ပိာ်မုၣ်အိၣ်ဒီးအဟုးအသး လၢပဟံၣ်အဃၢၤတဂၤန့ၣ် ကဆံးစၢ်ဝဲ အဖိဝဲၢ်ကိအသိး တၢ်မၤအသး ဒ်သိးပဘၣ်အိၣ်ခိးကွၢ်လၢ် တၢ်ကစီၣ် ဖးယံၢ်ဖးထီန့ၣ်လီၤ. အဝဲသ့ၣ် အဟံၣ်မဲာ်ညါ တပံၢ်အပျီပူၤန့ၣ်, ဖဲပထံၣ်ဘၣ် တၢ်ပနီၣ်ထူၣ်ဖိလၢအပာ်ဖျါထီၣ် “မ့ၢ်ပိာ်မုၣ်ဖိတဂၤ” န့ၣ်ဒီး, ပမၤမူးသးဖှံ, ဒီးဆၢဂ့ၤဆၢဝါ ဖိသၣ်ပိာ်မုၣ်ဖိအတၢ်ဟဲအိၣ်ဖျဲၣ်ထီၣ်, ဒီးကွဲးဆှၢလီၤလီတၢ်ကစီၣ်ဆူ တံၤသကိးတဖၣ်လၢ အတဟဲသးခုဘၣ် ဖဲပမူးအံၤအဂီၢ်န့ၣ်လီၤ.
တၢ်အိၣ်ခိးကွၢ်လၢ် ဖိသၣ်ဖိတဂၤ အတၢ်ဟဲန့ၣ် မ့ၢ်တၢ်လၢအလီၤသူၣ်ပိာ်သးဝးဖးဒိၣ်တမံၤန့ၣ်လီၤ. တချုးလၢကစၢ်ယ့ၣ်ရှူး ဟဲအိၣ်ဖျဲၣ်ထီၣ်ဒံးဘၣ်န့ၣ်, ပှၤယူဒၤဖိတဖၣ် ဘၣ်အိၣ်ခိးဝဲ မ့းရှံအၤ, တၢ်အုၣ်ခီၣ်ကစၢ်လၢ ပှၤအံၣ်စရ့လးဖိတဖၣ် မုၢ်လၢ်ကွၢ်စိဝဲလၢ ကဟဲအိၣ်ဖျဲၣ်ထီၣ်အဂီၢ်န့ၣ်, တၢ်တမ့ၢ် စှၤနံၣ်စှၤလါဘၣ်. အဝဲသ့ၣ် ဘၣ်အိၣ်ခိးဝဲ စိၤစၢၤသွဲၣ်အါမးန့ၣ်လီၤ. ယဆိကမိၣ်ကွၢ်ယဲ တၢ်လၢအါနံၣ်အါလါအပူၤ, ပှၤယူဒၤဖိလၢ အအိၣ်တီအိၣ်လိၤဝဲတဖၣ်အသးကံၢ်ပူၤန့ၣ် မ့ၢ်ကအဲၣ်ဒိးသ့ၣ်ဝဲလၢ ဖဲလၢအဝဲသ့ၣ်အိၣ်မူဒံးအဖၢမုာ်န့ၢ် မ့ၢ်အကထံၣ်ဘၣ် ယွၤအတၢ်အၢၣ်လီၤ ကလၢထီၣ်ပှဲၤထီၣ်ဧါန့ၣ်, တၢ်ကအိၣ်ဝဲတမံၤန့ၣ်လီၤ.
ဘၣ်ဖဲမုၢ်တနၤ, တၢ်ကစီၣ်လၢ အဘၣ်တၢ်အိၣ်ခိးကွၢ်လၢ် ယံာ်တ့ၢ်မးလံန့ၣ် ဒုးနဲၣ်ဖျါထီၣ်အသး ခီဖျိလၢမူခိၣ်ကလူးတဂၤ လီၣ်ဖျါထီၣ်အသးလၢ ပှၤကွၢ်သိတဖၣ် ဖဲဝ့ၢ်ဘ့ၤသလ့ဃ့ၣ်, ဘိးဘၣ်ရၤလီၤဝဲလၢ အကတၢၢ်န့ၣ် မ့းရှံအၤ ကစၢ်ဟဲအိၣ်ဖျဲၣ်ထီၣ်လံန့ၣ်လီၤ. လူၤ ၂:၁၂ န့ၣ် မူခိၣ်ကလူး စံးဒၣ်လၢ “ဒီးအပနီၣ်လၢ သုဂီၢ်မ့ၢ်အအံၤ, သုကထံၣ်န့ၢ် ဖိသၣ် ဘၣ်ဘိၣ်ဘံဃာ်အသးလၢ တၢ်ကံးညာ်, ဒီးအိၣ်မံလီၤလၢ ဂီၤဖံးအီၣ်တၢ်အလီၢ်” န့ၣ်လီၤ. အဆၢဖိ ၁၇ ပာ်ဖျါဝဲလၢ ဖဲပှၤကွၢ်သိတဖၣ်ထံၣ်ဘၣ် ကစၢ်ယ့ၣ်ရှူး ဝံၤအလီၢ်ခံန့ၣ်, အဝဲသ့ၣ် စံးထီၣ်ပတြၢၤ ကစၢ်ယွၤ, ဒီး “ဘိးဘၣ်သ့ၣ်ညါ ပှၤအိၣ်ဝဲသကုးဆးဒး” န့ၣ်လီၤ.
ကစၢ်ယွၤအဲၣ်ဒိးဝဲ ပှၤကွၢ်သိတဖၣ် ကသ့ၣ်ညါ ဖိသၣ်လၢ အဘၣ်တၢ်အိၣ်ခိး ယံာ်တ့ၢ်မးလံတဂၤန့ၣ် ဟဲတုၤလံ, ဒ်သိးဒီးအဝဲသ့ၣ် ကတဲဘၣ် ပှၤအဂုၤအဂၤတဖၣ်လၢ ကစၢ်ယ့ၣ်ရှူးအတၢ်အိၣ်ဖျဲၣ်ထီၣ်အဂ့ၢ်န့ၣ်လီၤ. လၢဟီၣ်ခိၣ်အတၢ်လီၤသဘှံးတဖၣ်အပူၤ မ့ၢ်လၢကစၢ်ယ့ၣ်ရှူး အတၢ်အိၣ်မူန့ၣ် ဟ့ၣ်ဝဲတၢ်ပူၤဖျဲး ဆူပှၤလၢအစူၢ်က့ၤနာ်က့ၤအီၤတဂၤလၢ်လၢ်အဃိဒီး, တုၤလၢမုၢ်မဆါတနံၤအံၤဒၣ်လဲာ် ပမၤလၤကပီၤ ခရံာ်အိၣ်ဖျဲၣ်အမူးန့ၣ်လီၤ. ဒ်သိးပကသ့ၣ်ညါတၢ်မုာ်တၢ်ပၢၤ, ဒီးတၢ်သူၣ်ခုသးခု, လၢအမ့ၢ်တၢ်သးခုအကစီၣ်, ကြၢးလၢအဘၣ်တၢ်တဲဖျါထီၣ်အီၤန့ၣ် တလိၣ်လၢပကဘၣ်အိၣ်ခိးလၢၤဘၣ်န့ၣ်လီၤ.
