လၢလံာ်တၢ်တဲဖးထီ “တၢ်ဘျုးတၢ်ဖိၣ်အဂ့ၢ်” (About Grace) အပူၤန့ၣ် ဒ့ဘ့း ဝ့ကလၢၣ် (David Winkler) ဘၣ်သးဃုထံၣ်န့ၢ်က့ၤ အဖိမုၣ်လၢ အလီၤဖးလိာ်အသးဒီးအီၤ, ဒီးပှၤလၢအမၤစၢၤအီၤသ့ဝဲဒၣ် ထဲဒၣ်တဂၤဧိၤန့ၣ် မ့ၢ်ဝဲ ဟါမဲ ရှံလၢၣ် (Herman Sheeler) န့ၣ်လီၤ. ဘၣ်ဆၣ်, တၢ်ဂ့ၢ်ကီအိၣ်ဝဲတမံၤန့ၣ်လီၤ. ဒ့ဘ့း မၤန့ၢ်ဝဲ အဖိမုၣ်အံၤ, ခီဖျိလၢအပူၤကွံာ်အတၢ်ရ့လိာ်ဘၣ်ထွဲလိာ်သးဒီး ဟါမဲ အမါအဃိ, ဟါမဲ ဟ့ၣ်ပလီၢ်အီၤလၢ အသုတမၤဘၣ်ထွဲလိာ်သးဒီးအဝဲသ့ၣ်နီတဘျီလၢၤဘၣ်န့ၣ်လီၤ.
နံၣ်လၢ အဆံတဖၣ်လဲၤပူၤကွံာ်ဝံၤ, တၢ်လၢအမၤကမၣ်ဘၣ်ဝဲတဖၣ်အဂီၢ် ဒ့ဘ့း ကွဲးဆှၢလီၤလံာ်ပရၢ, ဒီးဃ့ကညးဝဲ ဟါမဲ န့ၣ်လီၤ. “ယဖိမုၣ်ဖိအဂ့ၢ်န့ၣ် ယသ့ၣ်ညါယဲထဲ စှၤထံၣ်ဖိအဃိ, လၢယတၢ်အိၣ်မူအပူၤန့ၣ် တၢ်အိၣ်လီၤဟိတမံၤန့ၣ်လီၤ,” ဒ့ဘ့း တဲအါထီၣ်ဝဲ, ဒီးဃ့ကညးဝဲလၢ ဟါမဲ ကဒုးသ့ၣ်ညါအီၤ အဖိမုၣ်အဂ့ၢ်န့ၣ်လီၤ. မ့ၢ် ဟါမဲ ကမၤစၢၤအီၤဧါန့ၣ် အဝဲဘၣ်အိၣ်ခိးကွၢ်လၢ်ဝဲဒၣ်န့ၣ်လီၤ.
ပှၤလၢအမၤကမၣ်ပှၤတဖၣ်န့ၣ် မ့ၢ်ပကြၢးမၤဆၢက့ၤအဝဲသ့ၣ်ဒ်လဲၣ်. ၂ စီၤ ၆:၈-၂၀ ပာ်ဖျါဝဲ, လၢတၢ်ကမၢကမၣ်အပူၤ, ဒုၣ်ဒါတဖၣ် ဘၣ်တၢ်ဟ့ၣ်လီၤကွံာ် လၢအစုပူၤဝံၤန့ၣ်ဒီး, အံၣ်စရ့လး အစီၤပၤ ဘၣ်ကွၢ်ဆၢၣ်မဲာ်ဝဲ တၢ်သံကွၢ်အံၤန့ၣ်လီၤ. အဆၢဖိ ၂၁-၂၂ ပာ်ဖျါဝဲ လၢ စီၤပၤ သံကွၢ် ဝံအလံၤရှါလၢ “ယကကျီစ့ၢ်ကီးဧါ” န့ၣ်လီၤ. ဝံအလံၤရှါ စံးဆၢဝဲဒၣ်လၢ “ကျီတဂ့ၤ… ပာ်လီၤကိၣ်ဒီးထံလၢအမဲာ်ညါ ဒ်သိးအကအီၣ်တၢ်ဒီးအီတၢ်ဒီးပျဲလဲၤတၢ်ဆူအကစၢ်အိၣ်န့ၣ်တက့ၢ်” န့ၣ်လီၤ. အဆၢဖိ ၂၃ စံးဘၣ်ပှၤ ခီဖျိလၢတၢ်မၤဘျုးမၤဖှိၣ်တၢ်တမံၤအံၤအဃိ, အံၣ်စရ့လး ဃုထံၣ်န့ၢ်ဝဲ တၢ်ဃူတၢ်ဖိးဒီးအဒုၣ်အဒါန့ၣ်လီၤ.
ဟါမဲ ကွဲးဆှၢကဒါက့ၤ ဒ့ဘ့း အလံာ်ပရၢ, ကွဲမုာ်အီၤဆူအဟံၣ်, ဒီးတူၢ်လိာ်အီၤလၢ တၢ်အီၣ်တၢ်အီန့ၣ်လီၤ. တချုးလၢအဝဲသ့ၣ်အီၣ်သကိးတၢ်အီၣ်အကတီၢ်န့ၣ် ဟါမဲ ဃ့ဘါထုကဖၣ်ဝဲလၢ, “ကစၢ်ယ့ၣ်ရှူးဧၢ, လၢနံၣ်တဖၣ်အံၤအပူၤန့ၣ် မ့ၢ်လၢနအံးထွဲကွၢ်ထွဲယၤဒီး ဒ့ဘ့းအဃိ, ယစံးဘျုးဘၣ်နၤ” န့ၣ်လီၤ. ဒ်သိး ဒ့ဘ့း ကဃုထံၣ်က့ၤအဖိမုၣ်အဂီၢ်, ဟါမဲ မၤစၢၤဝဲဒၣ်, လၢခံန့ၣ်ဒီး, ဒ့ဘ့း မၤပူၤမၤဖျဲး ဟါမဲ အသးသမူန့ၣ်လီၤ. လၢယွၤအစုပူၤန့ၣ်, ပမၤဘျုးမၤဖှိၣ်တၢ်ဆူ ပှၤလၢအမၤကမၣ်ပှၤတဖၣ်အဂီၢ်န့ၣ်, အါတက့ၢ် ဒုးအိၣ်ထီၣ်ဝဲ တၢ်ဆိၣ်ဂ့ၤလၢပဂီၢ်န့ၣ်လီၤ.
