ဖဲအဘံၤက့ (Abigail) အမိၢ်ဒီးအပၢ်ခံဂၤန့ၣ် လၢတၢ်လီၤသးအုးအပူၤ, သံဝဲဒၣ်လၢ သိလ့ၣ်အတၢ်ဘၣ်ဒိဘၣ်ထံးဝံၤ, န့ၢ်ဘၣ်သါဝဲ တၢ်ကွဲးနီၣ်လံာ်ဒၢတဖျၢၣ်, ဘၣ်ဃးဒီးတၢ်စုလီၢ်ခီၣ်ခိၣ်အါအါဂီၢ်ဂီၢ်န့ၣ်လီၤ. အဝဲသ့ၣ်ညါထွဲစ့ၢ်ကီးဝဲလၢ အမိၢ်အပၢ်သုးကျဲၤပာ်တ့ၢ်ဝဲလၢ ခိပနံၣ်လၢအပၢၤတၢ်အစုပူၤန့ၣ်လီၤ. တချုးလၢအဝဲဒိၣ်တုာ်ခိၣ်ပှဲၤဒံးဘၣ်န့ၣ်, ကဒိးန့ၢ် ကျိၣ်စ့လၢ ကစူးကါဝဲ တၢ်ထီၣ်ခီလ့ၣ်ကၠိအတၢ်လၢာ်ဘူၣ်လၢာ်စ့ၤအဂီၢ်န့ၣ်လီၤ. တၢ်လၢအိၣ်လီၤတဲာ်တ့ၢ်တဖၣ်န့ၣ် ဖဲအဝဲဒိၣ်တုာ်ခိၣ်ပှဲၤအကတီၢ်မး ကဒိးန့ၢ်ဝဲန့ၣ်လီၤ. အဘံၤက့ အသးဟးဂီၤဘၣ်ဆၣ်, လၢခံန့ၣ် နၢ်ပၢၢ်ထွဲဝဲဒၣ် အမိၢ်အပၢ် အတၢ်ကူၣ်သ့လၢတၢ်ကူၣ်ထီၣ်ဖးလီၤ ဟ့ၣ်လီၤအီၤ အတၢ်န့ၢ်သါတဖၣ်အဃိန့ၣ်လီၤ.

ဖဲကလၤတံ ၄ အပူၤန့ၣ် စီၤပီလူး ဟ့ၣ်ဒိဝဲ တၢ်မၤအသးတမံၤဃီ, လၢအဒုးနဲၣ်ပှၤအံၣ်စရ့လးဖိတဖၣ် အတၢ်အိၣ်အသး, ဒ်အစံးတ့ၢ်ဝဲအသိး, ကမ့ၢ်ပှၤတကလုာ်လၢကန့ၢ်ဘၣ်သါ ကစၢ်ယွၤ အတၢ်အၢၣ်လီၤအီလီၤဒီးစီၤအၤဘြၤဟၣ်န့ၣ်လီၤ. ၁ မိၤ ၁၇:၁-၁၄ န့ၣ် ပကထံၣ်ဘၣ် ကစၢ်ယွၤ မၤတၢ်အၢၣ်လီၤအီလီၤဒီးစီၤအၤဘြၤဟၣ်, ဒ်သိးကဆိၣ်ဂ့ၤအီၤ, ဒီးတၢ်ဒိးကူးတရံးန့ၣ် ကမ့ၢ်ဝဲ တၢ်အၢၣ်လီၤအီလီၤ အတၢ်ပနီၣ်န့ၣ်လီၤ. ဘၣ်ဆၣ်, တၢ်ပနီၣ်န့ၣ် တမ့ၢ်ဝဲယွၤအတၢ်အၢၣ်လီၤဘၣ်. စီၤအၤဘြၤဟၣ် အစၢၤအသွဲၣ်တဖၣ် ကဘၣ်အိၣ်ခိးဝဲ ခါဆူညါစၢၤသွဲၣ်သီတဂၤ လၢအကမၤလၢပှဲၤ ယွၤအတၢ်အၢၣ်လီၤန့ၣ်လီၤ. ကလၤ ၄:၄-၅ ပာ်ဖျါဝဲ စီၤအံၤစဲး အိၣ်ဖျဲၣ်ထီၣ်, ဒီးနဲၣ်ဝဲ ဖိခွါလၢ ခါဆူညါကအိၣ်ဖျဲၣ်ထီၣ်တဂၤ, ဒ်သိးကပှ့ၤက့ၤယွၤအပှၤဂီၢ်မုၢ်န့ၣ်လီၤ.

ဒ်အဘံၤက့အသိး, အဆၢဖိ ၂ ပာ်ဖျါဝဲလၢ ပှၤအံၣ်စရ့လးဖိတဖၣ် ကအိၣ်ခိးဝဲတုၤ “အမုၢ်အလါလၢအပၢ်စံၣ်ညီၣ်ပာ်ဝဲ” န့ၣ်လီၤ. အကတီၢ်ဖဲန့ၣ်မး ပှၤအံၣ်စရ့လးဖိတဖၣ် ကဒိးန့ၢ် အတၢ်န့ၢ်သါအလၢအပှဲၤန့ၣ်လီၤ. တၢ်လၢအဝဲသ့ၣ်အဲၣ်ဒိးမၤန့ၢ်ဝဲတကီၢ်ခါန့ၣ်, ကဟဲတုၤဃီၤဝဲ ဘၣ်ဆၢဘၣ်ကတီၢ်, ဖဲကစၢ်ယ့ၣ်ရှူးသံဝံၤ ဘၣ်တၢ်ခူၣ်လီၤအီၤ, ဒီးဂဲၤဆၢထၢၣ်သမူထီၣ်က့ၤဝဲအကတီၢ်န့ၣ်လီၤ. ကယဲၢ်ပှၤကိးဂၤဒဲးလၢ အစူၢ်က့ၤနာ်က့ၤကစၢ်ခရံာ်တဖၣ်န့ၣ် တမ့ၢ်တၢ်ဒဲးဘးအကုၢ်လၢၤဘၣ်. အဆၢဖိ ၇ ပာ်ဖျါဝဲလၢ “မ့ၢ်ယွၤအဖိခွါ” န့ၣ်လီၤ. တၢ်ဒုးအိၣ်ထီၣ် တၢ်အၢၣ်လီၤအီလီၤအသီလံန့ၣ်လီၤ. ပကလဲၤဆူ ကစၢ်ယွၤအအိၣ်သ့လံန့ၣ်လီၤ. ဒ်သိးအဆၢဖိ ၆ ပာ်ဖျါဝဲအသိး, ပကိးကစၢ်ယွၤလၢ “အးဘၤ, ပၢ်ဧၢ” သ့လံန့ၣ်လီၤ.