ဖဲယဂဲၤဆၢထၢၣ် ကွၢ်ကီ နဲၣ်အၣ်ကရၢ် (Niagara) ထံလီၤဆူ အတၢ်လီၤလိၣ်လီၤလး အစိကမီၤအကတီၢ်န့ၣ်, ယပာ်သူၣ်ပာ်သးလၢ ပှၤဟဲဟးလိာ်ကွဲကွၢ်ကီတၢ်တဖၣ် စးထီၣ်ဒိတၢ်ဂီၤ သတူၢ်ကလာ်န့ၣ်လီၤ. ယကွၢ်ဃီၤဆူ တၢ်လီၢ်လၢ အဝဲသ့ၣ်ကွၢ်ဝဲတတီၤန့ၣ်ဒီး, ယထံၣ် တၢၢ်ကွဲၤတထံၣ် ဟဲအိၣ်ဖျါထီၣ်, ဒီးအိၣ်ကဝီၤဃာ်ဝဲ ထံကျိအဖီခိၣ်န့ၣ်လီၤ. တၢၢ်ကွဲၤ အတၢ်ဟဲဖျါထီၣ်ဝဲန့ၣ် စးထီၣ်လၢ ကသ့ၣ်အခီၣ်မ့ၣ် ထးကွီၤ အထံလီၤဆူ (Horseshoe Falls) အခီၣ်ထံး, ဒီးကတၢၢ်ဝဲဖဲ အမဲရကၤ အထံလီၤဆူ အခီၣ်ထံးန့ၣ်လီၤ.

တၢ်လၢတၢၢ်ကွဲၤစံးတၢ်နီၢ်နီၢ်န့ၣ်, အကတၢၢ်တအိၣ်ဘၣ်. တၢၢ်ကွဲၤလၢ ယထံၣ်ဘၣ်တ့ၢ်လံထဲတဘျီဧိၤန့ၣ်, မ့ၢ်တၢ်အကဝီၤအလၢအပှဲၤန့ၣ်လီၤ. ဘၣ်တဘျီန့ၣ်, ဖဲယကွၢ်လီၤတၢ်ဆူ ကဘီယူၤအပဲတြီဖိ, ဒီးလၢတၢ်ချၢတၢ်လီၢ်အယံၤ, တၢ်အၢၣ်အဖီခိၣ်န့ၣ် မုၢ်အတၢ်ကပီၤဆဲးလီၤဘၣ် အကျိၤအကျဲလိၤလိၤဘၣ်ဘၣ်အကတီၢ်ဖိန့ၣ်, ယထံၣ်ဘၣ် တၢၢ်ကွဲၤအလၢအပှဲၤ အိၣ်ဖျါထီၣ်ဒီတကွီၤန့ၣ်လီၤ. တုၤကဘီယူၤအတၢ်လဲၤကျဲ ဆီတလဲအသး, ဒီးတၢၢၢ်ကွဲၤလီၤမၢ်ဝဲအကတီၢ်, ယဆ့ၣ်နီၤကွၢ်ကီအီၤလၢ တၢ်ဘၣ်သူၣ်ဘၣ်သးဒိၣ်ဒိၣ်မုၢ်မုၢ်အပူၤန့ၣ်လီၤ.

တၢၢ်ကွဲအံၤ ဟ့ၣ်ယၤတၢ်လၢယကဘၣ်ဆိကမိၣ်ထီၣ်တဖၣ်အါမး, တၢ်လၢအမ့ၢ် ကစၢ်ယွၤ တအိၣ်ဒီး တၢ်အခီၣ်ထံးဒီးတၢ်အကတၢၢ် စံးတၢ်န့ၣ်, ကမ့ၢ်ဝဲဒ်လဲၣ်. ဖဲပကအိၣ်ဒၣ်ဝဲ တပူၤလၢ်လၢ်န့ၣ်, ကစၢ်ယွၤ လီၣ်ဖျါထီၣ်ဝဲ အတၢ်အၢၣ်လီၤတဖၣ်ဆူပအိၣ်န့ၣ်လီၤ. ၁ မိၤ ၉ :၁၃ ပာ်ဖျါဝဲ, ပကစၢ်ယွၤ အထူအယိာ်, ဒီးအကတၢၢ်တအိၣ်တဂၤန့ၣ် “ပာ်အချံၣ်လၢတၢ်အၢၣ်အလိၤ,” ဒီး အဆၢဖိ ၁၅ စံးဘၣ်ပှၤ ဒ်အမ့ၢ်တၢ်အၢၣ်လီၤ, ဒ်သိးကမၤဟးဂီၤတၢ်သးသမူခဲလၢာ်အဂီၢ်, အတဒုးလုၣ်ဘၢဟီၣ်ခိၣ်လၢထံလၢၤဘၣ်န့ၣ်လီၤ. ဒ်အဆၢဖိ ၁၃-၁၆ ပာ်ဖျါဝဲအသိး, တုၤမဆါတနံၤအံၤဒၣ်လဲာ်, ပတၢ်ဘၣ်တ့အကစၢ် ခီဟ့ၣ်နီၤလီၤ အတၢ်ဒုးသ့ၣ်နီၣ်ထီၣ်က့ၤအတၢ်အၢၣ်လီၤ, ဆူပအိၣ်, လၢအမ့ၢ်အတၢ်ဘၣ်တ့တဖၣ်န့ၣ်လီၤ.

ယရှါယၤ ၄၀ :၂၈ စံးဘၣ်ပှၤလၢ, “ယွၤမ့ၢ်ကစၢ်အထူအယိာ်, တၢ်တ့လီၤ ဟီၣ်ခိၣ်အကတၢၢ်တဖၣ် ……… အသူၣ်ဆးအသးဆးန့ၣ် ပှၤဃုတဘၣ်ဘၣ်” န့ၣ်လီၤ. တၢ်ထံၣ်ဆိကမိၣ်အံၤ လီၤလးဒိၣ်မးန့ၣ်လီၤ. ဒ်သိးပကမၤလိန့ၢ် ကစၢ်ယွၤလၢ အဟံးဃာ်ပၢၤဃာ် အတၢ်အၢၣ်လီၤတဂၤအဂ့ၢ်န့ၣ် ပအိၣ်ဒီး အကတီၢ်အထူအယိာ်, ဒီးကစၢ်ယွၤအတၢ်သ့ၣ်ညါအဒိၣ်အယိာ်န့ၣ် တမ့ၢ်ပကတုၤထီၣ်ဘးနီတဘျီလၢၤဘၣ်န့ၣ်လီၤ.