ဖဲ ၁၉၃၉ နံၣ်အပူၤ, လၢကီၢ် ဘြံၣ်တ့ၣ်န့ၣ်, တၢ်ဒုးတၢ်ယၤ ကဲထီၣ်ဝံၤတယံၥ်ဘၣ်န့ၣ် စီၤပၤကၠီး ဃုဂၤတဂၤ (George VI) န့ၣ် ဒ်သိးကဟ့ၣ်ဂံၢ်ဟ့ၣ်ဘါအၦၤထံဖိကီၢ်ဖိတဖၣ်, ဒီးထံကီၢ်လၢအမၤသကိးတၢ်တဖၣ် ကနၥ်သန့ၤအသးလၢယွၤအဂီၢ်, အသးအိၣ်ဘိးဘၣ်ရၤလီၤ ခရံၥ်အိၣ်ဖျဲၣ်အမုၢ်နံၤ ကွဲၤလ့လိၤ အတၢ်ရဲၣ်တၢ်ကျဲၤန့ၣ်လီၤ. အဝဲဟံးန့ၢ် စံးကတိၤဒိးသန့ၤဝဲထါလၢအမိၢ်ပၥ်လုၢ်ပၥ်ၦ့ၤဝဲတယုၢ်, “အိၣ်ဟးထီၣ်လၢတၢ်ခံးအပူၤႇ ဒီးပၥ်နစုလၢ ကစၢ်ယွၤအစုပူၤန့ၣ်တက့ၢ်. လၢနဂီၢ် တၢ်မၤအံၤန့ၣ် ကဂ့ၤဒိၣ်န့ၢ်တၢ်ကပီၤ, ဒီးအတၢ်ဘံၣ်တၢ်ဘၢန့ၣ် ကဂ့ၤဒိၣ်န့ၢ် ကျိၤကျဲလၢ နသ့ၣ်ညါတ့ၢ်တဘိန့ၣ်လီၤ.” လၢနံၣ်သီလါသီအပူၤ, တၢ်ကမၤ အသးမနုၤလဲၣ်န့ၣ် အဝဲတသ့ၣ်ညါဝဲဘၣ်ဆၣ်, လၢ “တၢ်နဲၣ်ဆှၢ, ဒီးတၢ်ဟံးဃာ်ပၢၤဃာ်” အဝဲသ့ၣ်အမုၢ်နံၤအကီအခဲ, အလီၤဘၣ်ယိၣ်, လၢအကဟဲတဖၣ်အဂီၢ်, အဝဲနၥ်သန့ၤအသး လၢကစၢ်ယွၤန့ၣ်လီၤ.

ယွၤအစုအက့ၢ်အဂီၤတဖၣ်န့ၣ် ဘၣ်တၢ်ပာ်ဖျါဝဲဒၣ်လၢ လံၥ်စီဆှံအပူၤ, တၢ်လီၢ်အါမး ပၣ်ဃုာ်ဒီးလံၥ်ဝံယၡါယၤအပူၤန့ၣ်လီၤ. ယၡါ ၄၈:၁၂ ပာ်ဖျါဝဲ, ဒ်သိးအၦၤဂီၢ်မုၢ်တဖၣ်ကနၥ်သန့ၤအသးလၢကစၢ်ယွၤ, ဒ်အမ့ၢ်ၦၤလၢအတ့လီၤအဝဲသ့ၣ်, “တၢ်အခီၣ်ထံးဒီးတၢ်အကတၢၢ်” တဂၤအံၤ, ကအိၣ်ဆိးဒီးအဝဲသ့ၣ်ထီဘိအဂီၢ်န့ၣ် ကစၢ်ယွၤ ကွဲမုာ်ဝဲ ခီဖျိလၢဝံယရှါယၤန့ၣ်လီၤ. အဆၢဖိ ၁၃ အပူၤန့ၣ် ကစၢ်ယွၤ စံးဝဲဒၣ်လၢ “ယစုပၥ်လီၤစ့ၢ်ကီးဟီၣ်ခိၣ်အခီၣ်ထံးဒီးယစုထွဲန့ၣ်သလၣ်ထီၣ်မူခိၣ်လီၤ” န့ၣ်လီၤ. ၦၤဂီၢ်မုၢ်တဖၣ်ကဘၣ်နၥ် သန့ၤအသးလၢ ကစၢ်ယွၤ, ဒီးတကြၢးကွၢ်ဝဲ ဆူတၢ်စိတၢ်ကမီၣ်အဆံးအစှၤတဖၣ်အအိၣ်န့ၣ်ဘၣ်. လၢတၢ်ခဲလၢၥ်အဖီခိၣ်န့ၣ်, အဆၢဖိ ၁၇ ပာ်ဖျါဝဲဒၣ် ယွၤမ့ၢ်ကစၢ်လၢ “အၦ့ၤက့ၤအဝဲသ့ၣ်, အံၣ်စရ့လးအတၢ်စီဆှံတဂၤ” န့ၣ်လီၤ.

ဖဲပကွၢ်ဃီၤတၢ်ဆူနံၣ်သီလါသီ လၢအကဟဲန့ၣ်, ပမ့ၢ်ဘၣ်လဲၤခီဖျိကွၢ်ဆၢၣ်မဲၥ်တၢ် တမံၤဂ့ၤ, တမံၤဂ့ၤ, ပလူၤပိၥ်ထွဲ စီၤပၤကၠီးဒီးဝံယၡါယၤ အတၢ်ဟ့ၣ်ဂံၢ်ဟ့ၣ်ဘါ, ဒီးပၥ်လီၤ ပတၢ်မုၢ်လၢ်ဒီးတၢ်နၥ်သန့ၤပသးလၢ ကစၢ်ယွၤသ့ဝဲဒၣ်န့ၣ်လီၤ. မ့မ့ၢ်ဒ်န့ၣ်ဒီး, လၢပဂီၢ်စ့ၢ်ကီး, တၢ်ကမၤအသး ဒ်အဆၢဖိ ၁၈ ပာ်ဖျါဝဲအသိး, “ပတၢ်ဃူတၢ်ဖိးကမၤသးဒ်ထံမိၢ်ၦၢ်, ပတၢ်တီတၢ်လိၤဒ်ပီၣ်လဲၣ်အလပီအသိး” န့ၣ်လီၤ.