ကဘီထုးတၢ်တခိၣ် လီၤဘျၢဝဲဒၣ် ခိၣ်လီၤစဲၤခံထီၣ်ထူၣ်ဆူ ပီၣ်လဲၣ်အခံဒး, ဖဲတၢ်လီၢ်အိၣ်စီၤစုၤဒီးနၢၣ်ကၠ့ရံယၤ (Nigeria) အပီၣ်လဲၣ်နံၤ မံးလာ် ခံဆံန့ၣ်လီၤ. ပှၤကဘီဖိ (၁၁) ဂၤ လီၤအုးသံဝဲဘၣ်ဆၣ်, ကဘီအပှၤဖီတၢ်အီၣ်တၢ်အီ ဟါရ့းစဲ(န) အိၣ်ကၠဲးဘၤ အိၣ်ကံၣ်န့ (Harrison Odjegba Okene) တဂၤ, ဃုထံၣ်န့ၢ် တၢ်လီၢ်ဖိလၢ ကလံၤအိၣ်အလီၢ်အကျဲတတီၤ, ဒီးအိၣ်ခိးဝဲ ပှၤကဟဲမၤပူၤမၤဖျဲးအီၤန့ၣ်လီၤ. လၢအဂီၢ် တၢ်အီၣ် အိၣ်ဒၣ်ထဲ ခိး (Coke) တၢ်ဆၢထံ အလီခီတကိ, ဒီးအလီဆှီ တၢ်ကပီၤ (Flashlight) ခံခါလိာ်န့ၣ် အဂံၢ်လၢာ်ကွံာ်ဝဲလၢ (၂၄) နၣ်ရံၣ်အတီၢ်ပူၤန့ၣ်လီၤ. လၢပီၣ်လဲၣ်မိၢ်ပှၢ်အခံဒး မုၢ်နံၤလၢအလီၤပျံၤလီၤဖုး တၢ်ခံးကျါအပူၤန့ၣ်, အိၣ်ကံၣ်န့ အိၣ်ကတာ်အသးထဲဒၣ်တဂၤဧိၤန့ၣ်လီၤ. လၢအဂီၢ် တၢ်မုၢ်လၢ်စးထီၣ်လီၤမၢ်လံအကတီၢ်န့ၣ်, ဒ်သိးပှၤယူၤထံယိာ်ဖိ တဖၣ် ကဟံးန့ၢ်က့ၤ ပှၤသံအစိာ်တဖၣ်အဂီၢ်, ဟဲတုၤဝဲန့ၣ်ဒီး, ထံၣ်န့ၢ်အီၤလၢ ကဘီ အမိၢ်ပှၢ်အပူၤ, အိၣ်ဆ့ၣ်နီၤဝဲတစီၤခီၣ် လၢတၢ်ကနိးကစုာ်အပူၤန့ၣ်လီၤ.
အိၣ်ကံၣ်န့ ဘၣ်အိၣ်ဝဲထဲတဂၤဧိၤ လၢတၢ်ခံးကျါ, ကယံာ်ဝဲဒၣ် နၣ်ရံၣ် ၆၀, ဒီးအက့ၢ်အဂီၤန့ၣ် ဖျါလၢအပျံၤတၢ်ဖုးတၢ်ဒိၣ်မးန့ၣ်လီၤ. အဝဲတဲဖျါထီၣ် ပှၤဟံးန့ၢ် တၢ်ကစီၣ်ဖိတဖၣ်လၢ အတၢ်လဲၤခီဖျိလၢအလီၤပျံၤလီၤဖုးအံၤအဃိ, တူၢ်ဘၣ်ခီၣ်ဘၣ် တၢ်မံမီၢ်အၢသီတဖၣ်အဖၢမုၢ်န့ၣ်လီၤ. ဘၣ်ဆၣ်, ဖဲလၢ အဝဲ ထံၣ်ဝဲဒၣ် ပှၤယူၤထံယိာ်ဖိတဖၣ် အလီဆှီ တၢ်ကပီၤ လၢအဂံၢ်ဆူၣ်တဖၣ် ဆဲးဖျိလီၤတၢ်ခံၤယိာ်အကျါန့ၣ်ဒီး, အသးကလၢၢ်ဘၣ်ဝဲဒ်လဲၣ်န့ၣ် မ့ၢ်နဆိကမိၣ်ထံၣ်မှံနဲဘၣ်ကသ့ဧါ. အသးကခု, ဒီးကသူၣ်ပိၢ်သးဝး, အတၢ်မုၢ်လၢ် ကအိၣ်ထီၣ်ဝဲဒၣ်ဆံးဒိၣ်လဲၣ်. ဝံယရှါယၤ တဲဆိပာ်ဝဲလၢ မ့းရှံအၤ မ့ၢ်ဟဲန့ၣ်, “ပှၤလၢအဆ့ၣ်နီၤလၢတၢ်ခံးကျါန့ၣ် ထံၣ်ဘၣ်လံ တၢ်ကပီၤဖးဒိၣ်လံ” (ယရှါ ၉:၂) န့ၣ်လီၤ. လၢပတၢ်ပကစၢ်ဒၣ်ဝဲန့ၣ် ပဘၣ်အိၣ်ဆိးလၢ “တၢ်သံအကဒုအကီၢ်ပူၤ” ဘၣ်ဆၣ်, ခီဖျိလၢကစၢ်ယ့ၣ်ရှူးအဃိ, “တၢ်ကပီၤထီၣ်လံ” (:၂) န့ၣ်လီၤ.
ကစၢ်ခရံာ် မ့ၢ် “ဟီၣ်ခိၣ်အတၢ်ကပီၤ,” ဒီးမ့ၢ်လၢပအိၣ်ဒီး “တၢ်မူအတၢ်ကပီၤ” (ယိၤ ၈:၁၂) အဃိ, ခီဖျိလၢကစၢ်ခရံာ်အပူၤန့ၣ် ပကပျံၤတၢ်ခံးအဂီၢ်အလီၢ်တအိၣ်ဝဲ နီတဘျီလၢၤဘၣ်န့ၣ်လီၤ. ဘၣ်သ့ၣ်သ့ၣ်, ပသးကတူၢ်ဘၣ်ခီၣ်ဘၣ် ဒ်ပဘၣ်တၢ်ဖီၣ်ဃာ်ပှၤလၢထု, (မ့) ပတၢ်မုၢ်လၢ်တအိၣ်လၢၤဘၣ်အသိး, ပဘၣ်အိၣ်သယုၢ်သညိ ထဲတဂၤဧိၤ, (မ့) လၢပသူၣ်ဟးဂီၤသးဟးဂီၤအပူၤဘၣ်ဆၣ်, ကစၢ်ယွၤ ဒုးကပီၤထီၣ် တၢ်သးခုအကစီၣ်လံန့ၣ်လီၤ. ကစၢ်ယ့ၣ်ရှူး စိာ်ထုးထီၣ်ကွံာ်ပှၤလၢ တၢ်ခံး, ဒီးစိာ်ဆှၢနုာ်ပှၤဆူ အတၢ်ကပီၤလီၤလးအပူၤန့ၣ်လီၤ.
