ပဖၣ်ကပူၤလီၤကလဲ, ဒီးအဒါတဖၣ်လီၤပှီၢ်လံအဃိ, အလီၢ်အိၣ်လၢပကဘၣ်ဘှီဂ့ၤထီၣ်က့ၤပဟံၣ်န့ၣ်လီၤ. ပဟံၣ်တၢ်လီၢ်အါတီၤတဖၣ်န့ၣ် ဘၣ်တၢ်မၤလီၤပှီၢ်ကွံာ်ဝံၤ, ၦၤဘှီတၢ်ဖိတဖၣ် စးထီၣ်ခူၣ်ဝဲ တၢ်ကပာ်လီၤ လၢၢ်သနၢၣ်အသီအကတီၢ်, ပထံၣ်ဘၣ် တၢ်လၢအလီၤသးစဲဘူးတဖၣ်န့ၣ်လီၤ.

ၦၤကဘှီတၢ်တဖၣ် ခူၣ်ဝဲဟီၣ်ခိၣ်, ဒီးလီခီသ့ၣ်ဖးတဖၣ်, လၢ ၁၈၅ဝ နံၣ်တဖၣ်အပူၤ ဆိၣ်ဒၣ် (soda) ပလီတဖၣ်, တုၤဒၣ်လဲၣ် ဖၣ်ကပူၤပီးလီတဖၣ် အိၣ်ဟဲဖျါထီၣ်လၢဟီၣ်ခိၣ်လာ်န့ၣ်လီၤ. မ့ၢ်ပတ့ထီၣ်ဘၣ်ပဟံၣ်လၢ ၦၤစူးကွံာ်တၢ်လၢပှၤတသးလီၤ တဖၣ်အလီၢ်အကျဲန့ၣ်ဧါ. မ့ၢ်မတၤကသ့ၣ်ညါလဲၣ်. ဘၣ်ဆၣ်, တၢ်အစၢဟဲထီၣ်ဝဲလၢ ၦၤဘှီတၢ်လၢအသ့စဲအ့ၣ်န့ၣ် စံးဝဲဒၣ်လၢ လၢၢ်သနၢၣ်အခီၣ်တဃာ်အဂီၢ် ပကဘၣ်ခူၣ်ယိာ်ထီၣ်ဟီၣ်ခိၣ်န့ၣ်လီၤ. မ့တမ့ၢ်ဘၣ်ဒီး ဟံၣ်ဒူၣ်တဖၣ်ကတဲၤသ့ၣ်ဖးဝဲန့ၣ်လီၤ.

ဟံၣ်တဖျၢၣ်ကဂၢၢ်ကကျၢၤအဂီၢ်, တၢ်အခီၣ်တဃာ်တဖၣ်န့ၣ် ကဘၣ်ဂ့ၤဝဲဒၣ်န့ၣ်လီၤ. လၢပတၢ်အိၣ်မူအဂီၢ်စ့ၢ်ကီး မ့ၢ်ဝဲတီဝဲဒၣ်န့ၣ်လီၤ. ဖဲၦၤအံၣ်စရ့လးဖိတဖၣ် ပျံၤတၢ်လၢဒုၣ်ဒါတဖၣ်အဃိ, ယၡါ ၃၃:၂-၄ န့ၣ် ဒ်သိးပှၤဂီၢ်မုၢ် ကအိၣ်ဂၢၢ်ဆိးကျၢၤဝဲအဂီၢ် ဝံယၡါယၤ ဃ့ထုကဖၣ်ဝဲဒၣ်န့ၣ်လီၤ. ဘၣ်ဆၣ် တၢ်ဂံၢ်တၢ်ဘါန့ၣ်တဟဲဝဲလၢ တၢ်သူၣ်ဒူသးဒူ, မ့တမ့ၢ် တၢ်စုကဝဲၢ်တဖၣ်န့ၣ်ဘၣ်. မ့မ့ၢ် တၢ်ဂံၢ်တၢ်ဘါအိၣ်ဟဲခီဖျိ, သးသမူ သူၣ်လီၤအသးလၢ ယွၤန့ၣ်လီၤ. အဆၢဖိ ၆ န့ၣ် ဝံစံးဝဲဒၣ်, “ဒီးကကဲထီၣ် နကတီၢ်တဖၣ် အတၢ်ဂၢၢ်တၢ်ကျၢၤအလီၢ်လီၤ. တၢ်အုၣ်က့ၤခီၣ်က့ၤ အဂံၢ်အဘါႇ တၢ်ကူၣ်သ့ႇ ဒီးတၢ်သ့ၣ်ညါ” န့ၣ်လီၤ. ဒ်ဝံပာ်ဖျါဝဲအသိးန့ၣ် ကစၢ်ယ့ၣ်ၡူး စ့ၢ်ကီးစံးဝဲ, ဒီးလၢ မး ၇:၂၄-၂၅ န့ၣ် သိၣ်လိဝဲဒၣ် ‘ၦၤသူၣ်လီၤအသးသမူလၢ ယွၤအတၢ်ကူၣ်သ့တဖၣ်န့ၣ် ကအိၣ်ဂၢၢ်ဆိးကျၢၤဝဲလၢ သးသမူအကလံၤမုၢ်တဖၣ်အပူၤ’ န့ၣ်လီၤ.

ဖဲလၢပတၢ်တဲၤသ့ၣ်ဖးတဖၣ်, ဒ်အမ့ၢ် တၢ်အ့ၣ်လိာ်ဆိးက့လိာ်သး, တၢ်သးစဲထီတၢ်တမံၤမံၤ, မ့တမ့ၢ် ဟံၣ်ဖိဃီဖိ အတၢ်ဂ့ၢ်ကီတဖၣ် မ့ၢ်ဟဲအိၣ်ထီၣ်လၢ ပတၢ်အိၣ်မူအပူၤန့ၣ်, မ့ၢ် တၢ်ပနီၣ်လီၤတံၢ်တမံၤလၢ, ပကဘၣ်ကွၢ်ထွဲမၤဂ့ၤထီၣ်က့ၤ ပလၢၢ်သနၢၣ်အခီၣ်တဃာ်န့ၣ်လီၤ. ဖဲ ပလူၤဃုထံၣ်န့ၢ် တၢ်ဘံၣ်တၢ်ဘၢ, ဖဲပဃုထံၣ်န့ၢ်တသ့အလီၢ်, မ့တမ့ၢ် ပလူၤပိာ် ခ့ခါအကတီၢ် တၢ်ကူၣ်သ့ဆိကမိၣ်တၢ်တဖၣ်ဧိၤန့ၣ်ဒီး, တမ့ၢ်လၢ ပခီၣ်တဃာ် ကအိၣ်ဂၢၢ်ဆိးကျၢၤဝဲဘၣ်န့ၣ်လီၤ. ဘၣ်ဆၣ်, ယၡါ ၃၃:၆ ပာ်ဖျါဝဲဒၣ် ၦၤလၢအသူၣ်လီၤအသးသမူတဖၣ်လၢ ယွၤန့ၣ် ကဒိးန့ၢ် တၢ်ဂံၢ်တၢ်ဘါ, ဒီးတၢ်လုၢ်ဒိၣ်ၦ့ၤဒိၣ်တဖၣ်ခဲလၢာ် လၢကစၢ်ယွၤအအိၣ်န့ၣ်လီၤ.