ဖဲ ဖံလ့းဘရိးစ် လဲၤဟးဆူ ဝ့ၢ်ဘ့ၤသလ့ဃ့ၣ်ဝံၤန့ၣ် အဝဲကွဲး “ဘ့ၤသလ့ဃ့ၣ်ဝ့ၢ်ဆံး”တၢ်သးဝံၣ် အဖျၢၣ် တဖၣ်လၢ အဘၣ်တၢ်အဲၣ်အီၤန့ၣ်လီၤ. အဝဲမ့ၢ် တၢ်အိၣ်ဖှိၣ်သရၣ်တဂၤလၢကီၢ်အမဲရကၤဒီး, အဝဲအသးဟူးဂဲၤတုၤဒၣ်လဲာ် ကွဲးလီၤလံာ်ဆူ အအိၣ်ဘှံးနံၤတၢ်မၤလိကၠိဖိတဖၣ်လၢ “ယသ့ၣ်နီၣ်ထီၣ်က့ၤ ဖဲတၢ်သဂၢၢ်ခရံာ်အိၣ်ဖျဲၣ်အဟါ တချုးတုၤန့ၣ် ယဆၢထၢၣ်လၢ သရိာ်လီၢ်လံၤတဖျၢၣ်အပူၤ လၢဝ့ၢ်ဘ့ၤသလ့ဃ့ၣ် ဖဲအအိၣ်ဘူးဒီး ဖိသၣ်ယ့ၣ်ရှူး အိၣ်ဖျဲၣ်ထီၣ်အလီၢ်န့ၣ်လီၤ. တၢ်အိၣ်ဖှိၣ်ဒီတဖု သးဝံၣ်စံးထီၣ်ပတြၢၤကစၢ်ယွၤလၢတၢ်သးဝံၣ်လီၤဘီလီၤမုၢ်တဖၣ် တယုၢ်ဝံၤတယုၢ် တဘျီဝံၤတဘျီန့ၣ်လီၤ. တၢ်မၤအသးဒ်သိး ယနၢ်ဟူဘၣ် တၢ်လၢယသ့ၣ်ညါဂ့ၤဂ့ၤ လၢအစံးဘၣ် တဲဘၣ် ပှၤတဂၤဒီးတဂၤ အုၣ်ခီၣ်ကစၢ် အတၢ်အိၣ်ဖျဲၣ်ထီၣ် နၤစီဆှံ နၤလီၤလးအဂ့ၢ်”န့ၣ်လီၤ.
ဖဲ ၁၈၆၈ န့ၣ် ဘရိးစ် စၢၢ်က့ၤ အတၢ်ဆိကမိၣ်တဖၣ်လၢ ထါတယုၢ်ဒီး, တၢ်အိၣ်ဖှိၣ်အပှၤဒ့တနၢ် တ့က့ၤအထါဆူ တၢ်သးဝံၣ်န့ၣ်လီၤ. “အိဘ့ၤသလ့ဃ့ၣ်ဝ့ၢ်ဆံးဧၢ, နအိၣ်ဘှ့ၣ်နဲဆံးအါ, …နံၣ်ဧိၤလါဧိၤအတၢ်မုၢ်လၢ် တနံၤအံၤပှဲၤထီၣ်မး”. တၢ်သးဝံၣ်အံၤ ပာ်ဖျါဝဲ တၢ်ဘှ့ၣ်တၢ်ဘှီၣ်ဒီးတၢ်မုာ်တၢ်ခုၣ် ဖဲကီၢ်အမဲရကၤထံလီၢ်ကီၢ်ပူၤ တၢ်ဒုးတၢ်ယၤ ဝံၤအလီၢ်ခံ တၢ်သဘံၣ်ဘုၣ်အိၣ်ဒံးဝဲအဖၢမုၢ်န့ၣ်လီၤ.
အပျဲၢ်အဘီၣ် စီၤမးသဲ ကွဲးဖျါထီၣ် တၢ်အုၣ်ခီၣ်ကစၢ် အိၣ်ဖျဲၣ်ထီၣ်အဂ့ၢ် ဖဲလံာ်မးသဲ အဆၢဒိၣ်ခံန့ၣ်လီၤ. ပှၤမၤကူးတဖၣ် ဟဲဝဲလၢမုၢ်ထီၣ်, ပိာ်ထီၣ် ဆၣ်တဖျၢၣ် အခံလၢအလဲၤတၢ်လၢအမဲာ်ညါ ဆူဝ့ၢ်ဘ့ၤသလ့ဃ့ၣ်(မံကၤ ၅:၂), ဒီး ဖဲအထံၣ်ဘၣ် ဖိသၣ်ယ့ၣ်ရှူးန့ၣ် သူၣ်ခုသးခုဒီးတၢ်သးခုဒိၣ်ဒိၣ်ကလဲာ်လီၤ(မး ၂:၁၀).
တနံၤအံၤ ဖဲပမၤလၤကပီၤ ပှၤမၤကူးသၢဂၤ(အ့ဖံပနံၣ်)အကတီၢ်န့ၣ် ပဝဲစ့ၢ်ကီး ပလိၣ်ဘၣ် တၢ်အုၣ်ခီၣ်ကစၢ် အိၣ်ဖျဲၣ်ထီၣ် အတၢ်ကစီၣ်န့ၣ်လီၤ. ဒ်ထါသးဝံၣ်ဖိ ဒုးသ့ၣ်နီၣ်ပှၤအသိး “…ပတၢ်ဒဲးဘးစူးကွံာ်ဒီးနုာ်, ပပူၤအိၣ်ဖျဲၣ်နဲစ့ၢ်”န့ၣ်လီၤ.
