ကၠီ (John) အတၢ်ဖံးတၢ်မၤတအိၣ်လၢၤဘၣ်အဃိ အသးဟးဂီၤဒိၣ်မးန့ၣ်လီၤ. ကဘၣ်စးထီၣ်မၤဝဲ တၢ်ဖံးတၢ်မၤအသီန့ၣ် ကမ့ၢ်တၢ်ကီတၢ်ခဲလၢအဂီၢ်န့ၣ်အဝဲသ့ၣ်ညါဝဲဒၣ်န့ၣ်လီၤ. ဒ်သိးကမၤန့ၢ် တၢ်ဖံးတၢ်မၤလၢ အကြၢးဝဲဘၣ်ဝဲဒီးအီၤအဂီၢ်န့ၣ် အဝဲစးထီၣ်ဃ့ထုကဖၣ်တၢ်လၢယွၤန့ၣ်လီၤ. ဝံၤန့ၣ်ဒီး, ကၠီ ကွဲးဂ့ၤထီၣ်က့ၤ အဂ့ၢ်အကျိၤ, ဖးဝဲတၢ်ကိးတၢ်ဖံးတၢ်မၤ အတၢ်ဟ့ၣ်ကူၣ်တဖၣ်, ဒီးသံကွၢ်တၢ်ဒီးကွဲၤဒီနၢ်အဘျီတဖၣ်အဘျီန့ၣ်လီၤ. ပတံထီၣ်ဝဲ တၢ်ဖံးတၢ်မၤ အနွံတဖၣ်အနွံဝံၤန့ၣ်ဒီး, ဒိးန့ၢ်ဝဲ တၢ်ဖံးတၢ်မၤအလီၢ်အလၤအသီ, အိၣ်ဒီးတၢ်ရဲၣ်တၢ်ကျဲၤအဂ့ၤ, ဒီးတၢ်လဲၤတၢ်က့ၤအညီန့ၣ်လီၤ. အတၢ်ဒိကနၣ်ယွၤ တီတီလိၤလိၤ, ဒီးယွၤအတၢ်ဟ့ၣ်မၤပှဲၤတၢ်န့ၣ် တုၤထီၣ်ဘးလၢလၢပှဲၤပှဲၤန့ၣ်လီၤ.
၂ မိၤ ၆:၂၀ အပူၤန့ၣ် တၢ်မၤအသး လၢအလီၤကမၢကမၣ် ဒိၣ်န့ၢ်တၢ်ဂ့ၢ်အံၤ အိၣ်ထီၣ်ဝဲလၢ နီၢ်ယိကဘ့ၣ်ဒီးအပှၤဟံၣ်ဖိဃီဖိတဖၣ် ဖဲပှၤအံၣ်စရ့လးဖိတဖၣ် ဘၣ်တၢ်မၢကဲကုၢ်လၢ ကီၢ် အဲၤကူပတူး အကတီၢ်န့ၣ်လီၤ. ၂ မိၤ ၁:၂၂ ပာ်ဖျါဝဲလၢ စီၤပၤဖၤရိၤ ဟ့ၣ်လီၤအကလုၢ်လၢ ပှၤဧ့ၤဘြံၤအပိာ်ခွါဖိ အိၣ်ဖျဲၣ်ထီၣ်သီခဲလၢာ်န့ၣ် ကဘၣ်တၢ်တ့ၢ်လီၤဆူ ထံကျိ နဲလ် အပူၤန့ၣ်ဒီး, နီၢ်ယိကဘ့ၣ် ပျံၤတၢ်ဘၣ်ယိၣ်တၢ်နးနးကလဲာ်န့ၣ်လီၤ. အဝဲဆီတလဲဘှီက့ၤ တၢ်သိၣ်တၢ်သီ တသ့, တန့ၢ်ဝဲ ဘၣ်ဆၣ် ဒ်သိးအဝဲကစူၢ်ဒိကနၣ်ကစၢ်ယွၤ, ဒီးကျဲးစၢးမၤပူၤဖျဲးအဖိခွါအဂီၢ်ကျိၤကျဲအိၣ်ဝဲတနီၤန့ၣ်လီၤ. ခီဖျိလၢအတၢ်စူၢ်တၢ်နာ်အပူၤန့ၣ်, ပာ်ခူသူၣ်အဖိခွါဆံးဖိလၢ ပှၤအဲၤကူပတူးဖိတဖၣ်အစုပူၤန့ၣ်လီၤ. ၂ မိၤ ၂:၃ ပာ်ဖျါဝဲလၢ အဝဲဟံးန့ၢ်ဆှဲ, ဒီးတ့ထီၣ် ကုဖိလၢထံနုာ်လီၤတန့ၢ်ဝဲတဖျၢၣ်, ဒီး “ပာ်လီၤအီၤလၢဆှဲကျါလၢထံမိၢ်ပှၢ်အနံၤ” န့ၣ်လီၤ. အဆၢဖိ ၅-၁၀ န့ၣ် ပကထံၣ်ဘၣ် ကစၢ်ယွၤနုာ်လီၤအုၣ်က့ၤ ခီၣ်က့ၤဖိသၣ်အသးသမူ လၢလီၤလိၢ်လီၤလးအပူၤ, ဒီးအကတီၢ်လၢခံန့ၣ် ဒ်သိး ကမၤပူၤဖျဲးဝဲ ပှၤအံၣ်စရ့လးဖိခဲလၢာ်လၢ တၢ်မၢကဲကုၢ်အပူၤအဂီၢ်, စူးကါဝဲ ဖိသၣ်အံၤ (၂မိၤ ၃:၁၀) န့ၣ်လီၤ.
ကၠီ ဒီးနီၢ်ယိကဘ့ၣ် အတၢ်မၤန့ၣ် အတၢ်လီၤဆီအိၣ်အါမးဘၣ်ဆၣ်, တၢ်ဂ့ၢ်ခံမံၤလိာ်အံၤ ဘၣ်တၢ်ပာ်ပနီၣ်လၢ တၢ်မၤလၢအပှဲၤဒီးတၢ်စူၢ်တၢ်နာ်န့ၣ်လီၤ. တၢ်ပျံၤတၢ်ဖုး မၤလီၤဘှါပှၤသ့ဝဲဒၣ်န့ၣ်လီၤ. ဒ်ပဆၢထံၣ်န့ၢ် မ့တမ့ၢ် ပဆၢမုၢ်လၢ်အသိး, တၢ်မ့ၢ်တကဲထီၣ်လိၣ်ထီၣ်ဝဲဒၣ်လဲာ်, တၢ်အကတၢၢ်အစၢကမ့ၢ်ဝဲဒ်လဲၣ်ဂ့ၤ, ဒ်သိးပကနာ်သန့ၤပသးလၢ ယွၤအတၢ်ဂ့ၤတၢ်ဝါထီဘိအဂီၢ်, တၢ်စူၢ်တၢ်နာ် ဟ့ၣ်ဂံၢ်ဟ့ၣ်ဘါပှၤန့ၣ်လီၤ.
