ထီဘိန့ၣ် ယဝၤဒီးယၤ ပမုာ်လၤသးခုဝဲလၢ ပလဲၤဘါသကိး တၢ်သဂၢၢ် ခရံာ်အိၣ်ဖျဲၣ်ဟါတၢ်ဘါလၢပတၢ်ဘါသရိာ်န့ၣ်လီၤ. ပထီၣ်ပှၢ်ဝံၤသီ နံၣ်တဖၣ်န့ၣ်, ပအိၣ်ဒီး လုၢ်လၢ်လီၤဆီတမံၤလၢ ခရံာ်အိၣ်ဖျဲၣ်ဟါတၢ်ဘါဝံၤန့ၣ်, ပကူသိးထီၣ် ဆ့ကူဆ့ကၤအလၢၤတဖၣ် လၢပကလဲၤဟး, ထီၣ်ကစၢၢ်လၢပခီၣ်, ဖဲတၢ်လူၢ်အိၣ်လၢပကပိာ်ကပၤန့ၣ်လီၤ. ဖဲတၢ်လူၢ်လိၤန့ၣ် မ့ၣ်အူဖျၢၣ်အိၣ်ဒီးအလွဲၢ်ကပြုၢ်ကပြီၤ, အဖျၢၣ် ၃၅၀ န့ၣ် ဘၣ်တၢ်ဘျးလီၤစဲၤလၢ တၢၣ်ဖးထီတဖၣ်အလိၤ ဒ်ဆၣ်တဖျၢၣ်အက့ၢ်အဂီၤအသိးန့ၣ်လီၤ. ဖဲန့ၣ်, ဘၣ်တဘျီဘျီလၢဘှ့ၣ်ပစီၤတဖၣ်အကျါ, ပကွၢ်စိလီၤဝ့ၢ် အိၣ်ဖျါလၢတၢ်လူၢ်အဖီလာ်. ဒီးပကတိၤကသွံ ပတၢ်ထံၣ်ဆိကမိၣ်ကဒါက့ၤ ကစၢ်ယ့ၣ်ရှူး အိၣ်ဖျဲၣ်ထီၣ်ဝဲလၢ တၢ်လီၤကမၢကမၣ်အပူၤအဂ့ၢ်န့ၣ်လီၤ. တကတီၢ်ဃီန့ၣ်, ပှၤအါဒံအါဂၤလၢဝ့ၢ်ပူၤတဖၣ်န့ၣ် ကွၢ်ထီၣ်ဝဲဒၣ် ဆၣ်ကပြုၢ်ကပြီၤလၢတၢ်ဘျးလီၤစဲၤ, တ့ဒုးအိၣ်ထီၣ်အီၤလၢလီမ့ၣ်အူဖျၢၣ်တဖၣ်န့ၣ်, လၢတၢ်လူၢ်အခီၣ်ထံးန့ၣ်လီၤ.
ဆၣ်တဖျၢၣ်အံၤ မ့ၢ်တၢ်လၢအဒုးသ့ၣ်နီၣ်ထီၣ်က့ၤပှၤ ပတၢ်အုၣ်ခီၣ်ကစၢ် အိၣ်ဖျဲၣ်ထီၣ်ဝဲအဂ့ၢ်န့ၣ်လီၤ. မး ၂:၁-၂ န့ၣ် လံာ်စီဆှံ ပာ်ဖျါဝဲလၢ ပှၤမၤကူးတဖၣ်န့ၣ် အိၣ်ဟဲဝဲလၢ “မုၢ်ထီၣ်တခီ,” ဒီးဟဲတုၤဆူ ဝ့ၢ်ယရူၤရှလ့ၣ် ဒ်သိးကဃုထံၣ်န့ၢ် “ပှၤတဂၤယူဒၤအစီၤပၤ” န့ၣ်လီၤ. အဆၢဖိ ၂ စံးဘၣ်ပှၤလၢ အဝဲသ့ၣ် ခိးကွၢ်မူကပိာ်လိၤဒီးထံၣ်ဝဲ “ဆၣ်ဟဲဖျါထီၣ်” န့ၣ်လီၤ. အဝဲသ့ၣ် အတၢ်လဲၤဆူ ဝ့ၢ် ယရူၤၡလ့ၣ်, ဒီးဘၣ်လဲၤဝဲဆူညါ, ဆူဝ့ၢ်ဘ့ၤသလ့ဃ့ၣ်, ဒီးအဆၢဖိ ၉ ပာ်ဖျါဝဲလၢ ဆၣ်န့ၣ်လဲၤတၢ် “လၢအမဲာ်ညါ တုၤအဟဲအိၣ်ကတီၢ်, ဖဲဖိသၣ်အိၣ်ဝဲအလီၢ်အဖီခိၣ်” န့ၣ်လီၤ. ဖဲန့ၣ်, အဆၢဖိ ၁၁ ပာ်ဖျါဝဲလၢ “အဝဲသ့ၣ် ထိၣ်လီၤပှီၤအသး, ဒီးဘူၣ်ထီၣ်ဘါထီၣ်အီၤလီၤ.”
လၢပတၢ်အိၣ်မူအပူၤန့ၣ် ကစၢ်ခရံာ် မ့ၢ်တၢ်ကပီၤ အဂံၢ်ခီၣ်ထံး, ဒ်အမ့ၢ်က့ၢ်ဂီၤဟ့ၣ်ဒိတမံၤ (ပှၤလၢအနဲၣ်ဆှၢပှၤ) မ့ၢ်ဂ့ၤ, ဒီးပမ့ၢ်ဘၣ်ပာ်ဖျါအီၤလိၤလိၤန့ၣ် ဒ်ကလီး ၁:၁၅-၁၆ စံးဘၣ်ပှၤအသိး, မ့ၢ်ပှၤတဂၤလၢအတ့လီၤ မုၢ်, လါ, ဒီးဆၣ်လၢ မူကပိာ်လိၤတဖၣ်န့ၣ်လီၤ. မး ၂:၁၀ န့ၣ် ဖဲပှၤမၤကူးဖိတဖၣ် ထံၣ်ဝဲ ကစၢ်ခရံာ်အဆၣ်န့ၣ်ဒီး, “တၢ်သးခုလုၣ်ဘၢ” ဝဲအသိး, ပသးခုသးမုာ်အဒိၣ်ကတၢၢ်န့ၣ်, ပသ့ၣ်ညါကစၢ်ယ့ၣ်ရှူး ဒ်အမ့ၢ် တၢ်အုၣ်က့ၤခီၣ်က့ၤကစၢ်, ဒ်သိးကအိၣ်ဆိးဝဲလၢ ပသိးပကျါအဂီၢ်, အိၣ်ဟဲလီၤလၢမူခိၣ်န့ၣ်လီၤ. ယိၤ ၁:၁၄ စံးဘၣ်ပှၤလၢ “ပထံၣ်ဘၣ်အလၤအကပီၤ” န့ၣ်လီၤ.
