ဖဲယဖိခွါ စ့ဘံၣ်ယၢာ် (Xavier) အသးစၢ်အကတီၢ်, အဝဲဒီးယၤ ပဖးဖိသၣ်အတၢ်တဲမုာ်နၢ်တယုၢ်ဘၣ်ထွဲဒီးဖိသၣ်ပိာ်ခွါတဂၤအဂ့ၢ်, လၢအပူထီၣ်ဝဲဒၣ်အသရၣ် ခီဖျိလၢတၢ်ကိးယုၢ်န့ၢ်ဝဲအထိၣ်ဒံးဘိတဘိန့ၣ်လီၤ. ကၠိဖိတဂၤအံၤ ကွဲန့ၢ်လွဲန့ၢ် အတံၤသကိး ပှၤလွံၢ်တီၤဖိတဖၣ် ဒ်သိးကစူးကါ ထိၣ်ဒံးဘိအမံၤအသီလၢအဝဲဒုးအိၣ်ထီၣ်ဝဲဒၣ်န့ၣ်လီၤ. တၢ်ကစီၣ်လၢသးစၢ်ပိာ်ခွါဖိ ဆီတလဲကိးဝဲ ထိၣ်ဒံးဘိအမံၤအဂ့ၢ်န့ၣ် ရၤလီၤအသးလၢ ဝ့ၢ်ဒီတဖျၢၣ်န့ၣ်လီၤ. တၢ်အကတၢၢ်လၢခံန့ၣ်, ပှၤအိၣ်ဆိးလၢထံကီၢ်ဒီတဘ့ၣ်အပူၤန့ၣ် ဆီတလဲဒီးကိးက့ၤထိၣ်ဒံးဘိတဖၣ်အမံၤ လၢအမံၤအသၣ်အဂၤန့ၣ်လီၤ. မ့ၢ်လၢသးစၢ်ပိာ်ခွါဖိ တဂၤဒုးအိၣ်ထီၣ်ဝဲ တၢ်အမံၤအသၣ်အံၤန့ၣ် ပှၤဂုၤပှၤဂၤတဖၣ် တူၢ်လိာ်ဝဲ ဒ်တၢ်မ့ၢ်တၢ်တီနီၢ်နီၢ်တမံၤလၢပှၤခဲလၢာ်အဂီၢ်န့ၣ်လီၤ.
လၢတၢ်စံၣ်စိၤတဲစိၤဒီစိၤအပူၤန့ၣ်, ပှၤဟီၣ်ခိၣ်ဖိတဖၣ်လၢ အအိၣ်ဒီးတၢ်လီၤတူာ်လီၤကာ်အါမးတဖၣ် တူၢ်လိာ်စူးကါဝဲ တၢ်ထံၣ်တၢ်ဆိကမိၣ်လၢ အဆီတလဲအသးထီဘိတဖၣ်, ဒ်တၢ်မ့ၢ်တၢ်တီနီၢ်နီၢ်အသိး, မ့တမ့ၢ် တၢ်မ့ၢ်တၢ်တီတဖၣ်လၢ နီၢ်တဂၤအဲၣ်ဒိးဝဲ, ဒ်သိးကမၤလၢပှဲၤအဝဲသ့ၣ်အတၢ်သးကွံ ,ဆၢမၤတၢ်တဖၣ်န့ၣ်လီၤ. ဘၣ်ဆၣ်, လံာ်စီဆှံ နဲၣ်ဃီၤဝဲဆူ တၢ်မ့ၢ်တၢ်တီတမံၤ, ကစၢ်ယွၤအမ့ၢ်အတီတဂၤအအိၣ်, ဒီးထဲဒၣ်ကျဲတဘိဧိၤအအိၣ်ဆူ တၢ်အုၣ်က့ၤခီၣ်က့ၤအကျဲ- မ့းရှံအၤ န့ၣ်လီၤ. ယရှါ ၄၀:၅ စံးဘၣ်ပှၤ ခီဖျိလၢ အီၤန့ၣ် “ယွၤအလၤကပီၤကဘၣ် တၢ်လီၣ်ဖျါထီၣ်” ဝဲဒၣ်န့ၣ်လီၤ. အဆၢဖိ ၆-၇ အပူၤန့ၣ် ဝံယရှါယၤ မၤဂၢၢ်မၤကျၢၤဝဲလၢ ပှၤကညီန့ၣ်, ဒ်တၢ်ဘၣ်တ့အဂုၤအဂၤတဖၣ်အသိး, မ့ၢ်ဒၣ်တၢ်တစိၢ်တလီၢ်ဖိ, မၤကမၣ်တၢ်သ့, ဒီးတၢ်နာ်န့ၢ်အီၤတသ့ဘၣ်န့ၣ်လီၤ. အဆၢဖိ ၈ န့ၣ် ဝံ စံးဘၣ်ပှၤ, “နီၣ်ဧိၤမံၤဧိၤန့ၣ်ဃ့ထီၣ်ကွံာ်, သံၣ်ဧိၤဖီဧိၤန့ၣ်လီၤညွံးလီၤဘဲဝဲလီၤ. မ့မ့ၢ်ပကစၢ် အကလုၢ်ကထါန့ၣ် ကအိၣ်ဝဲကဆိးဝဲလီၤစိၤလီၤထီလီၤ” န့ၣ်လီၤ.
ဝံယရှါယၤ စံးကတိၤပာ်ဖျါဆိတ့ၢ်ဝဲ မ့းရှံအၤ ကဟဲဝဲဒၣ်အဂ့ၢ်န့ၣ် ဒုးအိၣ်ထီၣ် တၢ်အခီၣ်တဃာ်လၢ ပနာ်သန့ၤသးသ့, တၢ်အိၣ်တဒၢအလီၢ်အကျဲလၢ အဘံၣ်အဘၢတတီၤ, ဒီးတၢ်မုၢ်လၢ်အဂၢၢ်အကျၢၤတမံၤန့ၣ်လီၤ. ကစၢ်ယွၤအကလုၢ်ကထါန့ၣ် ပနာ်န့ၢ်အီၤ သ့ဝဲဒၣ်န့ၣ်လီၤ. အဂ့ၢ်ဒ်အံၤ, ယိၤ ၁:၁ စံးဘၣ်ပှၤလၢ ကစၢ်ယ့ၣ်ရှူးအနီၢ်ကစၢ်ဒၣ်ဝဲန့ၣ် မ့ၢ် “တၢ်ကလုၢ်” အဃိန့ၣ်လီၤ. ကစၢ်ယ့ၣ်ရှူး မ့ၢ်ဝဲ တၢ်မ့ၢ်တၢ်တီလၢ အတဆီတလဲအသးနီတဘျီဘၣ်န့ၣ်လီၤ.
