ဖဲအီၣ်ဂီၤတၢ်အီၣ်ကတီၢ်, ကၠိ (Joe) သံကွၢ် အဖိတဖၣ်လၢ “မုၢ်တဂီၤအံၤ ကစၢ်ယ့ၣ်ၡူး မ့ၢ်ဟဲဆ့ၣ်နီၤဒီးပှၤ ဖဲစီၤနီၤခိၣ်အံၤန့ၣ် မ့ၢ်သုကသံကွၢ်အီၤ တၢ်မနုၤလဲၣ်” န့ၣ်လီၤ. အဖိခွါဖိသ့ၣ်တဖၣ် ဆိကမိၣ်ဝဲတၢ်သံကွၢ်အကီကတၢၢ်တဖၣ်န့ၣ်လီၤ. အဝဲသ့ၣ် ပာ်လီၤအသးလၢ ကသံကွၢ်ဝဲ ကစၢ်ယ့ၣ်ၡူး တၢ်ဂံၢ်တၢ်ဒွးအကီကတၢၢ်, ဒီးကမၢကစၢ်ယ့ၣ်ရှူးတဲဘၣ်အဝဲသ့ၣ် စးကဝးနီၢ်နီၢ်န့ၣ် ဒိၣ်ဝဲထဲလဲၣ်အဂ့ၢ် န့ၣ်လီၤ. ဝံၤအလီၤခံ အဖိမုၣ်ဖိ စံးဆၢဝဲလၢ, “ယကမၢ အဖိးဟုဃာ်ယၤ” န့ၣ်လီၤ.
ဖိသၣ်ဖိတဖၣ်အဂီၢ် တၢ်အဲၣ်တၢ်ကွံလၢ ကစၢ်ယ့ၣ်ၡူးအမဲာ်ချံပူၤန့ၣ် မ့ၢ်နထံၣ်ဆိဘၣ်န့ၣ်ဧါ. ယဆိမိၣ် ကစၢ်ယ့ၣ်ရှူး ကမၤလၢပှဲၤ ဖိသၣ်တဖၣ် အတၢ်ဃ့သကွံာ်ကညးတဖၣ် လၢတၢ်သူၣ်ခုသးခုအပူၤန့ၣ်လီၤ. သုကဆိကမိၣ်ဒ်လဲၣ်. ယထံၣ်မှံယဲလၢ ကစၢ်ယ့ၣ်ရှူး ကရ့တံၤရ့သကိးဒီးပိာ်ခွါဖိတဖၣ်, ဒီးကအိးထီၣ်န့ၢ်ဝဲအစုလၢ ဖိသၣ်ပိာ်မုၣ်ဖိအဂီၢ်န့ၣ်လီၤ. လီၤဆီဒၣ်တၢ်, ကၠိ အဖိမုၣ်ဖိ ပာ်ဖျါထီၣ်ဝဲဒၣ် သးလၢအအဲၣ်ဘၣ်အီၤ, ဒီးသးလၢအဆၢမိၣ်န့ၢ် အတၢ်အဲၣ်, လၢအမ့ၢ် အဆၢမိၣ်န့ၢ်သးလီဝဲ တၢ်ဖိးဟုဖိးဃာ်အီၤန့ၣ် ကစၢ်ယ့ၣ်ရှူး အသးကဘၣ်ဝဲသ့ၣ်သ့ၣ်န့ၣ်လီၤ.
ဖိသၣ်တဖၣ်အိၣ်ဒီးသးလၢ အသ့ၣ်ညါပာ်ဂံၢ်ပာ်ဘါတၢ်, ဒီးသ့ၣ်ညါဝဲလၢ ကစၢ်ယ့ၣ်ၡူးန့ၣ် အိၣ်ဒီးအစိကမီၤ, ဒီးမ့ၢ်ပှၤလၢအဲၣ်တၢ်တဂၤန့ၣ်လီၤ. လူၤ ၁၈:၁၇ အပူၤန့ၣ် ကစၢ်ယ့ၣ်ရှူးစံးဝဲဒၣ်, “ဖဲဒၣ်ၦၤလၢ အတဒိးန့ၢ်ဘၣ် ယွၤအဘီအမုၢ် ဒ်ဖိသၣ်အသိးန့ၣ်, တလဲၤနုာ်ဘၣ်ဝဲလၢအပူၤလ့ၤတက့ၤဘၣ်” န့ၣ်လီၤ. ကစၢ်ခရံာ် အဲၣ်ဒိးဝဲလၢ ပကအၢၣ်လီၤတူၢ်လိာ်ပတၢ်လိၣ်ဘၣ် အဘျုးအဖှိၣ်, တၢ်ပျၢ်ကပာ်ကွံာ်ပတၢ်ဒဲးဘးႇ ဒီးတၢ်အုၣ်က့ၤခီၣ်က့ၤအဂီၢ်န့ၣ်လီၤ. ကစၢ်ယ့ၣ်ရှူး မုာ်လၤသးခုဝဲလၢ သးလၢအဆီၣ်လီၤအသး, လၢအအဲၣ်ဒိးအိၣ်ဆိးလၢအကပၤန့ၣ်လီၤ.
တၢ်လၢနအဲၣ်ဒိးသံကွၢ် ကစၢ်ယ့ၣ်ၡူးန့ၣ် မ့ၢ်အိၣ်တမံၤမံၤဧါ. ပဝဲကိးဂၤဒဲး, ပအိၣ်ဒီးပကစၢ်ဒၣ်ဝဲအတၢ်သံကွၢ်တဖၣ်န့ၣ် မ့ၢ်တၢ်လၢအလီၤတံၢ်န့ၣ်လီၤ. မ့တမ့ၢ် မ့ၢ်နအဲၣ်ဒိးအိၣ်ဘူးဒီးကစၢ်ယ့ၣ်ရှူးသ့ၣ်သ့ၣ်န့ၣ်ဧါ. ခဲကနံၣ်အံၤ, လၢတၢ်ဖိးဟုဃာ်နၤအဂီၢ်, ဒီးနကဒိးန့ၢ်ဘၣ်တၢ်အါန့ၢ်ဒံး တၢ်လၢနလိာ်ဘၣ်တဖၣ်အဂီၢ်, ဃ့ၢ်နဲဆူ ကစၢ်ခရံာ်အအိၣ်န့ၣ်တက့ၢ်.