ဘၣ်တနံၣ်န့ၣ်, ပတၢ်အိၣ်ဖှိၣ်ခိၣ်နၢ်သ့ၣ်တဖၣ် ကွဲမုၥ်ပှၤလၢ ဒ်ပကထၢဖှိၣ်တၢ်ကိးနွံဒဲး ဒ်အညီနုၢ်အသိးအမဲာ်ညါ ပကဟ့ၣ်အါထီၣ် တၢ်မၤဘူၣ်- လၢတၢ်ကသူၣ်ထီၣ် (gym)တၢ်ဂဲၤဂ့ၤ က့ၢ်ဂီၤဒၢး တၢ်လီၢ်ပျီတခါ လၢကကဲထီၣ်တၢ်မၤစၢၤ ဒီးကမၤဘၣ် တၢ်သးခုကစီၣ် တၢ်မၤဆူ ပှၤတဝၢဖိအအိၣ်န့ၣ်လီၤ. မ့ၢ်လၢယအိၣ်ဒီးတၢ်လၢၥ်ဘူၣ်လၢၥ်စ့ၤ လၢကသံၣ်ကသီဒီး တၢ်အိၣ်ဆူၣ်အိၣ်ချ့အလဲသ့ၣ်တဖၣ်အဃိ ယသံကွၢ်ယဝၤသးဘိလၢ “မ့ၢ်နဆိကမိၣ်လၢ ပမၤကထီၣ်ဘးဧါ”န့ၣ်လီၤ. ယဝၤသးဘိ ကျၢၢ်ကျၥ်အခိၣ် ဒီးစံးဝဲဒၣ် “ဟ့ၣ်တၢ်အံၤ မ့ၢ်ဝဲဒၣ်ယွၤအတၢ်ခဲလၢၥ်တမ့ၢ်ဘၣ်ဧါ. အဝဲကဆီၣ်ထွဲမၤစၢၤတၢ်လၢ ပလိၣ်ဘၣ်ခဲလၢၥ်လီၤ.” ဒ်အစံးဝဲအသိး ပမၤထီၣ်ဘးဝဲန့ၣ်လီၤ. ဖဲတၢ်ဆၢကတီၢ်ပူၤကွံာ် အနံၣ်တဆံန့ၣ်, ပတၢ်အိၣ်ဖှိၣ် အိၣ်ဒီးခွဲးလီၤဆီလၢ ပမၤဘၣ်ကစၢ်ယ့ၣ်ရှုး ခီဖျိတိစၢၤမၤစၢၤဘၣ် ပှၤလၢအအိၣ်ဖဲလီၢ်ကဝီၤ လၢတၢ်အပိးအလီတခါအံၤန့ၣ်လီၤ.

ဖဲ ၁ ကွဲးနီၣ်တၢ် ၂၉, စီၤပၤစီၤဒၤဝံး နဲၣ်ဖျါထီၣ် အတၢ်အၢၣ်လီၤ ဘၣ်ဃးဒီး တၢ်ဆီၣ်ထွဲမၤစၢၤ စီၤရှလိၤမိၤ ဆူအံၣ်စရ့လးခိၣ်နၢ် သ့ၣ်တဖၣ်န့ၣ်လီၤ. စီၤရှလိၤမိၤ မ့ၢ်ယွၤအတၢ်ဃုထၢ လၢကဟံးန့ၢ်စီၤပၤအလီၢ် ဒီးကဘှီထီၣ် ကစၢ်ယွၤ တၢ်လုၢ်ဟံၣ်န့ၣ်လီၤ (:၁-၅). ပှၤကိးဂၤ မၤထွဲတၢ်ဒီး“မၤဘူၣ်တီနံဒၣ်တၢ်” ဒီး“အသူၣ်ခုသးခုဝဲလီၤ”(:၆၊၉). စီၤဒၤဝံး စံးထီၣ်ပတြၢၤဒီး ကိးဖျါထီၣ်လၢ “ကယဲၢ်တၢ်အိၣ်ဝဲလၢမူခိၣ်, ဒီးအိၣ်ဝဲလၢဟီၣ်ခိၣ် မ့ၢ်နတၢ်လီၤ.” (:၁၁). ဒီးဃ့ဘါထုကဖၣ်လၢ “ယွၤပကစၢ်, တၢ်ဖိတၢ်လံၤလၢ ပကတဲာ်ကတီၤတ့ၢ်ခဲလၢာ်အံၤ, ဒ်သိးပကသူၣ်ဟံၣ်လၢ နမံၤစီဆှံအဂီၢ်န့ၣ် ဟဲဝဲလၢ နစုပူၤ, ဒီးမ့ၢ်နတၢ်ဒၣ်နဲ အိၣ်ဒီးနၤခဲလၢာ်လီၤ.” (:၁၆).

ဒ်ပဆိကမိၣ် တၢ်လၢယွၤမၤတ့ၢ်သ့ၣ်တဖၣ် ဒီးတၢ်ဟ့ၣ်ဆူပအိၣ်- လီၤဆီဒၣ်တၢ် ပတၢ်ဘၣ်ထွဲဒီး ကစၢ်ယ့ၣ်ရှုး – တၢ်ဟ့ၣ်လၢပှၤတဂၤလၣ်လၣ် န့ၢ်ဘၣ်ဝဲန့ၣ်, ပသ့အိၣ်မူပၥ်ဖျါ ပတၢ်ဘူၣ်ထီၣ်ဘါထီၣ်, တၢ်သ့ၣ်ညါစံးဘျူး, ဒီးပတၢ်အဲၣ်သ့ၣ်တဖၣ် ခီဖျိ တၢ်က့ၤဟ့ၣ်ကဒါက့ၤတၢ် ဆူကစၢ်ယွၤတဂၤ လၢအမ့ၢ်ပှၤဟ့ၣ်တၢ်အဂ့ၤကတၢၢ်န့ၣ်လီၤ.