ဖဲ ၁၉၅၉ နံၣ် လါစဲးပထ့ဘၢၣ် ၂၂ သီအဂီၢ် “ကိၣ်လၢတနံၤဘၣ်တနံၤ” တၢ်ဘူၣ်တၢ်ဘါအလံာ် ပာ်ဖျါထီၣ်ဝဲဒၣ် ဒီးကထၢၣ် အဲမ်. အာရ်. ဒံၢ်. ဟဲ(န) (Dr. M. R. Dehaan) အတၢ်ကွဲးတယုၢ်န့ၣ်လီၤ. အဝဲကွဲးပာ်ဖျါ အသးအတၢ်ဆၢမိၢ်န့ၢ် အီၣ်ဘၣ် ခရဲးကၢၣ် ကၠဲး (Cracker Jack) ဘုခ့ချံကဖးအဆၢတဘိၣ်အဂ့ၢ်န့ၣ်လီၤ. အတၢ်ပညိၣ်နီၢ်နီၢ်န့ၣ်, အသးအိၣ် ပာ်ဖျါထီၣ် တၢ်သးဆၢမိၣ်န့ၢ် ကစၢ်ယွၤအကလုၢ်ကထါတဖၣ်အဂ့ၢ်န့ၣ်လီၤ. ဘၣ်ဆၣ်, စှၤနွံအတီၢ်ပူၤန့ၣ် ဒိးန့ၢ်ဝဲဒၣ် ဘုခ့ချံကဖးအဆၢအဘိၣ်တဖၣ်အါဘိၣ် ဟဲတုၤဝဲဆူ အတၢ်မၤလီၢ်အဃိ, ကဲထီၣ်တၢ်ကမၢကမၣ်လၢအဂီၢ်န့ၣ်လီၤ. ဒံၢ်. ဟဲ(န) အသး ဆၢမိၣ်န့ၢ် အီၣ်ဘၣ် ခရဲးကၢၣ် ကၠဲးန့ၣ် လၢထီၣ်ပှဲၤထီၣ်ဝဲဒၣ် ခီဖျိပှၤလၢအဖးအတၢ်ကွဲး ဘၣ်ဃးဒီးသူၣ်ဂ့ၢ်သးကျိၤအဂ့ၢ်, လၢတၢ်သူၣ်တီသးရၤအပူၤတဖၣ်အဃိန့ၣ်လီၤ.

တၢ်ပျဲပျၢ်လဲၤပူၤကွံာ် တၢ်ဟ့ၣ်ညီနုာ် တၢ်ဆၢကတီၢ်လၢ ယွၤအကလုၢ်ကထါန့ၣ်, ထီဘိမ့ၢ်တၢ်အဘီၣ်အညီန့ၣ်လီၤ. လၢတၢ်န့ၣ်အဃိ, အလီၢ်အိၣ်လၢ ပကဘၣ်ဆၢမိၣ်န့ၢ် တၢ်တမံၤမံၤလၢ “အဆၢန့ၢ် ကနဲစီ” (စံး ၁၉:၁၀) န့ၣ်လီၤ. ပှၤကွဲးထါစံးထီၣ်ပတြၢၤ စီၤဒၤဝံး ဟ့ၣ်ဂံၢ်ဟ့ၣ်ဘါပှၤလၢ ပကဘၣ်သ့ၣ်ညါ “ယွၤအတၢ်သိၣ်အတၢ်သီလၢဝဲပှဲၤဝဲ, ဒီးမၤကျၢၤထီၣ်က့ၤပသးလီၤ. ယွၤအတၢ်အုၣ်အသးန့ၣ် မ့ၢ်ဝဲတီဝဲ, ဒီးဒုးကူၣ်သ့ ပှၤလၢအတမၤလိဘၣ်တၢ်ဘၣ်” (:၇) န့ၣ်လီၤ. ဒီးစီၤဒၤဝံး ပာ်ဖျါဆှဲထီၣ်ဝဲလၢ “ယွၤအကလုၢ်အကထါန့ၣ် တီဝဲလိၤဝဲ, ဒီးမၤခုထီၣ်က့ၤပသး” (:၈) န့ၣ်လီၤ.

ဒီးကထၢၣ် ဒံၢ်, ဟဲန် ဟ့ၣ်ဂံၢ်ဟ့ၣ်ဘါ ပှၤဖးတၢ်ဖိတဖၣ်လၢ ကဒုးအိၣ်ထီၣ် တၢ်မၤဘၣ်ထွဲလိာ်သးဒီးယွၤအကလုၢ်အကထါ အလုၢ်အလၢ်, ဒ်တၢ်ဆၢမိၣ်န့ၢ် ဘုခ့ချံကဖး အဝံာ်အဆၢဒိၣ်ဒိၣ်မုၢ်မုၢ်, ကိးမုၢ်နံၤဒဲးအသိးန့ၣ်လီၤ. တၢ်ဒုးအိၣ်ထီၣ် လုၢ်လၢ်တမံၤ, လၢအမ့ၢ် တၢ်ဆိကမိၣ်ကူၣ်ထီၣ်ဖးလီၤ, ဒီးတၢ်ကွၢ်ထံဆိကမိၣ်က့ၤ ကစၢ်ယွၤ အကလုၢ်အကထါ လံာ်စီဆှံ, ဒီးတၢ်အိၣ်မူမၤထွဲ ယွၤအကလုၢ်အကထါ တၢ်မ့ၢ်တၢ်တီ ကိးမုၢ်နံၤဒဲးအဂီၢ်န့ၣ် မ့ၢ်တၢ်အကါဒိၣ်နီၢ်မးလၢပဂီၢ်န့ၣ်လီၤ. ခီဖျိလၢ ကစၢ်ယွၤ အတၢ်မၤစၢၤအပူၤန့ၣ်, မ်ပကလီၤဂာ်ဒီးစီၤဒၤဝံး, လၢအစံးဝဲဒၣ်, “မ်ယထးခိၣ်အတၢ်ကတိၤ, ဒီးယသးအတၢ်ဆိကမိၣ်န့ၣ်, ဘၣ်နသးတက့ၢ်” (:၁၄) န့ၣ်လီၤ.