တၢ်ဘိးဘၣ်သ့ၣ်ညါဝဲလၢ “ကဘီယူၤကလဲၤဆူ ‘မိၤထံၣ်ကိ’ ပီၣ်လဲၣ်က့ၣ်ကျီၤ (Montego Bay) န့ၣ်, အိၣ်ကတဲာ်ကတီၤအသးလံ” န့ၣ်လီၤ. ယမ့ၢ်ပှၤကတိၤတၢ်အခၢၣ်စး, ဘၣ်ဃးဒီးတီၤထီကၠိဖိတဖု, လၢကဘၣ်လဲၤဆူ ကီၢ် ကၠမ့ကၤ (Jamaica)န့ၣ်လီၤ. ဖဲယကထုးထီၣ် တၢ်ပျဲလဲၤထီၣ်ဆူ ကဘီယူၤအလိၤ, ဒီးလံာ်ပျဲခီကီၢ် (Passport) တဖၣ် လၢယချၢဝံထၢၣ်အပူၤန့ၣ်ဒီး, မ့ၢ်လၢယတထံၣ်ယလံာ်ပျဲခီကီၢ်လၢၤဘၣ်အဃိ, ယဖုးဘၣ်ယသးန့ၣ်လီၤ.
ယဘၣ်အိၣ်တ့ၢ်, ဒီးယပှၤတဖုန့ၣ် ဒိးထီၣ် ကဘီယူၤ, ဒီးဘၣ်လဲၤအတၢ်ဒၣ်ဝဲန့ၣ်လီၤ. ယကဒိးန့ၢ်က့ၤ ယလံာ်ပျဲခီကီၢ် အသီတဘ့ၣ်အဂီၢ်, ယဘၣ်ဂုာ်ကျဲးစၢၤမၤဝဲ, ၄ သီ အတီၢ်ပူၤန့ၣ်, ယသးဘၣ်ကိၢ်ဘၣ်ဂီၤဝဲဒၣ်ဒိၣ်မးန့ၣ်လီၤ. ယဘၣ်ကိး ကွဲၤဒီနၢ်အဘျီလၢအကယၤ, ယဘၣ်လဲၤဆူ ဝါရှၢၣ်တၢၣ် ဒံၣ်စံၣ် (Washington DC) အဝ့ၢ် ဘၣ်ဆၣ်, တၢ်လီၤဆီတအိၣ်လၢယဂီၢ်နီတမံၤအဃိ, ယဘၣ်က့ၤနီၣ်သိလ့ၣ်ဆူ ကရဲ ရဲးပ့း (Grand Rapids) အဝ့ၢ် လၢ ကီၢ်စဲၣ် မံးခၠံၣ်ကၣ် (Michigan), ဘၣ်ဆၣ်, လံာ်ပျဲခီကီၢ်အသီန့ၣ် ယတဒိးန့ၢ်ဒံးဘၣ်န့ၣ်လီၤ. အကတၢၢ်န့ၣ်, ၂ သီ အတီၢ်ပူၤ ယဒိးန့ၢ် လံာ်ပျဲခီကီၢ်အသီ ခီဖျိဝဲၤလီၢ်လၢ လီၢ်ကဝီၤ ဘျီၣ်ဒိၣ် ပှၤဘၣ်မူဘၣ်ဒါအတၢ်မၤစၢၤ, ဒီးယကဘၣ်လဲၤဆူ ကီၢ်ကၠမ့ကၤ ဒ်သိးယကထံၣ်လိာ်သးဒီးယပှၤတဖုန့ၣ်လီၤ.
လံာ်ပျဲခီကီၢ်န့ၣ် မ့ၢ်လံာ်ဆံးဆံးယိယိဖိဘၣ်ဆၣ်, မ့ၢ်လံာ်အုၣ်ကီၤတဘ့ၣ်လၢ အပျဲယကလဲၤဟး ထံကီၢ်အဂၤတဖၣ်န့ၣ်လီၤ. ယတၢ်ကျဲးစၢၤမၤန့ၢ်လံာ်အသီဖိအံၤအလုၢ်အပှ့ၤန့ၣ်, မ့ၢ်ထိၣ်သတြီၤကွၢ်ဒီးတၢ်လၢကဆၢတဲာ် ခါဆူညါပသးသမူအထူအယိာ်- တၢ်စူၢ်က့ၤနာ်က့ၤ ကစၢ်ယ့ၣ်ရှူး, လၢအမ့ၢ် တၢ်အုၣ်ကီၤထဲတမံၤဧိၤ, ဒ်သိးပကဒိးန့ၢ် တၢ်အုၣ်က့ၤခီၣ်က့ၤလၢ ပတၢ်ဒဲးဘး, ဒီးတၢ်အိၣ်မူအသီ ခီဖျိလၢအီၤန့ၣ်လီၤ.
လံာ်စီဆှံအပူၤ, ၂ ကရံၣ် ၆:၂ ပာ်ဖျါဝဲလၢ” ခဲကနံၣ်အံၤ, မ့ၢ်တၢ်အုၣ်က့ၤခီၣ်က့ၤအမုာ်နံၤ” န့ၣ်လီၤ. စီၤပီလူး ပာ်ဖျါဝဲ တၢ်အမ့ၢ်အတီတမံၤလၢ, တၢ်အုၣ်က့ၤခီၣ်က့ၤ ဟဲတုၤဃီၤ ခီဖျိကစၢ်ခရံာ်အပူၤန့ၣ်လီၤ. ပမ့ၢ်စူၢ်က့ၤနာ်က့ၤအီၤန့ၣ်ဒီး, ပကလဲၤခီဖျိကလၢၢ်ဘၣ် ယွၤအတၢ်အဲၣ်, ဒီးတၢ်အုၣ်က့ၤခီၣ်က့ၤ, ဒီးတၢ်မၤဘၣ်လိာ်က့ၤ ကယဲၢ်တၢ်ဘၣ်တ့ခဲလၢာ်န့ၣ်လီၤ. တနံၤအံၤ, မ်ပကမၤလီၤတံၢ်က့ၤ, ဒ် ၂ ကရံၣ် ၅:၂၁ ပာ်ဖျါဝဲအသိး, ပသ့ၣ်ညါ “ဒ်သိးပကကဲလၢယွၤအတၢ်တီတၢ်လိၤလၢအပူၤ” အခီပညီနီၢ်နီၢ်န့ၣ်လီၤ.
