၤ, ဒီးဘၣ်တၢ်ကျၢၢ်တံၢ်အီၤလၢ တၢ်ကတိၤ “ပှၤလၢအလဲၤတၢ်လၢလၢပှဲၤပှဲၤ” န့ၣ်လီၤ. တၢ်မ့ၢ်ပာ်ဖှိၣ် တၢ်သံကွၢ်လၢ အဆၢဖိ ၁, ဒီးတၢ်စံးဆၢလၢ အဆၢဖိ ၂, ခံထံၣ်န့ၣ် အဲၣ်ဒိးစံးဝဲဒၣ်လၢ တၢ်ရ့လိာ်သးဘူးဘူးတံၢ်တံၢ်ဒီးကစၢ်ယွၤန့ၣ်လီၤ. တၢ်အိၣ်မူ မၤလၤကပီၤယွၤ ကမ့ၢ်တၢ်ဒ်လဲၣ်အဂ့ၢ်န့ၣ်, ဘၣ်တၢ်ကွဲးဖုၣ်ကွဲးဖှိၣ် ပာ်ဖျါထီၣ်အီၤ, လၢတၢ်ကတိၤအဂ့ၤတကပၤ, ဒီးလၢအတဂ့ၤ တကပၤ, ဖဲအဆၢဖိလၢအိၣ်လီၤတဲာ်တ့ၢ်ဝဲဒၣ်အဂၤတဖၣ်အပူၤန့ၣ်လီၤ.

ပတၢ်ရ့လိာ်ဘၣ်ထွဲလိာ်သးဒီးကစၢ်ယွၤ ဘူးဘူးတံၢ်တံၢ်န့ၣ်, ကဟဲအိၣ်ဖျါထီၣ်ဝဲဒၣ်လၢ တၢ်အိၣ်မူအတီအလိၤအပူၤ, လီၤဆီဒၣ်တၢ် ဒ်သးစီဆှံ မၤစၢၤပှၤအသိး, ဖဲလၢပရ့လိာ်သးဒီးပှၤဂၤဒ်လဲၣ် (ကွၢ်ဖဲ မး ၂၂;၃၄-၄၀, ၁ ယိၤ ၃:၁၆-၁၈) န့ၣ်လီၤ. ပကဘၣ်ဟံးဃာ်ဂၢၢ်ကျၢၤ အိၣ်မူကျိၤကျဲဒ်သိးအံၤတဖၣ်, ဖဲပစူၢ်က့ၤနာ်က့ၤ, ဒီးလူၤပိာ်ကစၢ်ယ့ၣ်ရှူး, လၢအအိၣ်မူတ့ၢ်ဝဲ တၢ်ရ့လိာ်သးဒီးပၢ်ကစၢ်ယွၤ အလၢအပှဲၤတဂၤ အခံန့ၣ်လီၤ.