အသးသမူဒီစိၤန့ၣ် ဒ့ဘ့း ဘဲးထၢၣ် (David Vetter) ဘၣ်အိၣ်ဝဲလၢ စံၣ်ပိလိတဖျၢၣ် အပူၤ, ဒီးဖဲအသးအိၣ် တဆံခံနံၣ် သံဝဲဒၣ်န့ၣ်လီၤ. အဝဲအိၣ်ဖျဲၣ်ထီၣ်ဝဲလၢ တၢ်ဆါနးနးကျံးကျံး, လၢအမ့ၢ် အနီၢ်ကစၢ်တြီဆၢတၢ်ဆူးတၢ်ဆါတဖၣ်တသ့တန့ၢ်တမံၤ (SCID), ဒီးပှၤကိးအီၤလၢ “စံၣ်ပိလိပိာ်ခွါဖိ” န့ၣ်လီၤ. အမိၢ်ဒီးအပၢ်န့ၣ် အဖိဝဲၢ်ကိ လီၤမၢ်တ့ၢ်ဝဲလၢ တၢ်ဆါအၢအံၤအဃိ, ပာ်လီၤအသးလၢ ကဒီတဒၢ အဖိခံဂၤတဂၤန့ၣ်လီၤ. ဒ်သိးကအိၣ်မူအိၣ်ဂဲၤအါနံၣ်အါလါအဂီၢ်, (NASA) အၦၤသ့ၦၤဘၣ်တဖၣ် ကတဲာ်ကတီၤန့ၢ် ပလးစတ့းအတၢ်ဒီတဒၢ စံၣ်ပိလိ,ဃုာ်ဒီးမူပျီဆ့ကူဆ့ကၤလီၤဆီ, ဒ်သိးအမိၢ်အပၢ်ကစိာ်ထီၣ်စိာ်လီၤ ဒ့ဘ့း လၢတၢ်လဲၤတၢ်က့ၤ လၢတၢ်ချၢအဂီၢ်န့ၣ်လီၤ. ပကထံၣ်ဘၣ် ပဝဲကိးဂၤဒဲး ပသးအိၣ် ဒီတဒၢ ၦၤလၢပအဲၣ်ဘၣ်တဖၣ်ထဲလဲၣ်န့ၣ်လီၤ.

နီၢ်အဘံၤကါယံးလး အဝၤ စီၤနဘလး, လၢအမ့ၢ် ပှၤအၢပှၤသီတဂၤန့ၣ် မၤကမၣ်ဘၣ် စီၤပၤဒၤဝံးန့ၣ်လီၤ. လၢတၢ်အကတီၢ်အၢသီအံၤန့ၣ်, စီၤဒၤဝံး အဲၣ်ဒိးဟ့ၣ်ကၣ်ဝဲလၢ အနီၢ်ကစၢ်န့ၣ်လီၤ. ၁ ၡမူၤ ၂၅:၂၉ ပာ်ဖျါဝဲ, နီၢ်အဘံၤကါယံးလး ဃ့ၢ်သဘျိၣ်ဆူ စီၤဒၤဝံး အအိၣ်, ဒီးစံးဝဲဒၣ်လၢတၢ်ကူၣ်သ့အပူၤ “ယကစၢ်အသးသမူ ကအိၣ်ဘိၣ်အသးလၢတၢ်မူအတၢ်ဘိၣ်ပူၤ အိၣ်ဒီးယွၤနကစၢ်” န့ၣ်လီၤ. တၢ်ဆိကမိၣ် ဘၣ်ဃးဒီး “တၢ်အဘိၣ်” န့ၣ် ပာ်ဖျါထီၣ် တၢ်ထၢဖှိၣ်ပာ်ဖှိၣ်ထီၣ် တၢ်လုၢ်ဒိၣ်ၦ့ၤဒိၣ်တဖၣ်, ဒ်သိးအကစၢ် ကစိာ်ဃုာ်ဒီးအီၤ, လၢတၢ်ဒီတဒၢအီၤကသ့အဂီၢ်န့ၣ်လီၤ. နီၢ်အဘံၤကါယံးလး ဒုးသ့ၣ်နီၣ်ထီၣ် စီၤဒၤဝံးလၢ ယွၤအသးအိၣ် စိာ်ထီၣ်အီၤလၢ တၢ်ဒီတဒၢအတၢ်ဘိၣ်အပူၤန့ၣ်လီၤ. အဝဲအိၣ်ဘံၣ်အိၣ်ဘၢဝဲလၢ ယွၤအစုပူၤ အါန့ၢ်ဒံး အနီၢ်ကစၢ်အစုပူၤန့ၣ်လီၤ. အဆၢဖိ ၃၁ ပာ်ဖျါဝဲ “တၢ်ကမၤအသးလၢ အလီၢ်တအိၣ်ဘၣ်ဒီး နတဂၢ်လီၤဘၣ်တၢ်သွံၣ်မ့ၢ်ဂ့ၤႇ ယကစၢ်တအုၣ်က့ၤခီၣ်က့ၤဘၣ် အကစၢ်ဒၣ်ဝဲမ့ၢ်ဂ့ၤႇ တကဲထီၣ်ဘၣ်တၢ်ဘၣ်တိၢ်ဘၣ်ထံးအလီၢ်, တၢ်သးဘၣ်တိၢ်ဘၣ်ထံးအလီၢ်လၢ ယကစၢ်အဂီၢ်ဘၣ်” န့ၣ်လီၤ.

ဖဲၦၤဂၤတဖၣ်လိၣ်ဘၣ်ဝဲအကတီၢ် ဒ်သိးပကဒီတဒၢ အဝဲသ့ၣ်အဂီၢ်, ပမၤအဂ့ၤကတၢၢ်ဘၣ်ဆၣ်, ထဲဒၣ်ကစၢ်ယွၤ အတၢ်ကဟုကယာ်အလၢအၦဲၤန့ၣ် ကမ့ၢ် တၢ်ဘံၣ်တၢ်ဘၢနီၢ်နီၢ်လၢ အဝဲသ့ၣ်အဂီၢ်န့ၣ်လီၤ.