တချုးလၢတၢ်ကိၢ်ခါအကတီၢ်လဲၤပူၤကွံာ်ဝဲန့ၣ် မူခိၣ်ကလံၤသီၣ်ဂီၤအၢသီ နုာ်လီၤအူ မၤဘၣ်ဒိဘၣ်ထံးတၢ်လၢပဝ့ၢ်ဖိအံၤဝံၤန့ၣ်ဒီး, မ့ၢ်လၢသ့ၣ်ဖးဒိၣ်အဒ့တဖၣ် မၤဟးဂီၤ ပဟံၣ်အဃိ, ပတၢ်ဖံးတၢ်မၤအါလၢ ပဘၣ်ဘှီဂ့ၤထီၣ်က့ၤအီၤ, တကးဒ်ဘၣ်န့ၣ်, သ့ၣ်လၣ်သ့ၣ်ဒ့တဖၣ် လီၤပြံလီၤပြါဝဲလၢ ပကရၢၢ်အပူၤတဖၣ်စ့ၢ်ကီး, ပဘၣ်မၤကဆှဲကဆှီဝဲဒၣ်န့ၣ်လီၤ. လၢခံတနံၤ, ဖဲယဘှီဂ့ၤက့ၤ တၢ်လၢအဟးဂီၤ, ဒီးမၤကဆှဲကဆှီ တၢ်ဘၣ်အၢဘၣ်သီ, ဒီးသ့ၣ်ကူာ်လံာ်ကူာ်လာ် အတၢ်ကမှံၤကမှိာ်တဖၣ်အကတီၢ်န့ၣ် ယမၤနံၤမၤအ့လီၤက့ၤ ယသးဒၣ်ယဲ, ဒီးယစံးကတိၤထီၣ် “ပတအိၣ်ဒီးသ့ၣ်နီတထူၣ်ဘၣ်” တလီၢ်လီၢ်န့ၣ်လီၤ.တၢ်န့ၣ်မ့ၢ်ဝဲတီဝဲလီၤ. လၢပကရၢၢ်ပူၤန့ၣ် အိၣ်ဒၣ်ထဲ သ့ၣ်ဆှိအမုၢ် အထီသၢခီၣ်ယီၣ် ဆံးဆံးဖိသၢမုၢ်, ဒီးသ့ၣ်အမုၢ်ဖးဒိၣ်ဖးထီတဖၣ်န့ၣ်တအိၣ်ဘၣ်. ဘၣ်ဆၣ်, ဖဲကလံၤမုၢ်လီၤဝံၤ, ပှၤအိၣ်ဆိးလၢ ပခိၣ်ပဃၢၤတဖၣ်အသ့ၣ်လၣ်သ့ၣ်ဒ့ လၢပကရၢၢ်ပူၤတဖၣ်န့ၣ် တၢ်ကမၤကဆှဲကဆှီအီၤအဂီၢ်, ယဘၣ်ဟ့ၣ် တၢ်ဆၢကတီၢ်တစှၤဘၣ်န့ၣ်လီၤ.

ပှၤအိၣ်ဆိးလၢပခိၣ်ပဃၢၤတဖၣ်- ဖဲအဝဲသ့ၣ်မၤတ့ၢ်ပှၤတၢ်တမံၤမံၤ, (မ့) သူၣ်လီၤတၢ် (မ့) စံးကတိၤမၤတံာ်တာ်ပသးမ့ၢ်ဂ့ၤဒၣ်လဲာ်, ပတၢ်ရ့လိာ်ဘၣ်ထွဲလိာ်သးဒီးအဝဲသ့ၣ်န့ၣ် ကမ့ၢ်တၢ်ဒ်လဲၣ်. ဘၣ်ဃးဒီး “အဲၣ်ပှၤလၢနဃၢၤဒ်နအဲၣ်လီၤနသးဒၣ်နဲအသိး” န့ၣ် ကစၢ်ယွၤ အကလုာ်ကထါ ပာ်ဖျါဝဲဖျိဖျိဖျါဖျါခွံဘျီန့ၣ် ပကထံၣ်ဘၣ်ဖဲ ၃ မိၤရှ့ ၁၉:၁၈, မးသဲ ၁၉:၁၉, မၢ်ကူး ၁၂:၃၁, ကလၤ ၅:၁၄, ဒီး ယၤကိာ် ၂:၈ တဖၣ်အပူၤန့ၣ်လီၤ. နီၢ်နီၢ်န့ၣ်, တၢ်မၤလိာ်အံၤ မ့ၢ်တၢ်မၤလိာ်အဒိၣ်ကတၢၢ်ခံထံၣ်အကျါတထံၣ်, လၢယွၤဟ့ၣ်ပှၤန့ၣ်လီၤ. အခီၣ်ထံးတထံၣ်မ့ၢ်ဝဲ, “အဲၣ်ယွၤနကစၢ်လၢ နသူၣ်ကံၢ်နသးလဲ, ဒီးနသးဒီဖျၢၣ်ညါ, ဒီးနတၢ်ကူၣ် တၢ်ဆးတုၤအလၢာ်, ဒီးနဂံၢ်နဘါခဲလၢာ်တက့ၢ်” (လူၤ ၁၀:၂၇) န့ၣ်လီၤ. ပကဒုးနဲၣ်ပာ်ဖျါ “တၢ်အဲၣ်ပှၤလၢပဃၢၤ” အဂီၢ်, တၢ်လၢအကါဒိၣ်တဖၣ်အကျါတမံၤန့ၣ် မ့ၢ်ဒၣ်ပတၢ်ရ့လိာ်ဘၣ်ထွဲလိာ်သးဒီးအဝဲသ့ၣ်ဒ်လဲၣ်န့ၣ်လီၤ. ယၤကိာ် ၁:၁၉ န့ၣ် စီၤယၤကိာ် ဒုးနၢ်ပၢၢ်ပှၤလၢ, “နၢ်ဟူတၢ်ချ့သဒံး, ကတိာ်တၢ်နီၢ်ကတုၤ, သးထီၣ် နီၢ်ကတုၤကိးဂၤဒဲးတက့ၢ်” န့ၣ်လီၤ.

ပကအဲၣ်ပှၤလၢပဃၢၤ, ထီဘိန့ၣ်တမ့ၢ်တၢ်လၢအညီဘၣ်. ထီဒါလိာ်အသးဒီးပန့ဆၢၣ် အဃိန့ၣ်လီၤ. ဘၣ်ဆၣ်, တၢ်အဲၣ်ပှၤလၢပဃၢၤန့ၣ် မ့ၢ် တၢ်လၢပကဘၣ်စံးဆၢ, မၤဆၢအဆိကတၢၢ်န့ၣ်လီၤ. ဒ်ယွၤမၤစၢၤ ပှၤအသိး မ်ပကပီၤထီၣ် ကစၢ်ယ့ၣ်ရှူး အတၢ်အဲၣ်အတၢ်ကပီၤဆူ ပှၤအိၣ်မူအိၣ်ဂဲၤသကိးဒီးပှၤ- ပှၤလၢပဃၢၤတဖၣ်န့ၣ်တက့ၢ်.