တၢ်တဲလၢပျၢၤတယုၢ်အပူၤန့ၣ်, ပိာ်မုၣ်တဂၤ စူးကါဝဲ ဝၣ်တဘိ, ဒီးအစိးခံကပၤန့ၣ် ဘျးလီၤစဲၤ ထံစဲၤခံဖျၢၣ်- တဖျၢၣ်န့ၣ်အသီ, ဒီးအဂၤတဖျၢၣ်န့ၣ်အလီၢ်လံၤ အိၣ်ဒီးအပူၤထူၣ်ဖျိတဖၣ်, ဒီးလဲၤဝံဒၢၣ်ထံလၢထံကျိၤကိးနံၤဒဲးန့ၣ်လီၤ. ဖဲအဝဲလဲၤဒၢၣ်ထံ, ဒီးဟဲက့ၤတုၤလၢ အဟံၣ်န့ၣ် ထံစဲၤအသီတဖျၢၣ်န့ၣ် ထံအိၣ်တ့ၢ်ဝဲပှဲၤပှဲၤဘၣ်ဆၣ်, မ့မ့ၢ်ထံဒၢအလီၢ်လံၤတဖျၢၣ်န့ၣ် ထံအိၣ်လီၤတဲာ်တ့ၢ်ဒၣ်တစဲးန့ၣ်လီၤ. လၢတၢ်န့ၣ်အဃိ, ထံဒၢအလီၢ်လံၤန့ၣ် အသးတမုာ်ဝဲဒၣ်အဃိ, ဃ့ကညးဘၣ် ပိာ်မုာ်လၢ အဝံစိာ်ထံတဂၤန့ၣ်လီၤ. “ပိာ်မုၣ်န့ၣ် ဃၣ်က့ၤအသး, ဒီးနဲၣ်အစုဆူ ကျဲလၢအလဲၤဒၢၣ်ထံဒီကျိၤ, ဒီးသံကွၢ် ထံစဲၤအလီၢ်လံၤလၢ, “ဖီၣ်တဖၣ်လၢ နအိၣ်တၢ်ကျဲတကပၤ ဖီထီၣ်ဖးထီၣ်ဝဲန့ၣ် နထံၣ်ဧါ. မ့ၢ်လၢနလူၤန့ၢ်အီၤထံ ကိးမုၢ်နံၤအဃိ, ယတၢ်လဲၤတၢ်က့ၤအကျဲဆူထံကျိန့ၣ်, အိၣ်ပှဲၤဝဲဒီးတၢ်ဃံတၢ်လၤန့ၣ်လီၤ.”
ပအိၣ်မူအိၣ်ဂဲၤဝဲ ဖဲဟီၣ်ခိၣ်လၢ, အပာ်ဂံၢ်ပာ်ဘါ, ဒီးမၤလၤကပီၤ တၢ်လၢအသးစၢ်- တၢ်အသီလၢ အဂ့ၤ, အတၢ်လီၤတူာ်လီၤကာ်တအိၣ်, ဒီးတၢ်စူးကါအီၤန့ၢ်တဖၣ်န့ၣ်လီၤ. ဘၣ်ဆၣ်, လံာ်စီဆှံ စံးဘၣ်ပှၤ ဆှဲဆှဲဖိလၢ တၢ်အဃံအလၤအမ့ၢ်အတီန့ၣ် အိၣ်ဟဲဝဲလၢ ပှၤသးပှၢ် လၢအဂံၢ်စၢ်ဘါစၢ်, ဘၣ်သ့ၣ်သ့ၣ်, ကမ့ၢ်တၢ်လၢ အကၢ်ဘျဲးဟးဂီၤ, ကအိၣ်ဒီး တၢ်အပူၤဖျိတဖၣ်န့ၣ်လီၤ. စံး ၉၂:၁၂ အပူၤန့ၣ် ပှၤသးပှၢ်တဂၤ ကွဲးပာ်ဖျါဝဲ “ပှၤတီပှၤလိၤဂ့ၤထီၣ် ဒ်သ့ၣ်စူၣ်ပလိၣ်အသိး, မဲထီၣ်ဒ်သ့ၣ်ဆှိအ့ရ့းလၢ လဘၤနိၣ်အသိး” န့ၣ်လီၤ.
ပှၤသးပှၢ်တဂၤန့ၣ် မ့ၢ်ဒၣ်ပှၤကူၣ်ဘၣ်ကူၣ်သ့တဂၤလီၤန့ၣ် ပကစံးအီၤထီဘိတသ့ဝဲဒၣ်ဘၣ်န့ၣ်လီၤ. ဘၣ်ဆၣ်, မ့ၢ်လၢ ပှၤသးပှၢ်တဖၣ်အိၣ်မူအိၣ်ဂဲၤဆိတ့ၢ်လံလၢ ပှၤသးစၢ်တဖၣ်အမဲာ်ညါ, အတၢ်လဲၤခီဖျိအိၣ်အါန့ၢ်ဒံးပှၤသးစၢ်, ဒီးလၢတၢ်ဒုးဒိၣ်ထီၣ်အါထီၣ် တၢ်စူၢ်တၢ်နာ်, ဒီးတၢ်သန့ၤသးလၢကစၢ်ယွၤအဂီၢ် ကအိၣ်ဂၢၢ်ဆိးကျၢၤအါန့ၢ်ဒံးပှၤသးစၢ်တဖၣ်အဃိ, တၢ်လၢပှၤသးစၢ်တဖၣ် မၤတသ့, တန့ၢ်တဖၣ်န့ၣ် ပှၤသးပှၢ်တဖၣ် မၤစၢၤသ့ဝဲဒၣ်န့ၣ်လီၤ. စံး ၉၂:၁၄ ပာ်ဖျါဝဲလၢ ပှၤသးပှၢ်ဒ်သိးအံၤတဖၣ်န့ၣ် “တုၤအသးပှၢ်ဒီး ကသၣ်ထီၣ်ဒံးဒီး ကအိၣ်ပှဲၤဒီးအထံဒီးအသံကစဲာ်” န့ၣ်လီၤ.
ပှၤသးပှၢ်လၢ အဒိၣ်တုာ်ခိၣ်ပှဲၤတဖၣ်န့ၣ် ကဖီထီၣ်သၣ်ထီၣ်တၤသူတၤသၣ် ဃံဃံလၤလၤတဖၣ်ဆူညါကွ့ၢ်ကွ့ၢ် လၢပတၢ်အိၣ်မူအပူၤန့ၣ်လီၤ. ဒ်သိးပကထံၣ်ဘၣ် ပှၤသးပှၢ်တဖၣ် ဖီထီၣ်သၣ်ထီၣ် တၤသူတၤသၣ်အဃံအလၤတဖၣ်အဂီၢ်, မ်ပကဟံးန့ၢ်သကိးတၢ်ဆၢကတီၢ်, ဒီးကွၢ်ထွဲကဟုကယာ်အဝဲသ့ၣ်တဖၣ်န့ၣ်တက့ၢ်.
