ဖဲကလံၤမုၢ် ဟါရံက့ လီရၤ (Hurricane Laura) လၢ ကီၢ်မဲးကစံၣ်ကိၣ် ပီၣ်လဲၣ်က့ၢ်အကျိၤန့ၣ် အခိၣ်လိၤဝဲဆူ ကီၢ်အမဲရံကၤ လူၢ်ဝံၣ်စံၣ်ဧါနါ အပီၣ်လဲၣ်ကၢၢ်နံၤအကတီၢ်, တၢ်ဟ့ၣ်ပလီၢ်သ့ၣ်တဖၣ် မ့ၢ်တၢ်လီၤပျံၤလီၤဖုးဒိၣ်မးန့ၣ်လီၤ. ပၢၤကီၢ်အခိၣ်တဂၤ ပာ်သူၣ်ပာ်သးဝဲလၢ ကလံၤမုၢ် အသဟီၣ် ကဆူၣ်ဝဲ တနၣ်ရံၣ် ၁၅၀ မံးလၥ်အဃိ, ဘိးဘၣ်သ့ၣ်ညါဝဲ တၢ်ကစီၣ်လၢ အလီၤသူၣ်ကိၢ်သးဂီၤ- “ဝံသးစူၤ ဟးထီၣ်ကွံၥ်လၢသုတၢ်အိၣ်ဆိးအလီၢ်အကျဲန့ၣ်တက့ၢ်. ဘၣ်ဆၣ်, သုမ့ၢ်အဲၣ်ဒိးအိၣ်တ့ၢ်, ဒီးပဟဲဆူသုအိၣ် မ့ၢ်တသ့ဘၣ်န့ၣ်ဒီး, ကွဲးပၥ်မံၤသၣ်, တၢ်အိၣ်ဆိးလီၢ်, လံာ်တီမီအုၣ်သး (ID), ဘူးတံၢ်အမံၤဝံၤ, ထၢနုၥ်လၢ ထၢၣ်လၢထံဘၣ်စီၣ်အီၤတသ့အပူၤ, ဒီးပာ်လၢသုဆ့ကၤထၢၣ်ပူၤန့ၣ်တက့ၢ်. မ်တၢ်အသုတမၤအသးဒ်သိးအံၤအဂီၢ်န့ၣ် ပဃ့ထုကဖၣ်ဝဲဒၣ်န့ၣ်လီၤ.” ကလံၤမုၢ် လီရၤ မ့ၢ်ဟဲနုာ်လီၤန့ၣ်ဒီး, အဝဲသ့ၣ် အိၣ်ဒၣ်ကဘၣ်ကွၢ်ကီဝဲ ကလံၤမုၢ် အတၢ်မၤဟးဂီၤတၢ်တဖၣ်လီၤန့ၣ် ပှၤမၤစၢၤတၢ်ဖိတဖၣ် သ့ၣ်ညါတ့ၢ်လံန့ၣ်လီၤ.

လံာ်စီဆှံ အလီၢ်လံၤအပူၤန့ၣ်, ဖဲယွၤအပှၤဂီၤမုၢ်တဖၣ် ဘၣ်ကွၢ်ဆၢၣ်မဲာ်ဒီး န့ဆၢၣ် မ့တမ့ၢ် သူၣ်ဂ့ၢ်သးကျိၤ အတၢ်ဂ့ၢ်ကီတဖၣ်တဘျီလၢ်လၢ်န့ၣ် ယွၤအကလုၢ်ကထါလၢအလီၤတံၢ်, လၢအအိၣ်ပှဲၤဒီးတၢ်မုၢ်လၢ်တဖၣ်, ကစၢ်ယွၤ အၢၣ်လီၤဝဲ, လၢတၢ်ဟးဂူာ်ဟးဂီၤအပူၤဒၣ်လဲာ် ယွၤကအိၣ်ဒီးအဝဲသ့ၣ်န့ၣ်လီၤ. ယရှါ ၅၁:၃ ပာ်ဖျါဝဲလၢ “ယွၤမၤမုာ်ထီၣ်က့ၤ အလီၢ်အိၣ်သယုၢ်တဖၣ်, ဒီးပာ်အပှၢ်မုၢ်ကနၢ ဒ်ဧ့ၤဒ့ၣ်အသိး” န့ၣ်လီၤ. တကးဒံးဘၣ်, ထီဘိန့ၣ် ယွၤအုၣ်ကီၤဝဲအပှၤဂီၤမုၢ်လၢ, အဝဲသ့ၣ် မ့ၢ်နာ်သန့ၤအသးဒၣ်ထဲလၢအီၤန့ၣ်ဒီး, တၢ်မၤစၢၤ, ဒီးတၢ်မၤဘျါက့ၤတၢ်န့ၣ် ကပိာ်ထွဲထီၣ်အခံသပှၢ်တၢၢ်န့ၣ်လီၤ. အဆၢဖိ ၆ ပာ်ဖျါဝဲ, မူခိၣ်မ့ၢ်ဒံကွံၥ်ဒ် မ့ၣ်အူခုၣ်အသိးဒၣ်လဲာ်, ယွၤစံးဝဲ “ယတၢ်အုၣ်က့ၤခီၣ်က့ၤ ကအိၣ်ဂၢၢ်ဆိးကျၢၤဝဲ လီၤထူလီၤယိၥ်” န့ၣ်လီၤ. တၢ်လီၤပှီၢ်, တၢ်ဟးဂီၤတဖၣ် ကအိၣ်ထီၣ်ဝဲတမံၤဂ့ၤ, တမံၤဂ့ၤ, ကစၢ်ယွၤ အတၢ်ဂ့ၤတၢ်ဝါအဒိၣ်ကတၢၢ်တမံၤ လၢအပှၤဂီၢ်မုၢ်အဂီၢ်န့ၣ် တဟးဂီၤဝဲနီတဘျီဘၣ်န့ၣ်လီၤ.

ကစၢ်ယွၤ တတြီဒီတဒၢပှၤလၢတၢ်ကီတၢ်ခဲဘၣ်ဆၣ်, အၢၣ်လီၤအီလီၤဝဲလၢ အတၢ်သူၣ်ထီၣ်မၤဘျါက့ၤတၢ်တဖၣ်န့ၣ် အိၣ်ခိးပၥ်စၢၤဆူညါ လၢတၢ်ဟးဂီၤတၢ်လီၤပှီၢ်တဖၣ်ဝံၤန့ၣ်လီၤ.