ဘၣ်မနုၤအဃိ, ပှၤကညီတဖၣ် ညီနုၢ်မၤကမၣ်တၢ်ဒၣ်လဲာ် နာ်ဝဲလၢ အဝဲသ့ၣ်မၤတၢ်န့ၣ် မ့ၢ်တၢ်လၢအဘၣ်လီၤအဂ့ၢ်န့ၣ် ပှၤကွဲးလံာ်လဲၢ် ကၠူလံၣ်ယၤ ကၤလဲး (Julia Galef) ကွၢ်ထံဆိကမိၣ်ဝဲ, ဒီးစံးဝဲဒၣ်လၢ တၢ်ဂ့ၢ်အံၤန့ၣ်, ဘၣ်ထွဲလိာ်အသးဒီး ပှၤသုးဖိအတၢ်ပာ်သူၣ်ပာ်သး အဂၢၢ်အကျၢၤ (Soldier Mindset) န့ၣ်လီၤ. တၢ်ဂ့ၢ်ကီအံၤ ထီဒါလိာ်အသးဒီး တၢ်လၢပသ့ၣ်ညါတ့ၢ်, နာ်တ့ၢ်တၢ်တဖၣ်န့ၣ်ဒီး, တၢ်ပျံၤတၢ်ဖုးအိၣ်ထီၣ်ဝဲအဃိ, ပညိၣ်ပာ်ဖှိၣ်ဝဲလၢ တၢ်ကဒီတဒၢ တၢ်ဂ့ၢ်ကီတဖၣ်န့ၣ်လီၤ. မ့မ့ၢ် သးစၢ်လၢ အဃုသ့ၣ်ညါ မၤလိတၢ်တဂၤ အတၢ်ပာ်သူၣ်ပာ်သး (Scout Mindset) န့ၣ်, လၢတၢ်ဒီတဒၢတၢ်ပျံၤတၢ်ဖုးအလီၢ်န့ၣ် အဝဲ လူၤဃုထံၣ်န့ၢ် တၢ်မ့ၢ်တၢ်တီနီၢ်နီၢ်န့ၣ်လီၤ. တၢ်မ့ၢ်တၢ်တီလၢ ပကတူၢ်လိာ်အီၤကီမ့ၢ်ဂ့ၤ, တၢ်လၢတမုာ်တလၤဒၣ်လဲာ်မ့ၢ်ဂ့ၤ, တၢ်လၢအလီၤသးဘၣ်အၢမ့ၢ်ဂ့ၤ တၢ်ပာ်သး တမံၤအံၤ တသ့ဖဲအသ့န့ၣ် ဂုာ်ကျဲးစၢး ဃုသ့ၣ်ညါတၢ်, ဒီးမၤနၢ်ပၢၢ်အသးန့ၣ်လီၤ. ပှၤလၢအအိၣ်ဒီးသးတမံၤအံၤန့ၣ် အိၣ်ဒီးတၢ်ဆီၣ်လီၤသး လၢအဃုသ့ၣ်ညါနၢၢ်ပၢၢ်အါထီၣ်တၢ် ဆူညါ ကွ့ၢ်ကွ့ၢ်န့ၣ်လီၤ.
ကၤလဲး အတၢ်ထံၣ်အံၤ ဒုးသ့ၣ်နီၣ်ထီၣ်က့ၤပှၤ, ဒ်သိးဒီးပှၤစူၢ်က့ၤနာ်က့ၤတၢ်ဖိတဖၣ် ကအိၣ်ဒီးတၢ်ပာ်သူၣ်ပာ်သးတမံၤဃီဒ်သိးအံၤန့ၣ်လီၤ. စီၤယၤကိာ် ဟ့ၣ်ဂံၢ်ဟ့ၣ်ဘါဝဲလၢ ယၤကိာ် ၁:၁၉ အပူၤ, “မ်ပှၤနၢ်ဟူတၢ်ချ့သဒံး, ကတိၤတၢ်နီၢ်ကတုၤ, သးထီၣ်နီၢ်ကတုၤ ကိးဂၤဒဲးတက့ၢ်” န့ၣ်လီၤ. အဆၢဖိ ၂၀ စံးဘၣ်ပှၤလၢ တၢ်မၤဆၢက့ၤပှၤဂၤတဘျီဃီအလီၢ်န့ၣ်, စီၤယၤကိာ်သဆၣ်ထီၣ် ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ် ကသ့ၣ်နီၣ်ထီၣ်က့ၤဝဲလၢ “ပှၤကညီအသးဒိၣ်ထီၣ်န့ၣ်, တမၤဘၣ်ယွၤအတၢ်တီတၢ်လိၤဘၣ်” န့ၣ်လီၤ. အဆၢဖိ ၂၁ ပာ်ဖျါဝဲလၢ တၢ်ဒိၣ်ထီၣ်လၢတၢ်ကူၣ်သ့န့ၣ်, မၤအသးသ့ခီဖျိ တၢ်ဟ့ၣ်လီၤအးလီၤသးလၢတၢ်ဆီၣ်လီၤသးဆူ ကစၢ်ယွၤအဘျုးအဖှိၣ် (ကွၢ် တံတူး ၂:၁၁-၁၄) န့ၣ်လီၤ.
ဖဲပသ့ၣ်နီၣ်ထီၣ်က့ၤ ပတၢ်အိၣ်မူကိးဆၢကိးကတီၢ်ဒဲးန့ၣ်, သန့ၤထီၣ်အသးလၢ ကစၢ်ယွၤ အဘျုးအဖှိၣ်, ဒီးတမ့ၢ်လၢပဃိဘၣ်န့ၣ်ဒီး, တၢ်လၢပမၤတဖၣ်ဘၣ်ဝဲ, မ့ၢ်ဝဲထီဘိလီၤန့ၣ် ပပျဲပျၢ်ကွံာ်သ့ဝဲဒၣ်န့ၣ်လီၤ. ဒီး ယၤ ၁:၂၅-၂၇ ပာ်ဖျါဝဲလၢ ပကဘၣ်အိၣ်မူအိၣ်ဂဲၤဒ်လဲၣ်, ဒီးသးအိၣ်ကဟုကယာ် ပှၤဂၤဂ့ၤဂ့ၤဘၣ်ဘၣ်ဒ်လဲၣ်အဂီၢ်န့ၣ် ပသန့ၤလီၤပသးလၢ ယွၤအတၢ်နဲၣ်ဆှၢပှၤသ့ဝဲဒၣ်န့ၣ်လီၤ.
