အဲၣ်ရ့ (Erin) မ့ၢ်ဝဲဒၣ် စရ့မုၣ်တဂၤ, ဒီးထီဘိန့ၣ် မၤဝဲအတၢ်မၤ အဂ့ၤကတၢၢ်န့ၣ်လီၤ. ဘၣ်ဆၣ် တုၤတၢ်ပာ်ဒ့ၣ်ပာ်ကမၣ်အီၤလၢ မၤတၢ်တတီတလိၤအဃိ, ဒီးဖဲလၢတၢ်သမံသမိးအီၤအကတီၢ်န့ၣ် ဘၣ်တၢ်ဆိကတီၢ်ကွံာ်အတၢ်မၤ, တစိၤတလီၢ်န့ၣ်လီၤ. ဒ်သိးကထီဒါဝဲ ပှၤလၢအပာ်ဒ့ၣ်ပာ်ကမၣ်အီၤအဂီၢ်, ပာ်လီၤအသးလၢကဟးထီၣ် တၢ်မၤဘၣ်ဆၣ်, ပှၤဟ့ၣ်ကူၣ်အီၤလၢ ကအိၣ်ခိးကွၢ်ဒံးဝဲ တစိၤတလီၢ်န့ၣ်လီၤ. ပှၤစံးဘၣ်အီၤလၢ “နမ့ၢ်ဟးထီၣ်တၢ်မၤန့ၣ်ဒီး, ပှၤကစံးလၢနတၢ်ကမၣ်အိၣ်အဃိ” န့ၣ်လီၤ. ဒီးအဲၣ်ရ့ အိၣ်ခိးကွၢ်ဝဲ, ဒီးဃ့ထုကဖၣ် ကစၢ်ယွၤ လၢကဒိးန့ၢ် တၢ်စံၣ်ညီၣ်တီအဂီၢ်န့ၣ်လီၤ. လါတဖၣ်ပူၤကွံာ်ဝံၤန့ၣ်ဒီး, ဖျါလၢအတၢ်ကမၣ်တအိၣ်ဘၣ်န့ၣ်လီၤ.
စီၤယိၤဟၣ်မၢ်ကူး တူၢ်ဘၣ်ဝဲဒ်သိးအံၤ, ဖဲလၢ စီၤပီလူး ပာ်တ့ၢ်အီၤလၢတၢ်စိာ်ဆှၢတၢ်သးခုကစီၣ်အတၢ်မၤန့ၣ်လီၤ. နီၢ်နီၢ်န့ၣ်, မၤ ၁၅:၃၇-၃၈ ပာ်ဖျါဝဲလၢ ပှၤသးစၢ်တဂၤအံၤ, ပာ်တ့ၢ်ဆိအဝဲသ့ၣ်န့ၣ်လီၤ. ဘၣ်ဆၣ် ကပီၢ်ယၢ်လီၤက့ၤအသးသ့ၣ်သ့ၣ်လၢတၢ်ဂ့ၢ်အံၤအဃိ, ဒီးမုၢ်လၢ်ဝဲလၢ, တၢ်သးခုကစီၣ်အတၢ်လဲၤတဘျီအံၤန့ၣ် ကလဲၤဘၣ်ဝဲဒၣ်န့ၣ်လီၤ. စီၤမၢ်ကူး တူၢ်ဘၣ်ဝဲလၢ, စီၤပီလူး န့ၣ် တစံၣ်ညီၣ်တီအီၤဘၣ်. ပှၤလၢအနာ်အီၤန့ၣ် မ့ၢ်ဒၣ်ထဲ စီၤဘၤနါဘၤ တဂၤဧိၤန့ၣ်လီၤ.
အါနံၣ်အါလါ လဲၤပူၤကွံာ်ဝံၤန့ၣ်ဒီး, စီၤပီလူး အတၢ်ပာ်သူၣ်ပာ်သးလၢအီၤန့ၣ် ဆီတလဲအသး, ဒီး ၂ တံၤ ၄:၁၁ အပူၤန့ၣ် စံးဝဲဒၣ်လၢ, “ဟံးန့ၢ် စီၤမၢ်ကူးဒီး, မၢအဟဲဒီးနၤတက့ၢ်. အဂ့ၢ်ဒ်အံၤ လၢတၢ်အခ့အပှၤအတၢ်မၤန့ၣ်အပူၤ, အဝဲဒၣ်မၤတၢ်လၢယဂီၢ်အဘျုးအိၣ်” န့ၣ်လီၤ. မ့ၢ်လၢအမံၤသၣ်, အလၤကပီၤန့ၣ်, ဘၣ်လိာ်ဖိးဒ့က့ၤဝဲအဃိ, စီၤယိၤဟၣ်မၢ်ကူး အသးဖှံထီၣ်, မုာ်ထီၣ်ဝဲဒၣ်န့ၣ်လီၤ.
ဖဲတၢ်စံၣ်ညီၣ်ပှၤ တတီၤတလိၤအကတီၢ်, မ်ပကသ့ၣ်နီၣ်ထီၣ်က့ၤလၢ ပတူၢ်ဘၣ်တၢ်ဒ်လဲၣ်န့ၣ် ကစၢ်ယ့ၣ်ရှူး သ့ၣ်ညါနၢ်ပၢၢ်ဝဲဒၣ်န့ၣ်လီၤ. ကစၢ်ယ့ၣ်ရှူးအနီၢ်ကစၢ်ဒၣ်ဝဲ တမ့ၢ်ပှၤတၢ်ဒဲးဘးဖိဘၣ်ဆၣ်, တၢ်စံၣ်ညီၣ်အီၤ ဒ်ပှၤတၢ်ဒဲးဘးဖိအသိးန့ၣ်လီၤ. အဝဲမ့ၢ်ယွၤအဖိခွါဘၣ်ဆၣ်, တၢ်မၤဆါအီၤအါန့ၢ်ဒံး ပှၤတၢ်ဒဲးဘးဖိန့ၣ်လီၤ. ဘၣ်ဆၣ်, ကဘၣ်ဒုးနဲၣ်ပာ်ဖျါထီၣ် အဝဲမ့ၢ် ပှၤတီပှၤလိၤလီၤန့ၣ် သ့ၣ်ညါဝဲအဃိ, ကဘၣ်မၤဝဲဆူညါ ဒ်တၢ်ဘၣ်ပၢ်ယွၤအသးန့ၣ်လီၤ. တၢ်မ့ၢ်စံၣ်ညီၣ်နၤ တတီတလိၤန့ၣ်ဒီး, ဃၣ်ကွံာ်နသးတဂ့ၤ. ကစၢ်ယွၤသ့ၣ်ညါ, ဒီးကမၤတၢ်လၢ အဆၢကတီၢ်ဒၣ်ဝဲအပူၤန့ၣ်လီၤ.
