ယတံၤသကိးမုၣ် စဲလံၣ်, လၢယအဲၣ်ဘၣ်အီၤတဂၤ အသးအိၣ်မၤဝဲ အတံၤသကိးတဂၤ အနံၤအိၣ်ဖျဲၣ် မူးသးဖှံအဂီၢ်န့ၣ်လီၤ. စဲလံၣ် သ့ၣ်ညါထွဲဝဲ အတံၤသကိးအံၤ ဘၣ်လဲၤခီဖျိတၢ်ကီတၢ်ခဲအကတီၢ်အဃိ, အဲၣ်ဒိးဟ့ၣ်သဆၣ်ထီၣ် အတံၤသကိးအသးန့ၣ်လီၤ. ဘၣ်ဆၣ်, မ့ၢ်လၢ စဲလံၣ် အတၢ်ဖံးတၢ်မၤတအိၣ်အဃိ, ဒ်သိးကပှ့ၤန့ၢ် တၢ်အီၣ်လၢမူးသးဖှံအဂီၢ်န့ၣ် ကျိာ်စ့တၢ်ဟဲနုာ်လီၤဆီတအိၣ်ဝဲဘၣ်. လၢတၢ်န့ၣ်အဃိ, လၢအထံခုၣ်တလါအပူၤမ့ၢ်ဂ့ၤ, လၢတလါကျိး ဆၢထၢၣ်တဖၣ်အပူၤမ့ၢ်ဂ့ၤ, လူၤကွၢ်ဃုဝဲ တၢ်လၢမၤန့ၢ်ဝဲကသ့တဖၣ်န့ၣ်လီၤ. ဝံၤန့ၣ်ဒီး, ဟံးန့ၢ် တၢ်လၢအပူၤကွံာ် ပှ့ၤတ့ၢ်ဝဲတဖၣ်, ဒီးတၢ်အီၣ်အိၣ်လၢ အဟံၣ်ပူၤတဖၣ်, ဒီးကတဲာ်ကတီၤရဲၣ်ကျဲၤ တၢ်အီၣ်တၢ်အီတဖၣ်န့ၣ်လီၤ.
ဖဲ စဲလံၣ် တဲဘၣ်ယၤ တၢ်ရဲၣ်ကျဲၤဒုးအိၣ်ထီၣ် တၢ်အီၣ်အမံၤစရီအဂ့ၢ်န့ၣ်ဒီး, ယဆိကမိၣ်ထီၣ်ဝဲဒၣ် ဝံအ့ၤလံယၤဒီးမုၣ်ကမဲ လၢစၤရဖၤသး (၁ စီၤ ၁၇:၇-၁၆) တဂၤအဂ့ၢ်န့ၣ်လီၤ. မုၣ်ကမဲတဂၤအံၤ အတၢ်တအိၣ်အါအါဘၣ်. အဝဲဒုးသ့ၣ်ညါ ဝံလၢ ကကတဲာ်ကတီၤန့ၢ် တၢ်အီၣ်လၢခံကတၢၢ်, လၢအနီၢ်ကစၢ်, ဒီးအဖိခွါအဂီၢ်န့ၣ်လီၤ. မ့ၢ်အီၣ်ဝံၤန့ၣ်ဒီး, ကသံဝဲဒၣ် (:၁၂) န့ၣ်လီၤ. လၢတၢ်အီၣ် အကတၢၢ်တဘျီအဂီၢ်, မုၣ်ကမဲအအိၣ်န့ၣ် ကိၣ်ကမူၣ် အိၣ်ဝဲဒၣ် ထဲတစဲးဖိ, ဒီးသိထံတစဲးဖိန့ၣ်လီၤ.
ဘၣ်ဆၣ်, ဝံအ့ၤလံယၤ စံးကတိၤမၤလီၤတံၢ် ပိာ်မုၣ်တဂၤအံၤလၢ “ထံဒၢသ့ၣ် အကိၣ်ကမူၣ်တလၢာ်, ဒီးပလီအသိတစှၤလီၤဘၣ်, တုၤယွၤကမၢတၢ်ဟဲစူၤလၢဟီၣ်ခိၣ်ချၢ” (:၁၄) န့ၣ်လီၤ. မုၣ်ကမဲတဂၤအံၤ သ့ၣ်ညါဝဲလၢ အတၢ်အီၣ်တလၢတလီၢ်ဘၣ်ဆၣ်, တၢ်လၢကစၢ်ယွၤ လီၣ်ဖျါထီၣ်ဝဲဒၣ် ခီဖျိ ဝံအ့ၤလံယၤန့ၣ် မ့ၢ်လၢအတၢ်နာ်န့ၢ်ဝဲအဃိ, ပိာ်မုၣ်တဂၤအံၤ လၢအဖၣ်ကပူၤန့ၣ် တၢ်တအိၣ်နီၤတမံၤဒၣ်လဲာ်, သ့ၣ်ညါနၢ်ပၢၢ်ဝဲလၢ ကစၢ်ယွၤ ကတဲာ်ကတီၤမၤလၢပှဲၤန့ၢ် ကယဲၢ်အတၢ်လိၣ်တဖၣ်ခဲလၢာ်န့ၣ်လီၤ.
ဒ်ယတံၤသကိးမုၣ်အသိး, မုၣ်ကမဲတဂၤအံၤ ဃုထံၣ်န့ၢ် တၢ်လၢအလိၣ်ဘၣ်ဝဲဒၣ်န့ၣ်လီၤ. ပကအိၣ်မူလူၤပိာ်ထွဲ အဝဲသ့ၣ် အတၢ်အိၣ်မူဟ့ၣ်ဒိ, ဒီးမ်ပအိၣ်မူလၢတၢ်သးအိၣ်ဟ့ၣ်ညီတၢ်အပူၤ, ဒီးပကနာ်န့ၢ် ကစၢ်ယွၤ အတၢ်ကတဲာ်ကတီၤမၤလၢပှဲၤ တၢ်လၢ ပဂီၢ်န့ၣ်တက့ၢ်.
