ဖဲအတၢ်နာ်ကစၢ်ယွၤ လီၤမၢ်ဝဲအကတီၢ်, ကမျၢၢ်လၢအဝဲလဲၤသဒၣ်တ့ၢ်ဝဲအမဲာ်ညါန့ၣ် ခဲနံၣ် (Kenny) အိၣ်ဆၢထၢၣ်ဝဲဒၣ်န့ၣ်လီၤ. ဒီးအဝဲအုၣ်အသးလၢ အဒိးန့ၢ်က့ၤ အတၢ်စူၢ်တၢ်နာ်အဂ့ၢ်န့ၣ်လီၤ. အဝဲဒိးန့ၢ်က့ၤဝဲဒၣ်ဒ်လဲၣ်. မ့ၢ်လၢကစၢ်ယွၤထိးဘၣ် အသူၣ်အသး, ခီဖျိလၢ အထံၣ်န့ၢ်ဝဲ တၢ်ဃံတၢ်လၤ, ဒီးတၢ်အက့ၢ်အဂီၤအဂ့ၤအဝါတဖၣ်လၢ ယွၤအတၢ်ဘၣ်တ့တဖၣ်အပူၤအဃိန့ၣ်လီၤ. ဖဲ ခဲနံၣ် ထံၣ်ဘၣ် ကစၢ်ယွၤလီၣ်ဖျါထီၣ်အသး ခီဖျိလၢန့ဆၢၣ် အတၢ်ဃံတၢ်လၤန့ၣ်ဒီး, ကစၢ်ယွၤ ကဲထီၣ်ကဒီး တၢ်ကမၢကမၣ်လၢအဂီၢ်, ဒီးခဲကနံၣ်အံၤ, အဝဲဟံးဃာ်တၢ်ကူၣ်သ့, လၢအဃုထံၣ်န့ၢ်ဝဲ ကစၢ်ယွၤလီၣ်ဖျါထီၣ်အသး လီၤလီၤဆီဆီလၢလံာ်စီဆှံအပူၤန့ၣ်လီၤ. အဝဲတဲဖျါထီၣ်အဂ့ၢ်အကျိၤဝံၤန့ၣ်ဒီး, လဲၤလီၤဝဲဆူထံကမါလၢ တၢ်ဘါသရိာ်အမဲာ်ညါအပူၤန့ၣ်လီၤ. မ့ၢ်လၢအစူၢ်က့ၤနာ်က့ၤ ကစၢ်ယ့ၣ်ရှူးခရံာ်အဃိ, အပၢ်န့ၣ် လၢတၢ်သးခုအမဲာ်ထံမဲာ်နိအပူၤ ဒိးစုၣ်ဒိးဘျၢအီၤန့ၣ်လီၤ.

စီၤယိၤဘးစ့ၢ်ကီး လၢအတၢ်အိၣ်မူအပူၤန့ၣ် ဘၣ်ကွၢ်ဆၢၣ်မဲာ်ဒီးတၢ်လီၤမၢ်ဝံၤ အလီၢ်ခံ, အတၢ်စူၢ်တၢ်နာ် ကဒံကဒါဝဲဒၣ်န့ၣ်လီၤ. ယိၤဘး ၃၀:၂၀ အပူၤန့ၣ် စီၤယိၤဘးပာ်ဖျါဝဲလၢ, “ယကိးထီၣ်နၤဒီး နတစံးဆၢဘၣ်ယၤဘၣ်. ယဆၢထၢၣ်ဒီး နတပာ်ကဲဘၣ်ယၤဘၣ်” န့ၣ်လီၤ. ဘး ၃၈:၁ စံးဘၣ်ပှၤ “ဒီးယွၤစံးဆၢ စီၤယိၤဘးလၢ ကလံၤသဝံးအပူၤ,” ဒီးစံးဘၣ် စီၤယိၤဘး, “တမ့ၢ်လၢ ယတထံၣ်နၤဘၣ်. အလီၢ်အိၣ်လၢ နကဘၣ် မၤလဲၢ်ထီၣ်နတၢ်ထံၣ်, ဖဲနဆိကမိၣ်ထီၣ် ယွၤအတၢ်ဘၣ်တ့လၢအလီၤကမၢကမၣ်, ဒီးနၢ်ပၢၢ်အီၤကီတဖၣ်” န့ၣ်လီၤ. အဆၢဖိ ၄,၇ ပာ်ဖျါဝဲ ဟီၣ်ခိၣ်အခီၣ်ထံး, ဒီးဆၣ်တူၢ်ဂီၤတဖၣ်, အဆၢဖိ ၈-၄၁ ပာ်ဖျါဝဲ ယွၤအတၢ်ဘၣ်တ့ ဆၣ်ဖိကီၢ်ဖိတဖၣ်, သ့ၣ်ဝၣ်တဖၣ်, ဒီးထံနိအိၣ်လၢမူခိၣ်, အိၣ်လၢဟီၣ်ခိၣ်တဖၣ်န့ၣ် ဒုးနဲၣ်ယူာ်ဃီၤအသးဆူ ယွၤတဂၤဧိၤ လၢစီၤယိၤဘး ကဘၣ်နာ်န့ၢ်အီၤသ့တဂၤ, တၢ်အဲၣ်အလီၤလိၢ်လီၤလး, ဒီးတၢ်စိတၢ်ကမီၤအကစၢ်တဂၤအအိၣ်န့ၣ်လီၤ. ဘး ၄၂:၅ အပူၤန့ၣ် စီၤယိၤဘး စံးဆၢဝဲ, “ယနၢ်ဟူတ့ၢ်လၢနဂ့ၢ်နကျိၤ လၢယနၢ်နၢ်ဟူတၢ်လီၤ. မ့မ့ၢ် ခဲကနံၣ်အံၤ ယမဲာ်ထံၣ်ဘၣ်နၤလီၤ” န့ၣ်လီၤ.

ဖဲတၢ်သးဒ့ဒီ ကဟဲမၤဟးဂီၤ, မၤလီၤမၢ် နတၢ်စူၢ်တၢ်နာ် ကစၢ်ယ့ၣ်ရှူးခရံာ်န့ၣ်ဒီး, ဆိကမိၣ်ထီၣ် ယွၤအတၢ်ဘၣ်တ့ အတၢ်လီၤဘီလီၤမုၢ်တဖၣ်န့ၣ်တက့ၢ်. ပမ့ၢ်အိၣ်ဒီး ပမဲာ်ချံအတၢ်ထံၣ်န့ၣ် ပကထံၣ်ဘၣ် ကစၢ်ယွၤလီၣ်ဖျါထီၣ်အသးလၢအတၢ်ဘၣ်တ့
တဖၣ်အပူၤန့ၣ်လီၤ.