အပူၤကွံာ်နံၣ်တဖၣ်န့ၣ်, တၢ်ဃုမၤလိနၢ်ပၢၢ် ပှၤသးစၢ်အတၢ်သးအုးသးဟးဂီၤအတၢ်ဆါ, ဒီးတနၤဘၣ်တနၤ ပှၤသးစၢ်တဖၣ် မံဝဲတၢ်ဆၢကတီၢ်န့ၢ်ထဲလဲၣ်, တၢ်ဂ့ၢ်ခံမံၤ အဘၢၣ်စၢၤ တၢ်ဘၣ်ထွဲလိာ်သးန့ၣ်လီၤ. ပိာ်မုၣ်သးစၢ်တဂၤ ဖးကွၢ်တၢ်ဃုမၤလိနၢ်ပၢၢ် တမံၤအံၤ အတၢ်ဃုထံၣ်န့ၢ်သ့ၣ်တဖၣ်ဝံၤ, ဟ့ၣ်ထီၣ်အတၢ်ထံၣ်လၢ “ယကဘၣ်ဆိကတီၢ် ဖဲတၢ်ဆၢကတီၢ်မတၤလဲၣ်န့ၣ် ဖျါလၢယတသ့ၣ်ညါတ့ၢ်ယဲနီတဘျီဘၣ်. ယမၢဆူၣ်ယသးဒီးအကတၢၢ်န့ၣ်, မ့ၢ်လၢယမံတလၢမံအဃိ, ယအိၣ်တမုာ်, ဒီးဒိးန့ၢ်ယဲတၢ်သးအုးသးဟးဂီၤသးအတၢ်ဆါ” န့ၣ်လီၤ. ဒီးစံးဝဲဒၣ်လၢ အဲၣ်ဒိးသ့ၣ်ညါ တၢ်သုးကျဲၤတၢ်ဆၢကတီၢ် အခီပညီနီၢ်နီၢ် လၢကမၤလၤကပီၤယွၤအဂီၢ်န့ၣ်လီၤ. လၢတၢ်ဖံးတၢ်မၤအါတလၢ, ဒီးတၢ်ကဲဘျုးကဲဖှိၣ်အဘၢၣ်စၢၤ အတၢ်လီၤဆီန့ၣ် ကမ့ၢ်တၢ်မနုၤလဲၣ်.
တၢ်ဖံးတၢ်မၤအါတလၢန့ၣ် တအၢၣ်လီၤပှၤလၢ တၢ်ကဲထီၣ်လိၣ်ထီၣ်, တၢ်နာ်န့ၢ်အီၤသ့, တၢ်ကဘၣ်ဘျုးဘၣ်ဖှိၣ်အဂီၢ်ဘၣ်. ဘၣ်ဆၣ်, ပကထံၣ်ဝဲဒၣ်ထဲလၢ ပတၢ်ဖံးတၢ်မၤအါန့ၣ် ကမ့ၢ်တၢ်အကါဒိၣ်ကတၢၢ်လၢပဂီၢ်န့ၣ်လီၤ. ဖဲ လူၤ၁၀:၄၁ န့ၣ်, ကစၢ်ယ့ၣ်ရှူး ဒုးသ့ၣ်နီၣ်ထီၣ်က့ၤ နီၢ်မၢ်သၤ ကပုာ်လုးဖိ, ခီဖျိလၢအဝဲ “ဘၣ်ယိၣ်တၢ်ဒီးသးကိၢ်တၢ် လၢတၢ်အါမံၤအဃိ,” ဒီးအဆၢဖိ ၃၉ န့ၣ် အဒ့မုၣ် နီၢ်မၤရံ ဃုထၢဆ့ၣ်နီၤ “လၢကစၢ်အခီၣ်ထံး,” ဒ်လၢအပျဲၢ်အဘီၣ်သကဲးပဝးက့ၢ်ဂီၤတမံၤအသိး- ကမ့ၢ်တၢ်ဃုထၢအဂ့ၤကတၢၢ်န့ၣ်လီၤ.
ပသးလၢအဆၢမၤ ကစၢ်ခရံာ်အတၢ်မၤန့ၣ်ဒီး, ပဆိကမိၣ်လၢ ပမ့ၢ်မၤတၢ်အါအါကလဲာ်န့ၣ် ကစၢ်ကသ့ၣ်ညါနီၣ်အါထီၣ်ပှၤသ့ၣ်သ့ၣ်အဃိ, မ့ၢ်ပမၤဘၣ်တၢ်အါတလၢလံဧၣ်. ကလီး ၃:၁၇ စံးဘၣ်ပှၤ “ကယဲၢ်သုမၤတၢ်န့ၣ်, လၢတၢ်ကတိၤမ့ၢ်ဂ့ၤ, လၢတၢ်မၤမ့ၢ်ဂ့ၤ, မၤတၢ်ခဲလၢာ်လၢ ကစၢ်ယ့ၣ်ရှူးအမံၤ” န့ၣ်လီၤ. ဘၣ်ဆၣ်, လံာ်စီဆှံတတီၤအံၤ တစံးဘၣ်ပှၤလၢ ပကဘၣ်ဖံးတၢ်မၤတၢ်အါတလၢကွံာ်တၢ်လၢ ကစၢ်အမံၤအပူၤန့ၣ်ဘၣ်. စံး ၄၆:၁၀ န့ၣ် ပကနၢ်ဟူဘၣ် တၢ်လၢအဒုးသ့ၣ်နီၣ်ထီၣ်က့ၤပှၤ “အိၣ်ဃိကလာ်, ဒီးသ့ၣ်ညါလၢယမ့ၢ်ယွၤတက့ၢ်” န့ၣ်လီၤ.
ပတၢ်သးစဲထဲလၢပတၢ်ဖံးတၢ်မၤအစရီ လၢပကမၤတမံၤဧိၤအလီၢ်န့ၣ်, ပကမၤစှၤလီၤပတၢ်ဖံးတၢ်မၤ, ဒီးရ့လိာ်ပသးဒီးကစၢ်ခရံာ်အဂီၢ်, မ်ပကဟံးန့ၢ်သကိးတၢ်ဆၢကတီၢ်န့ၣ်တက့ၢ်. ဒ် မး ၁၁:၂၉ ပာ်ဖျါဝဲအသိး, ပကဃုထံၣ်န့ၢ် “တၢ်အိၣ်ဘှံးလၢပသးအဂီၢ်” ကသ့ဝဲဒၣ်န့ၣ်လီၤ.
