ပှၤအါဂၤတနၢ်ဟူညီနုၢ်၀ဲ Kate Hankey အဂ့ၢ်အကျိၤဘၣ်န့ၣ်လီၤ. ဘၣ်ဆၣ် အဝဲမ့ၢ် ပိၥ်မုၣ်တဂၤ လၢအလီၤတိၢ်လီၤဆီလၢ ပကြၢးတိၢ်နီၣ်ထီဃၥ်အီၤတဂၤန့ၣ်လီၤ. အဝဲမ့ၢ်ဒၣ် သရၣ်မုၣ်တဂၤ, ပှၤစိၥ်တၢ်သးခုကစီၣ်တဂၤ, ကၠိပှၤရိဖှိၣ်တၢ်တဂၤ, မံးရှ့ၣ်နရံၣ်တဂၤ, ပှၤကွဲးထါတဂၤ ဒီး ဖဲနံၣ် ၁၈၀၀ အကတီၢ်အပူၤန့ၣ် အဝဲဟ့ၣ်လီၤအသးလၢကစၢ်ယ့ၣ်ရှုးအဂီၢ်တီတီလိၤလိၤန့ၣ်လီၤ. ဖဲ ၁၈၆၇ နံၣ်န့ၣ်, Kate ဘၣ်ကွၢ်ဆၢၣ်မဲၥ်ဒီး တၢ်ဆူးတၢ်ဆါ ဒိၣ်ဒိၣ်မုၢ်မုၢ် န့ၣ်လီၤ. အတၢ်ဆူးတၢ်ဆါဘျါထီၣ်က့ၤအကတီၢ်န့ၣ် ကွဲးဝဲဒၣ် ထါဖးထီတယုၢ်ဝံၤ, တဲၥ်ဖးဝဲဒၣ် ခံကူၥ်- “တၢ်တဲပူလၢယသးလီ (The Story Wanted)” ဒီး “တၢ်တဲပူလၢအတဲဘၣ်ယၤ(The Story Told)” န့ၣ်လီၤ. ထါတယုၢ်အံၤ ပၥ်ဖျါထီၣ် အဝဲနီၢ်တဂၤ အတၢ်ပာ်ဖျါ ဘၣ်ထွဲဒီး အတၢ်ရ့လိာ်သးဒီးကစၢ်ယ့ၣ်ရှုး ဃုာ်ဒီးကစၢ်ယ့ၣ်ရှူးအတၢ်အိၣ်မူအဂ့ၢ်အကျိၤန့ၣ်လီၤ.

လံၥ်စီဆှံအဆၢတဖၣ် ဒုးနဲၣ် ကစၢ်ယ့ၣ်ရှုးဒီး ပာ်ဖျါထီၣ်ဝဲ ကစၢ်ယ့ၣ်ရှူးအဂ့ၢ်န့ၣ်လီၤ. အလံၥ်သိၣ်သီတၢ်အပူၤန့ၣ် စီၤယိၤဟၣ် ဒုးသ့ၣ်နီၣ်ပှၤလၢ အဝဲသ့ၣ် အနီၢ်ကစၢ် အတၢ်လဲၤ ခီဖျိဒီး ကစၢ်ယ့ၣ်ရှုးအဂ့ၢ် ဖဲ၁ ယိၤဟၣ် ၁း၁ အပူၤန့ၣ် စံးဝဲဒၣ်, “လၢပထံၣ်လၢပမဲၥ်လံ, လၢပကွၢ်ထံအီၤ, ဒီးလၢပဟံးအီၤလၢပစု, …ဒီးပစံးဘၣ်တဲဘၣ်သုန့ၣ်လီၤ“. မ့ၢ်လၢ အဝဲသ့ၣ်လဲၤခီဖျိဃုၥ်ဒီးအီၤအဃိ,ပှၤတၢ်မၢဖိကွဲးဝဲလၢ ကစံးကတိၤ ကစၢ်ယ့ၣ်ရှုးအဂ့ၢ်န့ၣ် ဖျါဖဲ အဆၢဖိ ၂ , “တၢ်မူအိၣ်ဖျါတ့ၢ်, ဒီးပထံၣ်လံအီၤဒီး ပအုၣ်ပသးန့ၣ်လီၤ.” အကတီၢ်လၢခံ, ဖဲ ၁ ယိၤဟၣ် ၂:၄ အပူၤန့ၣ် စီၤယိၤဟၣ် ပၥ်ဖျါဝဲ “ကစၢ်ယွၤအတၢ်ကတိၤန့ၢ် အိၣ်လၢပပူၤ” , တၢ်ထံၣ်တမံၤလၢအထုးန့ၢ်ပှၤသးန့ၣ်လီၤ. ပမ့ၢ်ပာ်ဖျါထီၣ်လၢတၢ်အဂၤတမံၤန့ၣ်ဒီး ကစၢ်ယ့ၣ်ရှူးအတၢ်တဲပူန့ၣ် မ့ၢ်စ့ၢ်ကီး ပတၢ်တဲပူန့ၣ်လီၤ. ပတၢ်လဲၤခီဖျိဒီးကစၢ်ယ့ၣ်ရှူးန့ၣ် အလီၢ်အိၣ်လၢ ပကဘၣ်စံးကတိၤ ပာ်ဖျါထီၣ်ဝဲဒၣ်န့ၣ်လီၤ.

တၢ်အံၤမ့ၢ်ဝဲဒၣ် Kate Hankey ကွဲးပာ်ဖျါဝဲလၢ အထါပူၤန့ၣ်လီၤ. အကတၢၢ်န့ၣ် , ထါလၢအပဲၥ်ဖးဝဲ ခံကူၥ်အံၤ ကဲထီၣ် “ ယအဲၣ်ဒိးတဲပူ(I Love to Tell the Story)” ဒီး “တဲယၤပူလီၢ်လံၤ Tell Me the Old, Old Story” ထါသးဝံၣ် လၢ ပအဲၣ်သးဝံၣ်အီၤတဖၣ်န့ၣ်လီၤ. ဒ် Kate အသိး ပနီၣ်ကစၢ်ဒၣ်ဝဲ မ့ၢ်ပကဃုထံၣ်န့ၢ် လံၥ်မဲၥ်ဖျၢၣ်တၢ်ကတိၤတဖၣ် ဒီးဟ့ၣ်နီၤလီၤ ပကစၢ်ယ့ၣ်ရှုးအတၢ်တဲပူကျိၤကျဲလီၤဆီလၢ အအဲၣ်ပှၤ ဟဲဆူပအိၣ် ဒီးအုၥ်က့ၤခီၣ်က့ၤပှၤအဂ့ၢ်အကျိၤ တဖၣ် ဆူပှၤအါဂၤ အဂီၢ်န့ၣ်လီၤ.