ဖဲလါဒံၢ်စ့ဘၢၣ် (၂၉) သီ, ၁၉၄၀ နံၣ်န့ၣ် ကဘီယူၤ နုာ်လီၤဒုး တ့ၢ်လီၤဝဲဒၣ်မ့ၣ်ပိၢ် လၢဝ့ၢ်လိဒိၣ် အကတီၢ်, မ့ၣ်ပိၢ်တဖျၢၣ် မၤဟးဂီၤကွံာ် ပနံာ်ဒၢးတဖျၢၣ်လၢ (St. Paul) တၢ်ဘါသရိာ်အဃၢၤန့ၣ်လီၤ. ဖဲ ဘ့းဒံၣ် ခၠ့ဘၢၣ် (Biddy Chambers) ဒိးန့ၢ်ဝဲဒၣ်တၢ်ကစီၣ်လၢ အီး(စ)ဝီ ခၠ့ဘၢၣ် (Oswald Chambers) အလံာ် အဘ့ၣ် ၄၀,၀၀၀ လၢအဘၣ်တၢ်ပာ်ဖှိၣ်ဃာ်အီၤဖဲန့ၣ်တဖၣ်, လံာ်လၢ အဝဲပာ်ဖှိၣ်, ဒီးပဲာ်ထံဘှီဂ့ၤက့ၤ ဝဲဒၣ်ဝံၤဘၣ်ဆၣ်, တပှ့ၤဘၣ်တၢ်အုၣ်ကီၤလၢလံာ်တဖၣ်အဂီၢ်ဒံးဘၣ်တဖၣ်န့ၣ်, လီၤမၢ်ကွံာ်ဝဲဒၣ်အဂ့ၢ်န့ၣ်ဒီး, ပာ်လီၤဝဲ အလာ်ဖးထံလီခီ, ဒီးစံးဘၣ်အဖိမုၣ်လၢ, “ဂ့ၤဝဲလီၤ, ယွၤ စူးကါတ့ၢ်ဝဲ လံာ်တဖၣ်အံၤ လၢအလၤကပီၤအဂီၢ်လံ, ဘၣ်ဆၣ်, တၢ်သ့ၣ်တဖၣ်န့ၣ်ဝံၤဝဲဒၣ်လံန့ၣ်လီၤ. ခဲကနံၣ်အံၤ, ပကဘၣ်အိၣ်ခိးကွၢ် ကစၢ်ယွၤကမၤတၢ်မနုၤလဲၣ်န့ၣ်လီၤ.”
ဖဲဟီၣ်ခိၣ်ဒီဘ့ၣ် တၢ်ဒုးဖးဒိၣ်အခီၣ်ထံးတဘျီ စးထီၣ်ဝဲဒၣ်အကတီၢ်, လံာ်လၢ အဝၤသးဘိ အီး(စ)ဝီ လၢအလဲၤပူၤကွံာ်တ့ၢ်လံ ဟီၣ်ခိၣ်တဂၤ ကွဲးတ့ၢ်ဝဲတဖၣ်န့ၣ်, ဘ့းဒံၣ် ကသ့ၣ်နီၣ်ထီၣ်က့ၤဝဲဒၣ်သ့ၣ်သ့ၣ်န့ၣ်လီၤ. အီး(စ)ဝီ ကွဲးနီၣ်တ့ၢ်ဝဲဒၣ် ကစၢ်ယ့ၣ်ရှူး တဲဘၣ် အပျဲၢ်အဘီၣ်တဖၣ်လၢ “တၢ်ဘၣ်ယိၣ်ဘၣ်ဘီဒိၣ်ဒိၣ်တဖၣ်လၢ တၢ်ဟးဆှဲးအီၤတန့ၢ်တသ့” အဂ့ၢ်, ဒီးဖဲတၢ်လီၤပျံၤလီၤဖုးတဖၣ် မ့ၢ်မၤအသးန့ၣ်ဒီး, မ့ၢ်လၢအဝဲအိၣ်ဒီးအပျဲၢ်အဘီၣ်တဖၣ်အဃိ, ဒ်သိးအဝဲသ့ၣ် အသုတပျံၤတၢ်တဂ့ၤအဂီၢ်န့ၣ်လီၤ.
ကစၢ်ယ့ၣ်ရှူး တဲဝဲဒၣ် အတံၤသကိးတဖၣ်, “လၢဟီၣ်ခိၣ်အံၤ, သုကဘၣ် တၢ်ဖှီၣ်လီၤ. ဘၣ်ဆၣ်ဒီးပာ်သုသးခူတလ့ၢ်တက့ၢ်. ယမၤနၢၤလံဟီၣ်ခိၣ်လံ” (ယိၤ ၁၆:၃၃) န့ၣ်လီၤ. ကစၢ်ယ့ၣ်ရှူး အဲၣ်ဒိးဝဲလၢ အပျဲၢ်အဘီၣ်တဖၣ် အတၢ်စူၢ်တၢ်နာ် ကအိၣ်ဂၢၢ်ဆိးကျၢၤလၢ ပၢ်ကစၢ်ယွၤအလိၤ, ဒ်သိးဒီးအဝဲသ့ၣ်တူၢ်ဆၢ ခီၣ်ဆၢ တၢ်မၤကွၢ်, ဒီးတၢ်တၤတဖၣ်လၢ တၢ်သးစွံကတုၤကန့ၢ်အဂီၢ်န့ၣ်လီၤ.
ဘ့းဒံၣ် အတၢ်နာ်သန့ၤယွၤ ကစုဒုန့ၣ် စိာ်ခီဂာ်အီၤ, ဒီးအကတၢၢ်န့ၣ် လံာ်သ့ၣ်တဖၣ် ဘၣ်တၢ်စဲကျံးထုးထီၣ်ကဒါက့ၤအီၤ, ဒီးကဲထီၣ်ဝဲဒၣ် လံာ်အဂ့ၤအဒိၣ်အထီလၢစၢၤသွဲၣ်သီတဖၣ်အဂီၢ်န့ၣ်လီၤ. ပဝဲစ့ၢ်ကီး, ပဃုထံၣ်န့ၢ် တၢ်ဟ့ၣ်ဂံၢ်ဟ့ၣ်ဘါ, ဒီးတၢ်မုၢ်လၢ် ခီဖျိလၢကစၢ်ယ့ၣ်ရှူး အတၢ်အၢၣ်လီၤအီၤလီၤတဖၣ်, လၢအမၤနၢၤဟီၣ်ခိၣ်လံအပူၤန့ၣ်လီၤ. ပသ့ၣ်ညါလၢ အဝဲတပာ်လီၤတဲာ်ဖိၣ်ဃဲဘၣ်ပှၤဘၣ် (၁၄:၁၈), ဒီးပကွၢ်ဆၢၣ်မဲာ်ဘၣ်တၢ်တမံၤမံၤဂ့ၤန့ၣ်, ကပာ်လီၤတဲာ်တၢ်ဃူတၢ်ဖိးဒီးပှၤ (:၂၇) န့ၣ်လီၤ.
