“မ့ၢ်နတၢ်ဒဲးဘးစိာ်ထီၣ် ကစၢ်ယ့ၣ်ရှူးဆူ ထူၣ်စုညါအလိၤဧါ” န့ၣ် မ့ၢ်တၢ်သံကွၢ်လၢ ဒၢး(ချ)(Dutch) ပှၤတ့ခၠဲၣ်တၢ်ဂီၤ ရဲဘရဲး (Rembrandt) ပာ်ဖျါထီၣ်ဝဲ, ဖဲအကတီၢ် ၁၆၃၃ နံၣ် တၢ်ဂီၤလၢ အတ့ခၠဲၣ်ဝဲအဂ့ၤကတၢၢ် “တၢ်ဝံာ်ထီၣ် ထူၣ်စုညါ” တဘ့ၣ်အပူၤန့ၣ်လီၤ. တၢ်တ့ခၠဲၣ် ကစၢ်ယ့ၣ်ရှူးလၢ တၢ်ဂီၤအခၢၣ်သး, ဖဲတၢ်ဝံၣ်ထီၣ်ဆီလီၤ ထူၣ်စုညါလၢ အလီၢ်ဘၣ်အကျဲဘၣ်န့ၣ်လီၤ. ဖဲပှၤလွံၢ်ဂၤ ဝံၢ်ဆီလီၤဝဲထူၣ်စုညါအကတီၢ်, အဝဲသ့ၣ်အကျါတဂၤန့ၣ် ဘၣ်တၢ်ပာ်ဖျါဝဲလၢ တၢ်ကပီၤအိၣ်ကဝီၤဃာ်ကစၢ်ယ့ၣ်ရှူးအပူၤန့ၣ်လီၤ. အဆ့ကူဆ့ကၤတဖၣ်န့ၣ်လီၤဆီ, လီၤဂာ်ဝဲဒီး ရဲဘရဲး အစိၤဆၢကတီၢ်ဆ့ကူဆ့ကၤ, ဒီးသိးဝဲအခိၣ်သလုး လၢပှၤတ့ခၠဲၣ်တၢ်ဂီၤတဖၣ် ညီနုာ်သိးဝဲဒၣ်န့ၣ်လီၤ. တၢ်မ့ၢ်ကွၢ် တၢ်ဂီၤတ့ခၠဲၣ်တဘ့ၣ်အံၤအပူၤ ဘူးဘူးတံၢ်တံၢ်န့ၣ်ဒီး, အမဲာ်သၣ်န့ၣ် ဖျါလီၤဂာ်ဒီး ရဲဘရဲး န့ၣ်လီၤ. အဝဲတ့ခၠဲၣ်ပာ်ဖျါထီၣ် အနီၢ်ကစၢ်ဒၣ်ဝဲန့ၣ် အဲၣ်ဒီးစံးဝဲလၢ “ကစၢ်ယ့ၣ်ရှူး အတၢ်သံန့ၣ် ပာ်ဃုာ်ဒီးယတၢ်ဒဲးဘး” န့ၣ်လီၤ.

ဘၣ်ဆၣ်, ပှၤအိၣ်ဒံးဝဲတဂၤ ဖျါလီၤဆီဝဲစ့ၢ်ကီးန့ၣ်လီၤ. အဝဲဆ့ၣ်နီၤဝဲလၢ ကသ့ၣ်အလိၤ, ဒီးဖျါလၢအကွၢ်ဃီၤတၢ်လိၤလိၤဆူ တၢ်ဂီၤတ့ခၠဲၣ်အံၤအချၢန့ၣ်လီၤ. အက့ၢ်အဂီၢ်န့ၣ် ပှၤတနီၤထံၣ်ဝဲလၢ, ရဲဘရဲး တ့နုာ်ဝဲ အနီၢ်ကစၢ် ခံဂၤတဂၤအဂီၤ, ဒီးဖျါလၢအသံကွၢ် ပှၤလၢအကွၢ်ကီတၢ်တ့ခၠဲၣ်တၢ်ဂီၤ ကိးဂၤဒဲးလၢ, “နၤမီၣ်, နတပာ်ဃုာ်ဖဲန့ၣ်စ့ၢ်ကီးဘၣ်ဧါ” န့ၣ်လီၤ.

အနီၢ်ကစၢ်ဒၣ်ဝဲ စီၤပီလူး ထံၣ်လီၤက့ၤအသး,မ့ၢ်လၢ ကစၢ်ယ့ၣ်ရှူး တူၢ်ဘၣ်တၢ်နးတၢ်ဖှီၣ်, ဒီးတူၢ်သံအသးလၢပဂီၢ်အဃိ, ပကြၢးထံၣ်လီၤက့ၤပသးစ့ၢ်ကီးန့ၣ်လီၤ. ရိမ့ၤ ၅:၁၀ အပူၤန့ၣ် စီၤပီလူး ပာ်ဖျါထီၣ် အနီၢ်ကစၢ်, ဒီးပဝဲနၤယၤတဖၣ် ဒ်အမ့ၢ် “ကစၢ်ယွၤအဒုၣ်အဒါတဖၣ်” န့ၣ်လီၤ. ပတၢ်ဒဲးဘးန့ၣ် ဒုးကဲထီၣ် ကစၢ်ယ့ၣ်ရှူးအတၢ်သံဘၣ်ဆၣ်, ကစၢ်ယ့ၣ်ရှူး အတၢ်သံန့ၣ်, မၤဘၣ်လိာ်ဖိးဒ့က့ၤပှၤဒီးယွၤ- ဒီးအဆၢဖိ ၈ စံးဘၣ်ပှၤလၢ “ဖဲပမ့ၢ်ပှၤတၢ်ဒဲးဖိအဖၢမုၢ်ဒီး, ခရံာ်ဒိးသံအသးလၢပဂီၢ်သတးဒီး ယွၤပာ်ဖျါထီၣ် အတၢ်အဲၣ်တၢ်ကွံဒၣ်ဝဲလၢပှၤ” န့ၣ်လီၤ.

ဒ် ရဲဘရဲး, ဒီးစီၤပီလူးအသိး ပဝဲစ့ၢ်ကီး ပမ့ၢ်ပှၤတၢ်ဒဲးဘးဖိတဖၣ်လၢ အလိၣ်ဘၣ် တၢ်ပျၢ်ပတၢ်ဒဲးဘးန့ၣ်လီၤ. ခီဖျိလၢအထူၣ်စုညါန့ၣ်, ကစၢ်ယ့ၣ်ရှူး ဟ့ၣ်လီၤပှၤ တၢ်လၢပမၤပနီၢ်ကစၢ်ဒၣ်ဝဲတန့ၢ်နီတဘျီ, ဒ်သိးဒီးပကဒိးန့ၢ် တၢ်လၢပလိၣ်ဘၣ် အဒိၣ်ကတၢၢ်, လၢအမ့ၢ် တၢ်စးထီၣ် တၢ်အိၣ်မူအသီဒီးယွၤန့ၣ်လီၤ.