တၢ်ဂီၤတ့ခဲၣ် “ပျဲလဲၤယပှၤဂီၢ်မုၢ်တဖၣ်” တဘ့ၣ်အံၤ ဘၣ်တၢ်တ့ခဲၣ်အီၤလၢ အ့ၣ်ရိၣ် ဒီးကလး (Aaron Douglas) န့ၣ်လီၤ. ဒီးကလး စူးကါဝဲ တၢ်အလွဲၢ် အဂီၤဃဲး, အလါ, ဒီးထူအလွဲၢ်လၢအဖျါဆဲးကပီၤဒိၣ်, ဒီးတ့ခဲၣ် အၤဖရံကၣ် (African) အလုၢ်အလၢ်, ဒ်သိးကပာ်ဖျါထီၣ် လံာ်စီဆှံအတၢ်တဲပူ ဘၣ်ဃးဒီးစီၤမိၤရှ့အဂ့ၢ်န့ၣ်လီၤ. တၢ်ဂီၤအံၤ ဘၣ်တၢ်ဒုးဘၣ်ထွဲလိာ်အသးဒီးအမဲရကၤသူဖံးဖိတဖၣ် ထုးဂံၢ်ထုးဘါလၢ ကဒိးန့ၢ် တၢ်သဘျ့, ဒီးတၢ်စံၣ်ညီၣ်တီအဂီၢ်န့ၣ်လီၤ.
တၢ်ဂီၢ်တ့ခဲၣ်တဘ့ၣ်အံၤ ပာ်ဖျါထီၣ်ဝဲ ကစၢ်ယွၤ လီၣ်ဖျါထီၣ်အသးလၢ စီၤမိၤရှ့ ခီဖျိ မ့ၣ်အူ အီၣ်တပှိာ်တလိၣ်အပူၤ, ဒီးဒုးနဲၣ်ဝဲလၢယွၤသ့ၣ်ညါ ပှၤအံၣ်စရ့လးဖိတဖၣ် တူၢ်ဘၣ်ခီၣ်ဘၣ် တၢ်ကီတၢ်ခဲလၢ ကီၢ်အဲၤကူးပတူးအပူၤန့ၣ်လီၤ. ပှၤလၢ အတ့ခဲၣ်တၢ်ဂီၤတဂၤအံၤ စူးကါဝဲ တၢ်ကပီၤတဘိ, ဒ်သိးကပာ်ဖျါထီၣ် ယွၤအတၢ်ကစီၣ်, ဖျါဖဲ ၂ မိၤ ၃:၁၀ အပူၤ, “ခဲကနံၣ်အံၤဟဲ, ဒီးယကမၢလီၤနၤဆူဖၤရိၤအအိၣ်, ဒ်သိးနကဒုးဟးထီၣ် ယပှၤဂီၢ်မုၢ်, ပှၤအံၣ်စရ့လးဖိ, လၢအဲၤကူပတူးအပူၤန့ၣ်လီၤ.”
တၢ်ဂီၤတ့ခဲၣ် “ပျဲလဲၤယပှၤဂီၢ်မုၢ်တဖၣ်” တဘ့ၣ်အံၤအပူၤန့ၣ် “ဒ်သိးကဒိကနၣ် ကစၢ်ယွၤအကလုၢ်အဂီၢ်, စီၤမိၤရှ့ ချံးလီၤအခီၣ်ဘၣ်ဆၣ်, အမဲာ်ချံတခီ ကွၢ်ဃီၤဝဲဒၣ်ဆူတၢ်ခံးသူအလပီတဖၣ်, ဒီးကသ့ၣ်လၢ အဘၣ်တၢ်သိၣ်လိအဝဲသ့ၣ်လၢ တၢ်ဒုးတၢ်ယၤအဂီၢ် ကဝီၤဃာ်အီၤတဖၣ်န့ၣ်လီၤ. တၢ်ဂီၢ်တ့ခဲၣ်တဘ့ၣ်အံၤ ဒုးသ့ၣ်နီၣ်ထီၣ် ပှၤကွၢ်တၢ်တဖၣ်လၢ ဖဲပှၤအံၣ်စရ့လးဖိတဖၣ် ဟးထီၣ်လၢ ကီၢ်အဲၤကူးပတူးဝံၤန့ၣ်ဒီး, ကဘၣ် ကွၢ်ဆၢၣ်မဲာ်ဒီးတၢ်ဒုးတၢ်ယၤန့ၣ်လီၤ. ဘၣ်ဆၣ်, တၢ်ကပီၤအဘိလၢ အဆဲးကပီၤ ကပြူၢ်ကပြီၤန့ၣ် ဒုးသ့ၣ်နီၣ်ထီၣ်ပှၤလၢ ယွၤကအိၣ်ဒီးပှၤအံၣ်စရ့လးဖိန့ၣ်လီၤ.
မ့ၢ်လၢပှၤအါဂၤ စူးကါအတၢ်စိတၢ်ကမီၤလၢ တၢ်ဆီၣ်သနံး ပိာ်ခွါ, ပိာ်မုၣ်, ဒီးဖိသၣ်တဖၣ် လၢဟီၣ်ခိၣ်ဒီဘ့ၣ်ဝးဝး- ဒီးတၢ်ဂုာ်ကျဲးစၢၤထီဒါတၢ်တတီတလိၤ ကအိၣ်ဒံးဝဲဆူညါအဃိ, တၢ်ဂီၤတ့ခဲၣ်တဘ့ၣ်အံၤ ဒုးအိၣ်ထီၣ် သးအတၢ်ဟူးတၢ်ဂဲၤန့ၣ်လီၤ. ဒ်ပှၤလၢအဘၣ်နးဘၣ်ဖှီၣ်တဖၣ် ကိးထီၣ်ယွၤ, ဖျါဖဲ စံး ၉:၉ အပူၤ, “ယွၤမ့ၢ်တိာ်တဖျၢၣ်လၢပှၤဘၣ်တၢ်မၤအၢအဂီၢ်, တိာ်တဖျၢၣ်လၢ တၢ်မၤကိၢ်မၤဂီၤအဆၢကတီၢ်အပူၤ” အသိး ပဃ့သကွံာ်ကညး ဒ်သိးယွၤကစံးဆၢ ပှၤဘၣ်တၢ်မၤအၢမၤသီတဖၣ် အတၢ်ကိးပသူထီၣ်တၢ်, ဒီးကမၤစၢၤအဝဲသ့ၣ်အဂီၢ်န့ၣ်လီၤ. ဒီးဒ် စီၤမိၤရှ့အသိး, လၢပှၤဘၣ်နးဘၣ်ဖှီၣ်အဂီၢ်, ပကအိၣ်ဒီးသးလၢ အသ့မၤစၢၤတၢ်တဖၣ်န့ၣ်လီၤ.
