ဖဲနံၣ်ကယၤလွံၢ် တၢ်အိၣ်ဖှိၣ် အစိၤန့ၣ်, ပၤပၤ ကရံၤကိရံၣ် (Gregory) လၢ ဝ့ၢ်နၤစံၤယဲစဲး (Nazianzus), ဒီး ပၤပၤ ဘၢၣ်စ့ၤ(Basil) လၢ ဝ့ၢ်ဆံစၤရံယၤ (Caesarea) တဖၣ်န့ၣ် မ့ၢ်ဝဲခိၣ်နၢ်မံၤဟူသၣ်ဖျါတဖၣ်, ဒီးမ့ၢ်စ့ၢ်ကီး တံၤသကိးတံၢ်နီၢ်တဖၣ်န့ၣ်လီၤ. အဝဲသ့ၣ်ခံဂၤ ထံၣ်လိာ်အသး အဆိကတၢၢ်န့ၣ်, ဒ်တၢ်သ့ဆိကမိၣ်တၢ် အပှၤမၤလိတၢ်ဖိတဖၣ်အသိး, လၢခံန့ၣ်ဒီး, ပၤပၤ ကရံၤကိရံၣ် စံးဝဲဒၣ်လၢ အဝဲသ့ၣ်ကဲထီၣ်ဝဲ ဒ် “ပှၤခံဂၤအိၣ်ဒီးသးတဖျၢၣ်ဃီ” န့ၣ်လီၤ.
တၢ်ဖံးတၢ်မၤကျိၤကျဲတဖၣ် လီၤဂာ်လိာ်အသးဒိၣ်မးအဃိ, ပၤပၤ ကရဲကရံၣ် ဒီး ပၤပၤ ဘၢၣ်စ့ၤ အဘၢၣ်စၢၤန့ၣ် တၢ်ထီဒါလိာ်သး ဟဲအိၣ်ထီၣ်သ့ဝဲဒၣ်န့ၣ်လီၤ. ဘၣ်ဆၣ် ပၤပၤ ကရံၤကိရံၣ် တဲနၢ်ပၢၢ်ဝဲလၢ အဝဲသ့ၣ်ဟးဆှဲးတြီဃာ် တၢ်လ့ပစီတမံၤအံၤ ခီဖျိတၢ်ဒုးအိၣ်ထီၣ်တၢ်စူၢ်တၢ်နာ်, တၢ်မုၢ်လၢ်, ဒီးတၢ်မၤဂ့ၤတၢ် အတၢ်အိၣ်မူတဖၣ် ဒ်အမ့ၢ် “တၢ်ပညိၣ်တမံၤဧိၤ” ဝံၤန့ၣ်ဒီး, လၢအနီၢ်ကစၢ်ထဲတဂၤဒၣ်ဝဲ မၤနၢၤတုၤဃီၤ တၢ်ပညိၣ်အံၤအလီၢ်န့ၣ်, တံၤသကိးကဒဲကဒဲ ကမၤနၢၤအါထီၣ်ဝဲလၢ အတၢ်အိၣ်မူစူၢ်စူၢ်, ဒ်ပညိၣ်ပာ်ဝဲအသိးအဂီၢ်န့ၣ်, “ဟ့ၣ်ဂံၢ်ဟ့ၣ်ဘါလိာ်သးတဂၤဒီးတဂၤ” န့ၣ်လီၤ. လၢတၢ်န့ၣ်အဃိ, အဝဲသ့ၣ်ခံဂၤလိာ် ဒိၣ်ထီၣ်လၢ တၢ်စူၢ်တၢ်နာ်, ဒီးကဲထီၣ်ခိၣ်နၢ်လၢ အပတီၢ်ထီ, ဒီးတၢ်ထီဒါလိာ်သးတအိၣ်ဘၣ်န့ၣ်လီၤ.
ဒ်သိးပကအိၣ်ဂၢၢ်ဆိးကျၢၤလၢ ပတၢ်စူၢ်တၢ်နာ် အတၢ်ဂံၢ်ဆူၣ်ဘါဆူၣ်အပူၤန့ၣ် ကကဲထီၣ်တၢ်မၤစၢၤအဂီၢ်, တၢ်ကွဲးဒုးအိၣ်ထီၣ် လံာ်ဧ့ၤဘြံၤ (ဧ့ၤ ၂:၁) န့ၣ်လီၤ. ဒ်သိးပကပညိၣ် ပာ်ဖှိၣ် “တၢ်မုၢ်လၢ်လၢအိၣ်ဒီးပှၤ” အလိၤ, ဒီး “ပကဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤဆူ တၢ်အဲၣ်ဒီးတၢ်မၤအဂ့ၤတဖၣ်” အဂီၢ်, ပဘၣ်တၢ်ဟ့ၣ်ဂံၢ်ဟ့ၣ်ဘါပှၤလၢ (ဧ့ၤ ၁၀:၂၃-၂၄)အပူၤန့ၣ်လီၤ. အဆၢဖိ ၂၅ ပာ်ဖျါဝဲ, ဖဲလၢတၢ်မၤလိာ်အံၤ ဘၣ်တၢ်ဟ့ၣ်လီၤဆူ ပှၤစူၢ်က့ၤနာ်က့ၤတၢ်ဖိအသနၢၣ်ဘၣ်ဆၣ်, ဖဲအဝဲသ့ၣ် အိၣ်မူမၤထွဲဝဲလၢ အတၢ်ရ့တံၤရ့သကိးအပူၤန့ၣ်ဒီး, ကရံၤကိရံၣ်ဒီးဘၢၣ်စ့ၤ, တံၤသကိးခံဂၤန့ၣ် ဒုးထံၣ်ပှၤလၢ တံၤသကိးတဖၣ် ဒ်သိးကဒိၣ်ထီၣ်, ဒီးဟးဆှဲး “ဂံၢ်ခီၣ်ထံးလၢအခၣ်” (ဧ့ၤ ၁၂:၁၅) တဖၣ်လၢကကဲထီၣ် တၢ်ထီဒါလိာ်သးလၢအဝဲသ့ၣ်ခံဂၤ အဘၢၣ်စၢၤအဂီၢ်န့ၣ်, ဟ့ၣ်ဂံၢ်ဟ့ၣ်ဘါလိာ်သး သ့ဝဲဒၣ်ဒ်လဲၣ်အဂ့ၢ်န့ၣ်လီၤ.
တၢ်စူၢ်တၢ်နာ်, တၢ်မုၢ်လၢ်, ဒီးတၢ်မၤဂ့ၤတၢ်တဖၣ်န့ၣ် ပမ့ၢ်ဒုးကဲထီၣ်အီၤလၢ ပတၢ်ရ့တံၤရ့သကိး အတၢ်ပညိၣ်ဝံၤန့ၣ်ဒီး, ပကဟ့ၣ်သဆၣ်ထီၣ် ပတံၤသကိးတဖၣ် ဒ်သိးကမၤနၢၤအါထီၣ်ဝဲလၢ တၢ်ပညိၣ်တဖၣ်အံၤအပူၤ, ဒိၣ်န့ၢ်ဒံး ပမၤန့ၢ်မၤနၢၤပကစၢ်ဒၣ်ဝဲအဂီၢ်န့ၣ် မ့ၢ်တၢ်ကမၤအသးဒ်လဲၣ်. ဒ်သိးပကမၤတၢ် ခံမံၤလိာ်အံၤအဂီၢ်န့ၣ် သးမုာ်စီဆှံအကစၢ် အိၣ်ကတဲာ်ကတီၤအသးလၢကမၤစၢၤပှၤန့ၣ်လီၤ.
