ဖဲ ခါလီးတၣ် (Carlotta) အသးစၢ်ဒံးအကတီၢ်, ဆိကမိၣ်ဝဲလၢ အမိၢ်န့ၣ် အိၣ်ဒီးတၢ်ဟ့ၣ်လီၤဆီ လၢအမ့ၢ်သ့ၣ်ညါနီၣ်ပှၤဂၤတဖၣ်န့ၣ်လီၤ. ဘၣ်ဆၣ်, ခါလီးတၣ် အနီၢ်ကစၢ်ဒၣ်ဝဲန့ၣ် မ့ၢ်ပှၤလီၤဆီတဂၤန့ၣ်လီၤ. အဝဲအိၣ်ဒီး “ပရိၣ်ဆိၣ်ပဲး(က)နိရှါ” (prosopagnosia) လၢတၢ်တမၤအသးညီညီဒီးပှၤကညီအကျါအဃိ, တသ့ၣ်ညါနီၣ် (မ့) တသ့ၣ်နီၣ် ပှၤအမဲာ်သၣ်အက့ၢ်အဂီၤဘၣ်န့ၣ်လီၤ.
ဖဲကစၢ်ယ့ၣ်ရှူး ဂဲၤဆၢထၢၣ်သမူထီၣ်က့ၤဝံၤ တယံာ်ဘၣ်, ပှၤခံဂၤ အိၣ်ဟဲက့ၤလၢဝ့ၢ်ယရူၤရှလ့ၣ်န့ၣ်ဒီး, ဖျါလၢတၢ်မၤအသးတမံၤ, ဖဲအဝဲသ့ၣ် ထံၣ်လိာ်အသးဒီးပှၤလၢအကြၢးသ့ၣ်ညါဝဲတဂၤန့ၣ်လီၤ. ပှၤခံဂၤ စံးကတိၤလိာ်သး အပူၤကွံာ်တၢ်မၤအသး တယံာ်ဒံးဘၣ်အဂ့ၢ် (လူၤ ၂၄:၁၄) ဘၣ်ဆၣ်, ဖျါလၢ ပှၤသၢဂၤတဂၤအံၤ တသ့ၣ်ညါဝဲ တၢ်ဂ့ၢ်တၢ်ကျိၤဒံးဘၣ်န့ၣ်လီၤ. အဝဲသ့ၣ် ဒုးသ့ၣ်ညါအီၤလၢ တၢ်ဂ့ၢ်ဖုၣ်ကိာ်ဝံၤ, ဖဲပှၤလၢအဝဲသ့ၣ် တသ့ၣ်ညါဝဲဒၣ်တဂၤ (ကစၢ်ယ့ၣ်ရှူး) “ဒုးနဲၣ်ဖျါထီၣ်တၢ်ကွဲးအသးခဲလၢာ်ဘၣ်ဃးဒီး အကစၢ်ဒၣ်ဝဲ” (:၂၇) အဂ့ၢ်န့ၣ်ဒီး, အဝဲသ့ၣ်ကမၢကမၣ်ဝဲဒၣ်န့ၣ်လီၤ. ဒီးအဆၢဖိ ၃၀ အပူၤန့ၣ် ကစၢ်ယ့ၣ်ရှူး စိၢ်ဘျဲးဝဲကိၣ်ဒီးအဝဲသ့ၣ်, တၢ်လၢအမၤတ့ၢ်ဝဲတလီၢ်လီၢ်န့ၣ်လီၤ. အကတီၢ်ဖဲန့ၣ် အဆၢဖိ ၃၁ စံးဘၣ်ပှၤလၢ “အဝဲသ့ၣ်အမဲာ်အိးထီၣ်အသး, ဒီးသ့ၣ်ညါအီၤလီၤ. ဒီးအဝဲဒၣ် သုးတဒၢကွံာ်အသးလၢအီၤ” န့ၣ်လီၤ. ဒ်သိးကဒုးသ့ၣ်ညါဝဲ အပျဲၢ်အဘီၣ်အဂၤတဖၣ်အဂီၢ်, ပှၤခံဂၤန့ၣ် က့ၤက့ၤဝဲအဆိအချ့ဆူ ဝ့ၢ်ယရူၤရှလ့ၣ် (:၃၃-၃၅) န့ၣ်လီၤ.
ဖဲအပျဲၢ်အဘီၣ်တဖၣ်အိၣ်ဒီးကစၢ်ယ့ၣ်ရှူးအကတီၢ်န့ၣ် တသ့ၣ်ညါနီၣ်ဝဲဒၣ်အကစၢ်ဘၣ်. ဒီးကစၢ်ယ့ၣ်ရှူး မ့ၢ်ပှၤလၢ လံာ်စီဆှံ အလီၢ်လံၤတကတြူၢ်- လံာ်လၢ အဝဲသ့ၣ် ဖးဝဲတလီၢ်လီၢ်, ဒီးသ့ၣ်ညါဝဲဂ့ၤဂ့ၤဘၣ်ဘၣ်တဘ့ၣ် ပာ်ဖျါထီၣ်ဝဲတဂၤလီၤန့ၣ် အဝဲသ့ၣ်တသ့ၣ်ညါနီၣ်အီၤဘၣ်. မ့ၢ်လၢအဝဲသ့ၣ် အနီၢ်ကစၢ်ဒၣ်ဝဲ ကထံၣ်သ့ၣ်ညါကစၢ်ယ့ၣ်ရှူးန့ၣ် တသ့ဝဲဒၣ်အဃိ, အပျဲၢ်အဘီၣ်တဖၣ်န့ၣ် လိၣ်ဘၣ်ဝဲလၢ ကစၢ်ယ့ၣ်ရှူးကလီၣ်ဖျါထီၣ်အသးန့ၣ်လီၤ.
ပဝဲစ့ၢ်ကီး ပလိၣ်ဘၣ်တၢ်မၤစၢၤဒ်သိးအံၤန့ၣ်လီၤ. မ်ပကဃ့သကိး ကစၢ်ယွၤလၢကအိးထီၣ်ပမဲာ်ချံအတၢ်ထံၣ်, ဒ်သိးဒီးပကထံၣ် ကစၢ်ယ့ၣ်ရှူး လၢလံာ်စီဆှံအလံာ်ကဘျံးတဖၣ်အပူၤ, ဒီးလၢပတၢ်အိၣ်မူအပူၤအဂီၢ်န့ၣ်တက့ၢ်.