ယလဲၤဟးကွၢ်ကီ ဟီၣ်ခိၣ်ဒီဘ့ၣ်အပတီၢ် တၢ်ဒုးနဲၣ် စုသ့စိးပျၤ ဝါစဲလ့ၢ် (ကြွေပန်းပု)တၢ်ဂီၤတဖၣ် လၢစုသ့စိးပျၤအတၢ်သူၣ်ထီၣ် (museum) အကတီၢ်, ယဘၣ်တၢ်ကွဲမုာ်ယၤ ဒ်သိးယနီၢ်ကစၢ်ဒၣ်ယဲ ယကမၤ ကိစိာ်စုဖိတဖျၢၣ် (pinch pot) လၢကပံာ်, ဘၣ်တၢ်ပာ်ဃ့အီၤလၢကလံၤန့ၣ်လီၤ. တၢ်တ့စိးပျၤ, ဒီးတ့ခဲၣ်အလွဲၢ်လၢ သလၢဖျၢၣ်ဆံးဖိတဖျၢၣ်အဂီၢ်န့ၣ်, ယဘၣ်စူးကါတၢ်ဆၢကတီၢ်ယံာ်ဝဲ ခံနၣ်ရံၣ်န့ၣ်လီၤ. ယဂုာ်ကျဲးစၢးမၤတၢ်အစၢ, သလၢဖျၢၣ်ဆံးဖိတဖျၢၣ်န့ၣ် အတလီၤကညီၢ်လီၤသးစဲ, အက့ၢ်အဂီၤတဂ့ၤ, အလွဲၢ်တဃူတဖိးဘၣ်န့ၣ်လီၤ. သလၢဖျၢၣ်ဆံးဖိအံၤန့ၣ် တမ့ၢ်လၢတၢ်ကပာ်ဒုးနဲၣ်အီၤလၢစုသ့စိးပျၤအတၢ်သူၣ်ထီၣ်အပူၤဘၣ်န့ၣ်လီၤ.

တၢ်အိၣ်မူအိၣ်ဂဲၤအပတီၢ် အဒိၣ်အထီန့ၣ် ကဲထီၣ်တၢ်လၢအလီၤပျံၤ, အလီၤဘၣ်ယိၣ်တမံၤသ့ဝဲဒၣ်န့ၣ်လီၤ. ၦၤအံၣ်စရ့လးဖိ အၦၤလုၢ်တၢ်အဒိၣ်တဖၣ် ဘၣ်ကွၢ်ဆၢၣ်မဲာ်ဒီးတၢ်ဂ့ၢ်အံၤန့ၣ်, ဖျါဖဲ ၃မိၤ ၂၂:၁-၈ အပူၤ, လၢအဝဲသ့ၣ် ကျဲးစၢးလူၤပိာ်ထွဲမၤထွဲ ယွၤအတၢ်မၤလိာ်တဖၣ်, ပာ်ဖှိၣ်ဃုာ်ဒီး ဒ်အဆၢဖိ ၁ဝ-၃၃ ပာ်ဖျါဝဲအသိး, တၢ်လုၢ်တၢ်ပာ် အတၢ်နဲၣ်ကျဲတဖၣ်, ဒ်သိးကမ့ၢ်ဝဲပှၤအစီအဆှံလၢ ယွၤအတၢ်မၤအဂီၢ်န့ၣ်လီၤ. ၦၤလုၢ်တၢ်အဒိၣ်တဖၣ် အတၢ်မၤန့ၣ် မ့ၢ်တၢ်လၢအစီဆှံ- ဘၣ်တၢ်မၤအီၤလီၤလီၤဆီဆီ ဘၣ်ဆၣ်, အဝဲသ့ၣ်ဂုာ်ကျဲးစၢးမၤတၢ် အဂ့ၤကတၢၢ်ဒၣ်လဲာ်, တၢ်လီၤတူာ်လီၤကာ်အိၣ်ဒံးဝဲအဖၢမုၢ်န့ၣ်လီၤ. လၢတၢ်န့ၣ်အဃိ, အကတၢၢ်န့ၣ် ၦၤလုၢ်တၢ်အဒိၣ်တဖၣ် အတၢ်တီတၢ်လိၤအဂီၢ် မူဒါန့ၣ် ကစၢ်ယွၤ ဟံးန့ၢ်ဝဲလၢ အနီၢ်ကစၢ်ဒၣ်ဝဲအဖံဘၣ်ခိၣ်, ဒီးအဆၢဖိ ၉,၁၆, ဒီး၃၂ န့ၣ် ယွၤ စံးဘၣ် စီၤမိၤရှ့ တလီၢ်လီၢ် “တၢ်လၢယၤယွၤအံၤ ယမၤစီဆှံအီၤလီၤ” န့ၣ်လီၤ.

ကစၢ်ယ့ၣ်ၡူးမ့ၢ် ၦၤလုၢ်တၢ်အခိၣ် အဒိၣ်ကတၢၢ်အလၢအၦဲၤ, ဒီးလၢပတၢ်ဒဲးဘးအဂီၢ်, ထဲအဝဲတဂၤဧိၤ, ဟ့ၣ်ထီၣ်ဝဲတၢ်လုၢ်တၢ်ပာ် လၢအကဆှီ, လၢယွၤတူၢ်လိာ်အီၤသ့, ခီဖျိဒိးသံအသးလၢ သ့ၣ်ဖျၢၣ်ထူၣ်စုညါအလိၤန့ၣ်လီၤ. ယိၤ ၁၇:၁၉ အပူၤန့ၣ် ကစၢ်ယ့ၣ်ရှူး ဃ့ထုကဖၣ်ဝဲလၢ, “ဒ်သိးအဝဲသ့ၣ်ကစီဆှံထီၣ်လၢ တၢ်မ့ၢ်တၢ်တီအပူၤဒီး, ယမၤစီဆှံထီၣ်ယသးလၢအဃိလီၤ” န့ၣ်လီၤ. ဖဲပသးကလၢၢ်ဘၣ် ပကအိၣ်မူတီတီလိၤလိၤအဂီၢ်, ပတၢ်ကျဲးစၢးတဖၣ် မ့ၢ်ဖျါလီၤဂာ်ဒီး ပှၤတ့သပၢၤဖိ လၢအတမ့ၢ် ပှၤစဲၣ်နီၤတဂၤအတၢ်မၤအသိးန့ၣ်ဒီး, ပအိၣ်ဘှံးသ့ဝဲလၢ ကစၢ်ယ့ၣ်ၡူးအတၢ်မၤအလၢအပှဲၤ, လၢအမၤတ့ၢ်ဝဲ, ဒီးဒ်သိးပကအိၣ်မူလၢကစၢ်အဂီၢ်, ပသန့ၤလီၤသးလၢ သးစီဆှံကစၢ် အစိကမီၤသ့ဝဲဒၣ်န့ၣ်လီၤ.