စဲး(တ)ယါ (Satya) မၤတၢ်ဖဲအတၢ်မၤလီၢ်အသီ ပှဲၤထီၣ် ခွံလါဝံၤ, အသးဟးဂီၤဝဲဒၣ်န့ၣ်လီၤ. ဒ်ပှၤစူၢ်က့ၤနာ်က့ၤကစၢ်ယ့ၣ်ရှူးတဂၤအသိး, လၢတၢ်ဘှါဆှဲ တၢ်ဂ့ၢ်ကီ, ဒီးလၢ တၢ်ဒုးနဲၣ်တၢ်ဖံးတၢ်မၤ အကျိၤအကျဲတဖၣ်အပူၤန့ၣ်, ကျဲးစၢးလူၤပိာ်ထွဲ ယွၤအတၢ်သိၣ်တၢ်ဘျၢတဖၣ်န့ၣ်လီၤ. ဘၣ်ဆၣ်, တၢ်ဂ့ၢ်ကီဘၣ်ထွဲဒီးပှၤကညီတဖၣ် အိၣ်ဒံးဝဲအဖၢမုၢ်, ဒီးတၢ်ကရၢကရိအတၢ်ဖံးတၢ်မၤန့ၣ် တၢ်လဲၤထီၣ်လဲၤထီ အိၣ်ဒၣ်တဆံးတက့ၢ်န့ၣ်လီၤ. လၢတၢ်န့ၣ်အဃိ, အဝဲအဲၣ်ဒိးဆိကတီၢ် အတၢ်ဂုာ်ကျဲးစၢးဖံးတၢ်မၤတၢ်န့ၣ်လီၤ.
ဒ် စဲး(တ)ယါ အသးကလၢၢ်ဘၣ်ဝဲအသိးန့ၣ် နသးကလီၤဘှံးလီၤတီၤ သ့ၣ်သ့ၣ်န့ၣ်လီၤ. တၢ်ဂုာ်ကျဲးစၢးမၤတၢ်န့ၣ် မ့ၢ်တၢ်အဂ့ၤန့ၣ် နသ့ၣ်ညါဘၣ်ဆၣ်, နကမၤတၢ်ဆူညါအဂီၢ်, နသးကလၢၢ်ဘၣ်လၢ, နနီၢ်ခိ, နီၢ်သး အတၢ်ဂံၢ်တၢ်ဘါ ဆံးလီၤစှၤလီၤဝဲဒၣ်န့ၣ်လီၤ. ကလၤ ၆:၉ ဒုးသ့ၣ်နီၣ်ထီၣ်က့ၤပှၤ, တၢ်မၢဖိ စီၤပီလူးအတၢ်ဟ့ၣ်ဂံၢ်ဟ့ၣ်ဘါ, စံးဝဲလၢ, “ပမၤတၢ်ဂ့ၤန့ၣ် မ်ပသုတလီၤဘှံးတဂ့ၤ, အဂ့ၢ်ဒ်အံၤ, ပမ့ၢ်တလီၤဘှံးဘၣ်ဒီး, တုၤအမုၢ်အလါဘၣ်ဒီး ပကကူးတၢ်” န့ၣ်လီၤ. အဝဲစူးကါ တၢ်ကတိၤဟ့ၣ်ဒိ ဘၣ်ဃးဒီးပှၤထူစံာ်ဖိန့ၣ်လီၤ. မ့ၢ်လၢကယဲၢ် ပှၤထူစံာ်ဖိတဂၤလၢ်လၢ်သ့ၣ်ညါဝဲလၢ, တၢ်သူၣ်တၢ်ဖျးအတၢ်မၤန့ၣ် မ့ၢ်တၢ်မၤလၢအကီအခဲအဃိန့ၣ်လီၤ.
အဆၢဖိ ၈ စံးဘၣ်ပှၤ “ပှၤလၢအဖှံတၢ်ဘၣ်ဃးဒီးသးန့ၣ်” မ့ၢ်တၢ်မၤလၢအကီအခဲ စ့ၢ်ကီးန့ၣ်လီၤ. ပှၤစူၢ်က့ၤနာ်က့ၤကစၢ်ယ့ၣ်ရှူး, လၢအလူၤပိာ် သးစီဆှံအတၢ်နဲၣ်ဆှၢတဖၣ်, ဒီးအိၣ်မူဝဲလၢ တၢ်မၤလၤကပီၤအီၤတဖၣ်န့ၣ်, အဂံၢ်ဘါကစၢ်လီၤ, ဒီးအသးကဟးဂီၤ သ့ဝဲဒၣ်န့ၣ်လီၤ. ဘၣ်ဆၣ် ပမ့ၢ်ဟံးဃာ်အတၢ်အၢၣ်လီၤန့ၣ်ဒီး, ပဘၣ်ကူးတၢ်အကတီၢ် ကဟဲတုၤဃီၤဝဲဒၣ်န့ၣ်လီၤ. ဖဲကစၢ်ခရံာ် ဟဲက့ၤကဒါက့ၤဝဲ အကတီၢ်န့ၣ် ပကကူး “တၢ်မူ လီၤထူလီၤယိာ်,” တၤသူၣ်တၤသၣ်လၢအဘၣ်ဃးဒီး ယွၤအတၢ်ဆိၣ်ဂ့ၤ, “တၢ်မူအထူအယိာ်” (ယိၤ ၁၇:၃) န့ၣ်လီၤ. ဒီးလၢခ့ခါပတၢ်အိၣ်မူန့ၣ်, ပကအိၣ်ဒီးတၢ်နာ်န့ၢ်ကစၢ်ယွၤ, ဒီးတၢ်သူၣ်ခုသးခု အိၣ်ဟဲခီဖျိလၢ တၢ်သ့ၣ်ညါယွၤန့ၣ်လီၤ. ပကကူးဘၣ်တၢ် ဘၣ်ဆၢဘၣ်ကတီၢ်, ဒီးတၢ်တစံၣ်ညီၣ်တဲာ် တၢ်ဆၢကတီၢ်လၢ မူခိၣ်သီၣ်ဂီၤအကတီၢ် မ့ၢ်ဂ့ၤ, မူခိၣ်မူလိၤ ကလံၤသီၣ်ဂီၤအကတီၢ်န့ၣ်ဘၣ်. မ့မ့ၢ်လၢကစၢ်ယွၤ အလၢအပှဲၤတဂၤ အတၢ်ဘၣ်သးအကတီၢ်န့ၣ်လီၤ. တချုးပကူးတၢ်အကတီၢ်တုၤန့ၣ်ဒီး, မ်ပကဖှံလီၤတၢ်ဆူညါကွ့ၢ်ကွ့ၢ်လၢကစၢ်ယွၤအဂံၢ်အဘါန့ၣ်တက့ၢ်.
