ဖဲ ဝ့ၢ်ဝၢ်ရှ့ၣ်တၣ် ဒံၣ်စံၣ် (Washington, DC’s), လဲ(န)ဖဲး ပလၣ်စၢ် (L’Enfant Plaza) အဟီၣ်ခိၣ်လာ် လ့ၣ်မ့ၣ်အူသန့န့ၣ် ၦၤလၢအသိးဃး ၦၤလိာ်ကွဲ ဘ့း(စ)ဘီ (Baseball) အခိၣ်သလုး, ဒီးသိးထီၣ်ဝဲဆ့ကၤ တံၣ်-ရှး (T-shirt) တဂၤ, ဂဲၤဆၢထၢၣ် ဒ့ဝဲဒၣ်သီတူၢ်ကစုဒုန့ၣ်လီၤ. အဝဲဒ့ဖှူးတလ့ၤသီတူၢ်အထးသွဲပျံၤ, ဒီးဒုးဟဲထီၣ်တၢ်သးဝံၣ်အသီၣ်န့ၣ်လီၤ. ဘၣ်ဆၣ်, ၦၤလဲၤတၢ်က့ၤတၢ်ဖိတဖၣ် လဲၤခီဂာ်အီၤ လၢတၢ်တပာ်သူၣ်ပာ်သးအပူၤန့ၣ်လီၤ. အဝဲဒ့ဒုးနဲၣ် တၢ်သးဝံၣ်အတၢ်ရဲၣ်တၢ်ကျဲၤဒီတယုၢ်ညါ, ဒီးပှၤဂဲၤဆၢထၢၣ် အိၣ်ခိးကနၣ်အတၢ်န့ၣ် အိၣ်ဒၣ်စှၤဂၤဖိန့ၣ်လီၤ. ၦၤဂီၢ်မုၢ် မ့ၢ်သ့ၣ်ညါဝဲလၢ အဝဲသ့ၣ်ခီဂာ်လဲၤကပာ် “ကၠီၡူးအၤ ဘဲ(လ)” (Joshua Bell), လၢပစိၤအဆၢကတီၢ်န့ၣ် ၦၤဒ့ဖှူးသီတူၢ်အဂ့ၤကတၢၢ်-စဲၣ်နီၤအကျါတဂၤ, ဒီးလၢအပူၤကွံာ်မုၢ်တနၤန့ၣ်, ဒ့ဖှူးဝဲဒၣ် သီတူၢ်လၢကီၢ်အမဲရကၤ အဘျီၣ်ဒိၣ် လံာ်ရိဖှိၣ် (Library of Congress) တၢ်သူၣ်ထီၣ်အပူၤန့ၣ်ဒီး, လၢအဝဲသ့ၣ်အသးပူၤန့ၣ် တၢ်ကမၤအသးဒ်လဲၣ်. ဘဲ(လ) ဒ့ဖှူးဝဲဒၣ် တၢ်သူၣ်ဝံၣ်သးဆၢ လၢဟီၣ်ခိၣ်ချၢန့ၣ် အကီခဲကတၢၢ်, ဒီးအထုးန့ၢ် ၦၤသူၣ်ၦၤသးအဒိၣ်ကတၢၢ်တဖၣ်န့ၣ်လီၤ. “စထရၣ်ဒံၣ်ဘ့ရံးယၢး” (1713 Stradivarius) သီတူၢ်ဖိလၢ အဒ့ဖှူးဝဲဒၣ်န့ၣ် ဘၣ်တၢ်ထုးထီၣ်အီၤလၢ ၁၇၁၃ နံၣ်, ဒီးအလုၢ်အပှ့ၤ ကအိၣ်ဝဲဒၣ် အမဲရကၤအစ့, ဒီလၣ် ၃.၅ ကကွဲၢ်န့ၣ်လီၤ.

ဒ်သိးပသုတပာ်သူၣ်ပာ်သးႇ လဲၤပူၤခီဂာ်ကွံာ် တၢ်လီၤလးတဖၣ် လၢပမဲာ်ညါန့ၣ် မ့ၢ်တၢ်ညီကဒၣ်ဖိလၢပဂီၢ်န့ၣ်လီၤ. ဖဲ စီၤယၤကိာ် လဲၤဝဲဒၣ်ဆူ ဟၤရၣ် အကတီၢ်, အတၢ်လဲၤခီဖျိ (၁မိၤ ၂၈:၁ဝ) န့ၣ် မ့ၢ်တၢ်မၤအသးဒ်သိးအံၤန့ၣ်လီၤ. ဒ်သိးကအိၣ်ဘှံးအိၣ်သါဝဲဒၣ်အဂီၢ်, စီၤယၤကိာ် ဆိကတီၢ်အတၢ်လဲၤ, ဒီးသူၣ်ထီၣ်အဒဲ, ဖဲတၢ်လီၢ်လၢအတလီၤဆီဒီးတၢ်လီၢ်အဂၤန့ၣ်လီၤ. ဘၣ်ဆၣ်, လၢဖးဖီမုၢ်အတၢ်မံမီၢ်အပူၤန့ၣ် ကစၢ်ယွၤ လီၣ်ဖျါထီၣ်အသး, ဒီးစံးဘၣ်အီၤလၢ “ဒီးကယဲၢ်ၦၤဟီၣ်ခိၣ်အဒူၣ်တဖၣ် ကဘၣ်တၢ်ဆိၣ်ဂ့ၤလၢနၤ, ဒီးလၢနချံနသၣ်အပူၤခဲလၢာ်” (:၁၄) န့ၣ်လီၤ. အဝဲအၢၣ်လီၤစ့ၢ်ကီး, စီၤယၤကိာ်လၢ“ဖဲဒၣ်နလဲၤတၢ်တပူၤလၢ်လၢ်န့ၣ် ယကအံးက့ၤကွၢ်က့ၤနၤ” (:၁၅) န့ၣ်လီၤ. ဒီးစီၤယၤကိာ် ဖုသံနီၣ်ထီၣ်ဒီး, စံးဝဲဒၣ်, “မ့ၢ်မးယွၤအိၣ်ဝဲလၢ တၢ်လီၢ်တပူၤအံၤႇ ဒီးယတသ့ၣ်ညါဘၣ်ယဲဘၣ်” (:၁၆) န့ၣ်လီၤ.

ယွၤအိၣ်ဝဲဒၣ်လၢ တၢ်လီၢ်ကိးပူၤဒဲး, “မၤၦဲၤဟီၣ်ခိၣ်ဒီးမူခိၣ်” (ယံး ၂၃:၂၄) န့ၣ်လီၤ. ယွၤအိၣ်ဝဲလၢ အတမ့ၢ်တၢ်လီၢ်လီၤဆီတဖၣ်န့ၣ်လီၤ. ကစၢ်ယွၤ ကွဲမုာ်ပှၤလၢ ပကအိးထီၣ် ပမဲာ်ချံ, ဒီးပနၢ်တဖၣ်ထီဘိ, ဒ်သိးပကကွၢ်ထီၣ်, ဒီးဒိကနၣ်အီၤအဂီၢ်န့ၣ်လီၤ.