ဖဲနံၣ်တဖၣ်လၢ ယမၤတၢ် ဒ်ၦၤကွဲးတၢ်ကစီၣ်အကတီၢ်, ယသးခုသးမုာ်ယဲလၢ ယဘၣ်စံးကတိၤပာ်ဖျါ ၦၤဂၤအဂ့ၤဘၣ်ဆၣ်, ယဘၣ်တၢ်သိၣ်လိနဲၣ်လိယၤလၢ ယတဘၣ်ပာ်ဖျါထီၣ် ယတၢ်ထံၣ်ဆိကမိၣ်ဘၣ်န့ၣ်လီၤ. နံၣ်တဖၣ်လဲၤပူၤကွံာ်ဝံၤန့ၣ်ဒီး, ယသးကလၢၤဘၣ် ကစၢ်ယွၤအတၢ်ကိးယၤလၢ ယကဘၣ်ဟးထီၣ် လၢၦၤကွဲးတၢ်ကစီၣ်အတၢ်မၤန့ၣ်လီၤ. ဖဲယသးကလၢၤဘၣ်တၢ် ဒိၣ်ထီၣ်အါထီၣ်ဝဲလၢ ယွၤအတၢ်နဲၣ်ယၤ ဒ်သိးယကကွဲးတီၢ်ထီၣ်အဂ့ၢ် လၢအ့ထဲၣ်နဲးဘလီး (Blog) အပူၤ, လၢတၢ်ကဟ့ၣ်ခီဟ့ၣ်နီၤအဂ့ၢ်န့ၣ်ဒီး, ယကကွဲးပာ်ဖျါ ယတၢ်ထံၣ်ဆိကမိၣ်, လီၤလီၤဆီဆီ ဘၣ်ဃးဒီးယတၢ်စူၢ်တၢ်နာ်အဂ့ၢ်န့ၣ် ယဘၣ်ယိၣ်တၢ်န့ၣ်လီၤ. ဖဲယစးထီၣ်ကွဲးတၢ်န့ၣ်ဒီး, ယဘၣ်ယိၣ်ယဲလၢ တၢ်ဂ့ၢ်လၢယကကွဲးတဖၣ် တအိၣ်လၢၤဘၣ်န့ၣ်လီၤ. ဘၣ်ဆၣ်, ယကွဲးယဲ တနွံဘၣ်တနွံဝံၤ အလီၤခံန့ၣ်, ယဃုထံၣ်န့ၢ် တၢ်ကတိၤဟ့ၣ်သဆၣ်ထီၣ်တဖၣ်, ဒီးတၢ်ထံၣ်ဆိကမိၣ်တဖၣ်လၢ ယကဟ့ၣ်နီၤလီၤအဂီၢ်န့ၣ်လီၤ. ယကွဲးတၢ်တဖၣ် ဒ်ယံာ်ထီၣ်ဒ်အါထီၣ်, ဒီးယတၢ်ထံၣ်ဆိကမိၣ်တဖၣ် အါထီၣ်ဝဲဒၣ်န့ၣ်လီၤ. တၢ်မၤအသးအံၤ, မ့ၢ်ဝဲတီဝဲ တုၤခဲကနံၣ်အံၤန့ၣ်လီၤ.

ဖဲယလူလီၤဂၢ်လီၤ ယတၢ်ဟ့ၣ်, ဒီးတၤလၣ်တဖၣ်လၢ တၢ်မၤတၢ်ခ့တၢ်ၦၤအတၢ်မၤလၢၦၤဂၤအဂီၢ်န့ၣ်ဒီး, လၢယသးသမူအပူၤန့ၣ် ယထံၣ်ဘၣ် ကစၢ်ယွၤ မၤၦဲၤအါထီၣ်ဝဲတၢ်သးခု, ဒီးတၢ်ထိၣ်ဟူးထိၣ်ဂဲၤသးအသဟီၣ်ဒ်လဲၣ်န့ၣ်လီၤ.

ဖဲလံာ် ၂ စီၤပၤအပူၤန့ၣ် ပကဖးဘၣ် ပှၤဖှီၣ်ဖိယာ်ဖိ မုၣ်ကမဲတဂၤ လဲၤဃ့တၢ်မၤစၢၤလၢ ဝံအ့ၤလံယၤအအိၣ်န့ၣ်လီၤ. အဝၤလၢအသံတ့ၢ်လံတဂၤ ပာ်လီၤတဲာ်တ့ၢ် အဒ့ၣ်အကမၢ်အဃိ, အဒ့ၣ်အကမၢ်အကစၢ်န့ၣ် အဲၣ်ဒိးဖီၣ်ဟံးန့ၢ်အဖိခွါခံဂၤန့ၣ်လီၤ. လၢအဟံၣ်ပူၤန့ၣ်, အိၣ်ဒၣ်ထဲ သ့ၣ်စၤယံးသိကိတဖျၢၣ်ဧိၤန့ၣ်လီၤ. ဝံ စံးဘၣ်တဲဘၣ်အီၤလၢ ကထၢဖှိၣ်ပာ်ဖှိၣ် သိကိတဖၣ် လၢအဟံၣ်အခိၣ်အဃၢၤတဖၣ်, ဒီးလူလီၤသိဆူ တၢ်ပူၤတၢ်လီၢ်အိၣ်ကလီတဖၣ်အပူၤန့ၣ်လီၤ. ၂ စီၤပၤ ၄:၅ ပာ်ဖျါဝဲလၢ “အဝဲသ့ၣ်တဖၣ်န့ၣ် ဟဲစိာ်တၢ်ဆူအအိၣ်, ဒီးအဝဲဒၣ်လူလီၤတၢ်” န့ၣ်လီၤ. မုၣ်ကမဲတဂၤအံၤ လူလီၤဝဲသိတဖၣ်လၢသိကိအပူၤ, ဒီးလၢတၢ်လီၤလိၢ်လီၤလးအပူၤန့ၣ်, သိကိတဖၣ်န့ၣ် သိအိၣ်ၦဲၤဝဲဒၣ်ခဲလၢာ်န့ၣ်လီၤ. အဝဲဟ့ၣ်ကဒါက့ၤ အဟံၣ်ဖိဃီဖိအဒ့ၣ်အကမၢ် လၢသိတဖၣ်အံၤသ့ဝဲဒၣ်န့ၣ်လီၤ.

ကစၢ်ယွၤ အကလုၢ်တီ, ဒီးလုၢ်အီၣ်ၦၤထီဘိန့ၣ်လီၤ. ဒ်သိးပကကဲထီၣ်တၢ်ဆိၣ်ဂ့ၤလၢၦၤဂၤအဂီၢ်န့ၣ် ယွၤဆိၣ်ဂ့ၤၦၤလၢ တၢ်ဟ့ၣ်တဖၣ်, ဒီးတၤလၣ်တဖၣ်, ဒီးဂံၢ်ခီၣ်ထံးတဖၣ်န့ၣ်လီၤ. မ်ပသု တပာ်ခူသူၣ်, မ့တမ့ၢ် လဲၤကပာ်ကလီကွံာ် ယွၤအတၢ်ဟ့ၣ်တဖၣ်န့ၣ်တဂ့ၤ. မ့မ့ၢ် ပကစူးကါအီၤလၢ ယွၤအလၤကပီၤအဂီၢ်န့ၣ်တက့ၢ်.