“ယကဘိးဘၣ်သ့ၣ်ညါ တၢ်ဂ့ၢ်အကါဒိၣ်တမံၤ, ပှၤလၢအနီၣ်ပကဘီယူၤအခိၣ်တဂၤန့ၣ်စူးကွံာ်အသးလံ” န့ၣ်လီၤ. လၢတၢ်သးကိၢ်သးဂီၤအပူၤန့ၣ် ဒီး(ဒ) ဝၢးထ် (Doug White) ပာ်ဖျါဒုးသ့ၣ်ညါဝဲ တၢ်ကတိၤဖျၢၣ်တဖၣ်ဆူ “တၢ်ပၢဆှၢရဲၣ်ကျဲၤ ကဘီယူၤအတၢ်လဲၤ တၢ်က့ၤပျိာ်” န့ၣ်လီၤ. ကဘီယူၤ ယူၤထီၣ်ဝံၤ စှၤမံးနံးအတီၢ်ပူၤ, ပှၤလၢအဒိးလဲအသးဒီး နီၣ်ကဘီယူၤလၢ ဒီး(ဒ)အဟံၣ်ဖိဃီဖိအဂီၢ်န့ၣ် သံဝဲသတူၢ်ကလာ်န့ၣ်လီၤ. ဒီး(ဒ) မၤလိတ့ၢ်ဘၣ် တၢ်နီၣ်ကဘီယူၤတၢ်မၤလိ ထဲဒၣ်သၢလါဧိၤဘၣ်ဆၣ်, ဘၣ်နုာ်လီၤဝဲ ပှၤနီၣ်ကဘီယူၤ အလီၢ်န့ၣ်လီၤ. ဝံၤန့ၣ်ဒီး, ဒ်သိးကဘီယူၤကစီၢ်လီၤက့ၤအဂီၢ် အဝဲဘၣ်အိၣ်ခိးကနၣ် ပှၤပၢဆှၢရဲၣ်ကျဲၤကဘီယူၤ အတၢ်လဲၤတၢ်က့ၤတဖၣ် အကလုၢ်လီၤတံၢ်လီၤဆဲး, ဖဲအစံးကတိၤဒုးနဲၣ်အီၤအကတီၢ်န့ၣ်လီၤ. လၢခံန့ၣ်, ဒီး(ဒ) ပာ်ဖျါထီၣ်က့ၤဝဲလၢ “အဝဲသ့ၣ် မၤပူၤဖျဲး ပဟံၣ်ဖိဃီဖိတဖၣ်, ဘူးတ့ၢ်လံလၢ ပကဘၣ်သံအပူၤ” န့ၣ်လီၤ.

လၢပသးသမူအတၢ်တၤတဖၣ်အဂီၢ်, ပအိၣ်ဒီးပှၤလၢအသ့မၤစၢၤနဲၣ်ဆှၢပှၤ ထဲဒၣ်တဂၤဧိၤန့ၣ်လီၤ. ၅ မိၤ ၁၈:၁၅ အပူၤန့ၣ်, စီၤမိၤရှ့ ကတိၤလီၤတၢ်ဆူ ပှၤအံၣ်စရ့လးဖိတဖၣ်အအိၣ်, ဒီးစံးဝဲ “ယွၤနကစၢ် ကဒုးဂဲၤဆၢထၢၣ် ဝံတဂၤ လၢနဒီပုၢ်ဝဲၢ်အကျါ ဒ်ယၤအသိးန့ၣ်… သုဘၣ်ဒိကနၣ် အကလုၢ်အကထါလီၤ” န့ၣ်လီၤ. တၢ်အၢၣ်လီၤအံၤ ပညိၣ်ဃီၤဝဲလၢ တၢ်ဟံးထီၣ်ဖီၣ်ထီၣ်ဝံအလီၢ်, တၢ်လၢယွၤဟ့ၣ်လီၤအပှၤဂီၢ်မုၢ်ဘၣ်ဆၣ်, စံးကတိၤပာ်ဖျါစ့ၢ်ကီးဝဲ မ့းရှံအၤ အဂ့ၢ်န့ၣ်လီၤ. အကတီၢ်လၢခံ, မၤ ၃:၁၉-၂၂, ၇:၃၇, ၅၁-၅၆ အပူၤန့ၣ် စီၤပ့းတရူးဒီးစီၤစတ့ဖၣ် ခံဂၤလိာ် ပာ်ဖျါထီၣ်ဝဲလၢ, ဝံလၢအဒိၣ်ကတၢၢ်, ဒီးအကတၢၢ်တဂၤအံၤန့ၣ် မ့ၢ်ကစၢ်ယ့ၣ်ရှူးန့ၣ်လီၤ. ၅ မိၤ ၁၈:၁၈ ပာ်ဖျါဝဲလၢ ထဲဒၣ်ကစၢ်ယ့ၣ်ရှူးတဂၤဧိၤ, ကဟဲ စံၣ်တဲၤတဲလီၤ ကစၢ်ယွၤအကလုၢ်အကထါ, လၢအလီၤအဲၣ်, ဒီးအကူၣ်သ့ကူၢ်ဘၣ်အဂ့ၢ်န့ၣ်လီၤ.

ဖဲကစၢ်ခရံာ် အိၣ်မူအိၣ်ဂဲၤလၢ ဟီၣ်ခိၣ်ချၢအကတီၢ်, မၢ် ၉:၇ အပူၤန့ၣ် ပၢ်ကစၢ်ယွၤ စံးဝဲဒၣ် “အအံၤမ့ၢ်ယဖိခွါ……. ဒိကနၣ်အကလုၢ်တက့ၢ်” န့ၣ်လီၤ. ဒ်သိး ပကအိၣ်မူအိၣ်ဂဲၤ လၢတၢ်ကူၣ်သ့, ဒီးဖဲပအိၣ်မူလၢဟီၣ်ခိၣ်ချၢအံၤအကတီၢ်, ဒ်သိးပကဟးဆှဲးတၢ်ဟးဂီၤတၢ်လီၤသဘှံးတဖၣ်, ဒီးတၢ်အိၣ်မူကိၢ်ကိၢ်ဂီၤဂီၤအဂီၢ်န့ၣ်, ဒ်ကစၢ်ယ့ၣ်ရှူး စံးကတိၤပာ်ဖျါ ခီဖျိလၢယွၤအကလုၢ်ကထါလံာ်စီဆှံ, ဒီးခီဖျိလၢသးစီဆှံအပူၤအသိး, မ်ပကဒိကနၣ်သကိးတက့ၢ်. တၢ်ဒိကနၣ်ကစၢ်ယ့ၣ်ရှူးန့ၣ်,ကဒုးအိၣ်ထီၣ်တၢ်လီၤဆီခဲလၢာ်န့ၣ်လီၤ.