ဖဲနံၣ်ထီၣ်သီအခီၣ်ထံးတနံၤ, တၢ်မၤပျံၤမၤဖုး မၤပၢၢ်ထီၣ်ယၤ ဖဲဂီၤ ၃ နၣ်ရံၣ် န့ၣ်လီၤ. နံၣ်တနံၣ်အံၤ မၤဝံမၤဃၢယၤ ဃုၥ်ဒီး တၢ်ဖုးသံပျီၢ်ဂီၤသ့ၣ်တဖၣ် ဒိၣ်ယိၣ်မးန့ၣ်လီၤ. ဟံၣ်ဖိဃီဖိတၢ်အိၣ်ဆူၣ်အိၣ်ချ့တဂ့ၤတဝါသ့ၣ်တဖၣ် ဟ့ၣ်ယၤတၢ်ဘၣ်ယိၥ်ဘၣ်ဘီ တုၤခဲအံၤ, တၢ်ဆိကမိၣ်သ့ၣ်တဖၣ် လၢခါဆူညါအဂီၢ် မၤပျံၤမၤဖုးယၤစ့ၢ်ကီးန့ၣ်လီၤ. ယတၢ်ဆိကမိၣ်လဲၤအသးလၢ တၢ်တတၢၢ်တနါသ့ၣ်တဖၣ် ကအါထီၣ်ဧါ န့ၣ်လီၤ.
တၢ်တဂ့ၤတဝါသ့ၣ်တဖၣ် ကဲထီၣ်အဃိ ကစၢ်ယ့ၣ်ရှုးအပျဲၢ်အဘီၣ်သ့ၣ်တဖၣ် အိၣ်ဒီးတၢ်ပျံၤတၢ်ဖုးတၢ်ဘၣ်ယိၥ်န့ၣ်လီၤ. အကစၢ်ဒၣ်လဲၥ် ကတဲၥ်ကတီၤ ဒီးအုၣ်ကီၤတၢ်ဖဲ တချုးအသံနံၤသီသနၥ်က့ ပျဲၢ်ဘီၣ်သ့ၣ်တဖၣ် ပျံၤတၢ်ကွ့ၢ်ကွ့ၢ်ဒံးန့ၣ်လီၤ. ဖဲကစၢ်တၢ်ဘၣ်ဖီၣ်န့ၢ်အီၤ အခါ အဝဲသ့ၣ်တဖၣ်ဃ့ၢ်ဖျိးကွံၥ်ဝဲ (မး ၂၆ : ၅၆), စီၤပ့းတရူး သမၢကွ့ၥ်အီၤ (ယိၤ ၁၈:၁၅-၁၇,၂၅-၂၇), ဒီးအိၣ်တဒၢ ပၥ်ခူသူၣ်အသးန့ၣ်လီၤ (၂၀ : ၁၉) ဖဲကစၢ်ယ့ၣ်ရှုးဘၣ်တၢ်ဖီၣ်ဃၥ်အီၤဒီး ဘၣ်တၢ်ပျၤထီအီၤလၢ ထူၣ်ဆူညါအလိၤ, ဒီးတၢ်မၤအၢမၤသီတၢ်အခါ အဝဲသ့ၣ်တဖၣ် အတၢ်မၤဆၢတၢ်သဘံၣ်ဘုၣ်အံၤ တလီၤပလိာ်ဒီး ကစၢ်ယ့ၣ်ရှုး အတၢ်မၤလိၥ်ဒီး အတၢ်အၢၣ်လီၤ လၢအစံးဝဲ “ပၥ်သုသးခူတလ့ၣ်တက့ၢ်. ယမၤနၢၤလံဟီၣ်ခိၣ်လံ“ န့ၣ်လီၤ. (၁၆:၃၃)
ဘၣ်ဆၣ် ကစၢ်ခရံၥ် အတၢ်သံဒီးဂဲၤဆၢထၢၣ်သမူထီၣ်က့ၤအံၤ အုၣ်ခီၣ်အသး လၢအစိအကမီၤ ပၢၤဃၥ် တၢ်မူဒီး တၢ်သံန့ၣ်လီၤ. ကစၢ်အံၤ အိၣ်ဒီးတၢ်မၤနၢၤနီၢ်နီၢ်န့ၣ်လီၤ. ဟီၣ်ခိၣ်အံၤ ပှဲၤဝဲဒီး တၢ်ဒဲဘးအဃိ ပကတူၢ်ဘၣ်တၢ် နီၢ်ကီၢ်သနၥ်က့, ခီဖျိယွၤလၢ အကူၣ်သ့ဒီးအဲၣ်တၢ်သ့ အတၢ်မ့ၢ်တၢ်တီအံၤ ဘၣ်ထွဲဒီး တၢ်ကိးမံၤအဃိ ပအိၣ်ဘှံးသ့လၢအပူၤန့ၣ်လီၤ. ကစၢ်ယ့ၣ်ရှုးအံၤ အိၣ်ဖျါထီၣ်လၢပသိးပကျါ (၁၆:၃၂ – ၃၃), ဒ်ကစၢ်အိၣ်ဖျါထီၣ်အသးလၢ အပျဲၣ်အဘီၣ်သ့ၣ်တဖၣ်အသိး န့ၣ်လီၤ. လၢခံ အဝဲသ့ၣ်တဖၣ် လၢတၢ်သးခူတလ့ၢ်အိၣ်အပူၤ လဲၤဆူဟီၣ်ခိၣ်ဒီဘ့ၣ် ဒီးစံၣ်တဲၣ်တဲလီၤ တၢ်သးခုအကစီၣ်န့ၣ်လီၤ. ကစၢ်လၢအပၢၤဃာ်တၢ်ခဲလၢာ်တဂၤ အတၢ်အၢၣ်လီၤအံၤ မ်ကမၤဆူၣ်ထီၣ် ပဂံၢ်ပဘါ ဒ်သိးပကသန့ၤပသးလၢအီၤ လၢနံၣ်သီလါသီအပူၤန့ၣ်တက့ၢ်. ဒီး ဖဲလၢပတသ့ၣ်ညါဘၣ် ခါဆူညါတၢ်ကမၤအသးတဖၣ်အခါ မ်အတၢ်အၢၣ်လီၤအံၤ ကဟ့ၣ်ပှၤ တၢ်သူၣ်ဒူသးဒူန့ၣ်တက့ၢ်.
