လဲးထံၣ် (Letty), ပိာ်မုၣ်လၢအမၤကဆှဲကဆှီတၢ်လၢ တၢ်သူၣ်ထီၣ်ဝဲၤလီၢ်တဖျၢၣ်, ဒီးတၢ်သ့ၣ်ညါအီၤလၢ လဲၤတၢ်ဟးတၢ်ချ့, ချ့ဝဲဒိၣ်မးအဃိ လၢတၢ်ဖံးတၢ်မၤအပူၤန့ၣ် ဟးဆှဲကမျၢၢ်တဖၣ်သ့ဝဲ ညီကဒၣ်ဖိန့ၣ်လီၤ. မ့ၢ်လၢတၢ်ဖှီၣ်တၢ်ယာ်အဃိ, အသးဘၣ်ဒိဘၣ်ထံးတ့ၢ်ဝဲဒၣ်, ဒီးညီနုၢ်ထံၣ်လီၤအသး လၢအတီၤအပတီၢ်ဖုၣ်န့ၢ်ပှၤဂၤအဃိ, မၤဘၢအမဲာ် လၢအစုတခီ, ဒီးလဲၤခီဂာ်ဝဲဒၣ်ပှၤဂၤတဖၣ်န့ၣ်လီၤ. အတၢ်မဲာ်ဆှး အိၣ်ဝဲလၢအသးကံၢ်ပူၤဒိၣ်ဒိၣ်ယိာ်ယိာ်အဂ့ၢ်န့ၣ် လဲးထံၣ် ပာ်ဖျါဝဲဒၣ်လၢ အဝဲတမ့ၢ်ဝဲဒၣ် ဒ်ပှၤဂုၤပှၤဂၤ တဖၣ်အသိး, လၢ “အဒိၣ်တၢ်ဂ့ၤဒိၣ်တၢ်ဝါ, ၦၤလၢအသ့လံာ်သ့လဲၢ်” တဂၤအဃိန့ၣ်လီၤ. လၢတၢ်ဖံးတၢ်မၤအပူၤ, ပိာ်မုၣ်တဂၤန့ၣ် စးထီၣ်ရ့လိာ်မုာ်လိာ်အသးဒီးလဲးထံၣ်အဃိ, အသးဘၣ်ဒိဘၣ်ထံးတဖၣ်န့ၣ် ဘၣ်တၢ်မၤဘျါထီၣ်က့ၤဝဲဒၣ်န့ၣ်လီၤ.

ၦၤလၢအလိၤတဂ့ၤတဂၤ ကအိၣ်မူအိၣ်ဂဲၤဘၣ်ဝဲလၢ တၢ်မဲာ်ဆှးဒိၣ်ဒိၣ်ယိာ်ယိာ် အပူၤ, ကဒိၣ်န့ၢ်ဒံး လဲးထံၣ် သ့ၣ်သ့ၣ်န့ၣ်လီၤ. ခီဖျိလၢစီၤမိၤရှ့အတၢ်သိၣ်တၢ်သီ အတီၤအပတီၢ်အဃိ အတၢ်ဆါအၢန့ၣ် ဘၣ်တၢ်ပာ်ပနီၣ်အီၤ ဒ်အမ့ၢ်ပှၤလၢ အတကဆှီတဂၤ, ဒီးလုၢ်လၢ်အိၣ်ဝဲလၢ ကဘၣ်အိၣ်လီၤဖးဒီးကမျၢၢ်, ပှၤတဝၢဖိတဖၣ်န့ၣ်လီၤ. ၦၤတဂၤအံၤအတၢ်ဘၣ်ဒိဘၣ်ထံးန့ၣ် တမ့ၢ်ဝဲဒၣ်ထဲ အနီၢ်ခိဧိၤဘၣ်. မ့မ့ၢ်မၤဘၣ်ဒိဘၣ်ထံးစ့ၢ်ကီးလၢသးသမူ, ဒီးနီၢ်သးန့ၣ်လီၤ. မ့ၢ်လၢအတၢ်ဘၣ်ဒိဘၣ်ထံးအဃိ ၦၤလိၤတဂ့ၤတဂၤအံၤ သုးဘူးအသးဆူ ကစၢ်ခရံာ်အအိၣ်, ဒီးဃ့ကညးဝဲလၢ “နသးမ့ၢ်အိၣ်လၢနကမၤကဆှီထီၣ်က့ၤယၤဒီးႇ နမၤသ့” (မၢ်ကူး ၁:၄ဝ) န့ၣ်လီၤ. ၦၤလိၤတဂ့ၤတဂၤအံၤ စံးဝဲဒၣ်လၢ ‘မၤဘျါထီၣ်က့ၤယၤန့ၣ်’ အခီပညီမ့ၢ်စ့ၢ်ကီး ‘သုးစီကွံာ် ယတၢ်မဲာ်ဆှးတက့ၢ်’ န့ၣ်လီၤ.

ကစၢ်ယ့ၣ်ၡူး မၤဆၢက့ၤအီၤန့ၣ် တမ့ၢ်လၢတၢ်သးဘၣ်အၢအပူၤဘၣ်. မ့မ့ၢ်လၢ တၢ်သးကညီၤအပူၤန့ၣ် “ယူာ်ဃီၤအစု, ဒီးထိးဘၣ်အီၤ, ဒီးစံးဝဲဒၣ်ယသးအိၣ်, မ်နကဆှီထီၣ်က့ၤတက့ၢ်” (:၄၁) န့ၣ်လီၤ. ဒ်ၦၤမၤသကိးတၢ်တဂၤ ယူာ်ဃီၤဝဲ တၢ်ရ့တံၤရ့သကိးလၢ လဲးထံၣ် အအိၣ်အသိးန့ၣ်, ကစၢ်ယ့ၣ်ၡူး စံးဆၢမၤဆၢတၢ်န့ၣ် ပာ်ဖျါထီၣ် ကစၢ်ယ့ၣ်ရှူး ဒ်အမ့ၢ်ၦၤလၢအနၢ်ပၢၢ်တၢ်ခဲလၢာ်တဂၤအံၤ သ့ၣ်ညါနၢ်ပၢၢ်ဝဲဒၣ် ပှၤလိၤတဂ့ၤတဂၤ အသးတူၢ်ဘၣ်ခီၣ်ဘၣ်တၢ်တဖၣ်ခဲလၢာ်န့ၣ်လီၤ.

တၢ်အိၣ်မူလၢ ပပာ်ခူသူၣ် ပသးတူၢ်ဘၣ် တၢ်လၢအမၤလီၤဖးၦၤဒီး “ၦၤဂၤလၢအဒိၣ်တၢ်ဂ့ၤ, လၢအသ့လံာ်သ့လဲၢ်” တဖၣ်န့ၣ် ပကလဲၤခီဖျိဘၣ်သ့ၣ်သ့ၣ်န့ၣ်လီၤ. မ်ပကပျဲကစၢ်ယ့ၣ်ၡူး ကထိးဘၣ်ၦၤ, ဒီးမၤဘျါက့ၤ တၢ်လၢအမၤမဲာ်ဆှးၦၤန့ၣ်တက့ၢ်. ဒ်ပမ့ၢ်ယွၤအဖိတဖၣ်အသိး, မ်ပကသ့ၣ်ညါလၢ ပဘၣ်တၢ်တူၢ်လိာ်ပှၤ, ဒီးအဲၣ်ဘၣ်ၦၤန့ၣ်တက့ၢ်.