ကၠီ ဒဲနယဲၣ် (John Daniels) စံးကတိၤဝဲ အတၢ်ကတိၤ လၢခံကတၢၢ်အကတီၢ်န့ၣ် မ့ၢ်ဝဲ, “သ့ၣ်ညါလၢ ကစၢ်ယ့ၣ်ၡူးအဲၣ်နၤလီၤ. အဝဲအဲၣ်နၤနီၢ်နီၢ်န့ၣ်လီၤ.” ဖဲအဟ့ၣ်လီၤ ကျိၣ်စ့ဆူ ၦၤဟံၣ်ဃီတအိၣ်တဂၤ, ဒီးတဲဝဲတၢ်ကတိၤတဖၣ်အံၤဝံၤ, စဲးကီာ်ဖိအတီၢ်ပူၤန့ၣ်, သိလ့ၣ် ဘျၢၣ်ဘၣ်အီၤအဃိ, သံဝဲတကီၢ်ခါန့ၣ်လီၤ. ဖဲတၢ်မၤလၤကပီၤ ကၠီ အသးသမူ တၢ်ဘူၣ်တၢ်ဘါ အတၢ်ရဲၣ်တၢ်ကျဲၤအပူၤန့ၣ် ပာ်ဃုာ်ဒီးတၢ်ကတိၤ, “ဒ်သိးကလဲၤတုၤဃီၤၦၤတဂၤဂၤ ကသ့ဝဲဒ်လဲၣ်န့ၣ် အဝဲအဲၣ်ဒိးဃုသ့ၣ်ညါဝဲအဃိ, လၢမုၢ်အိၣ်ဘှံးနံၤ မုၢ်ဆါခီအကတီၢ်န့ၣ်, ကျဲးစၢးမၤစၢၤဝဲ ၦၤလၢအလိၣ်ဘၣ်တၢ်မၤစၢၤန့ၣ်ဒီး, ယွၤဟ့ၣ်အီၤကျိၤကျဲလၢ ကလဲၤတုၤဃီၤဆူဟီၣ်ခိၣ်အဂီၢ်” န့ၣ်လီၤ. လီၢ်ကဝီၤ ကွဲၤထံၣ်ဟူ အတၢ်ရဲၣ်တၢ်ကျဲၤတဖၣ်ခဲလၢာ်န့ၣ် ပာ်ဖျါထီၣ်ဝဲတၢ်ကစီၣ်အံၤအဃိ, တၢ်ကစီၣ်အံၤ လဲၤတုၤဆူ တံၤသကိးတဖၣ်, ဟံၣ်ဖိဃီဖိ, ဒီးဆူၦၤဂုၤၦၤဂၤလၢ ထံကီၢ်ဒီတဘ့ၣ်” န့ၣ်လီၤ.

ကၠီ ဒဲနယဲၣ် န့ၣ် တမ့ၢ်ဝဲဒၣ်ၦၤစံၣ်တဲၤတဲလီၤတၢ်တဂၤဘၣ်ဆၣ်, တၢ်မၤဆူၣ်သဆၣ်ထီၣ်အီၤလၢ ကစံးဘၣ်တဲဘၣ်ၦၤဂၤလၢ ကစၢ်ယ့ၣ်ရှူးအဂ့ၢ်န့ၣ်လီၤ. စီၤပီလူး စ့ၢ်ကီးတၢ်မၤ အသးဒီးအီၤဒ်သိးအံၤန့ၣ်လီၤ. လံာ်မၤတၢ် ၂ဝ အပူၤန့ၣ်, ပှၤတၢ်မၢဖိ ပာ်ဖျါဝဲ အတၢ်သးဆူၣ်သးဂဲၤ လၢတၢ်သးခုကစီၣ်အဂီၢ်, ဖဲ အဆၢဖိ ၂၄ န့ၣ် စံးကတိၤကျၢၢ်တံၢ်ဝဲဆူ အ့းဖ့းစူးအတၢ်အိၣ်ဖှိၣ်ခိၣ်နၢ်တဖၣ်အအိၣ်, “ယကမၤဝံၤယတၢ်ဃ့ၢ် အိၣ်ဒီးတၢ်သးခုႇ ဒီးတၢ်အခ့အၦၤအတၢ်မၤလၢ ယဒိးန့ၢ်လၢ ကစၢ်ယ့ၣ်ၡူးခရံာ်, လၢယကအုၣ်ယသးလီၤတံၢ်လီၤဆဲးလၢယွၤအဘျုးအဖှိၣ် အတၢ်သးခုကစီၣ်န့ၣ်အဂ့ၢ်လီၤ.”

တၢ်သးခုကစီၣ်ဘၣ်ဃးဒီး တၢ်ပျၢ်တၢ်ဒဲးဘး, ဒီးတၢ်အိၣ်မူအသီလၢကစၢ်ခရံာ်အပူၤ အဂ့ၢ်န့ၣ် ဂ့ၤဒိၣ်ဝဲအဃိ, ပကစံးဘၣ်တဲဘၣ်ၦၤဂၤန့ၣ် ပအိၣ်တသ့ဘၣ်န့ၣ်လီၤ. ၦၤစူၢ်က့ၤနာ်က့ၤတၢ်တနီၤ ကစံၣ်တဲာ်တဲလီၤဝဲ တၢ်သးခုကစီၣ်အဂ့ၢ်အဂီၢ်န့ၣ် အတၢ်သ့တၢ်ဘၣ်အိၣ်အါန့ၢ်ဒံးၦၤဂၤန့ၣ်လီၤ. ဘၣ်ဆၣ်, ခီဖျိလၢသးစီဆှံကစၢ်အတၢ်မၤစၢၤန့ၣ်, ကယဲၢ်ၦၤကိးဂၤဒဲးလၢအလဲၤခီဖျိကလၢၢ်ဘၣ် သးသမူအတၢ်ဆီတလဲ အစိကမီၤတဖၣ်န့ၣ် စံၣ်တဲာ်တဲလီၤ ကစၢ်ယွၤအတၢ်အဲၣ် အဂ့ၢ်အကျိၤဆူ ၦၤဂၤအအိၣ်သ့ဝဲဒၣ်န့ၣ်လီၤ.