ဖဲပဆ့ၣ်နီၤသကိးလၢ ဟါတၢ်အီၣ်အစီၢ်နီၤခိၣ်အကတီၢ်, လၢတၢ်နံၤကမှံအပူၤ ယလံၤခွါအသးအိၣ် (၉) နံၣ်ဖိန့ၣ် စံးဝဲ “ယလီၤဂာ်ဒီးယဖံဖံလီၤ. ယအဲၣ်ဖးလံာ်ဖးလဲၢ်န့ၣ်လီၤ.” အတၢ်ကတိၤတဖၣ်န့ၣ် ကဲထီၣ်တၢ်သးခု, တၢ်သးမုာ် လၢယသးပူၤန့ၣ်လီၤ. ယဆိကမိၣ်ထီၣ်က့ၤ တၢ်ဂ့ၢ်လၢအပူၤကွံာ်တနံၣ်န့ၣ်, ဖဲအဝဲအိၣ်တမုာ်ဆိးက့, ဒီးတဘၣ်လဲၤထီၣ်ကၠိ, ဘၣ်အိၣ်ဝဲလၢဟံၣ်အကတီၢ်န့ၣ်လီၤ. ယလံၤဖိ မံဝဲတရ့ လၢတၢ်ဆၢကတီၢ်ဖးယံာ်ဖိဝံၤအလီၢ်ခံ, ပဆ့ၣ်နီၤသဃဲၤလိာ်သး, ဒီးဖးသကိးလံာ်န့ၣ်လီၤ. ယသူၣ်ခုသးခုဘၣ်ယဲလၢ ယစိာ်ခီဟ့ၣ်လီၤဘၣ် တၢ်အဲၣ်ဖးလံာ်ဖးလဲၢ်အတၢ်ဟ့ၣ်သါ, လၢယန့ၢ်သါဘၣ်လၢ ယမိၢ်အအိၣ်အဃိန့ၣ်လီၤ.
ဘၣ်ဆၣ်, တၢ်အဲၣ်ဖးလံာ်ဖးလဲၢ်န့ၣ် တမ့ၢ်ဘၣ်တၢ်ဟ့ၣ်သါ အကါဒိၣ်ကတၢၢ်လၢ ယအဲၣ်ဒိးစိာ်ခီဟ့ၣ်လီၤတဲာ်တ့ၢ် ယလံၤဖိတဖၣ်န့ၣ်ဘၣ်. ယဃ့ထုကဖၣ်ယဲလၢ တၢ်စူၢ်တၢ်နာ် ယန့ၢ်သါဘၣ်လၢ ယမိၢ်ယပၢ်တဖၣ်န့ၣ် ယကျဲးစၢၤ ဟ့ၣ်သါက့ၤဆူ ယဖိတဖၣ်, ဒီးယတၢ်ဟ့ၣ်သါအံၤန့ၣ် ကကဲထီၣ် တၢ်မၤစၢၤလၢ ယလံၤဖိတဖၣ်အဂီၢ်, လၢအဝဲသ့ၣ်အတၢ်စူၢ်တၢ်နာ် အတၢ်လဲၤအပူၤစ့ၢ်ကီးန့ၣ်လီၤ.
တၢ်အဲၣ်ယွၤပျံၤယွၤန့ၣ် စီၤတံၤမသ့း န့ၢ်သါဘၣ်ဝဲလၢ အမိၢ်ဒီးအဖံအအိၣ်, ဒီးလၢနီၢ်သးတကပၤ ပှၤလၢအနဲၣ်ဆှၢအီၤတဂၤန့ၣ် မ့ၢ်ဝဲ ပှၤတၢ်မၢဖိ စီၤပီလူးန့ၣ်လီၤ. ၂ တံၤ ၁:၅ အပူၤန့ၣ် စီၤပီလူး ကွဲးပာ်ဖျါဝဲလၢ “ယသ့ၣ်နီၣ်ထီၣ်က့ၤတၢ်နာ်နီၢ်နီၢ်, လၢအအိၣ်လၢနပူၤ, ဒီးအိၣ်ဆိးလၢ နဖံနီၢ်လိၤအ့ၣ်အပူၤ, ဒီးလၢနမိၢ်နီၢ်အူၤနံက့ၤအပူၤ, ဒီးယနာ်နီၢ်နီၢ်လၢ အအိၣ်စ့ၢ်ကီးလၢနပူၤ” န့ၣ်လီၤ.
ဘၣ်သ့ၣ်သ့ၣ်, ပကဆိကမိၣ်လၢ ပတၢ်အိၣ်မူန့ၣ် တမ့ၢ်လၢကကဲထီၣ် တၢ်ဒိဂ့ၤတဲာ်ဘၣ်, အဂ့ၤအဝါအလၢအပှၤ, လၢပှၤဂၤအဂီၢ်ဘၣ်န့ၣ်လီၤ. တၢ်ဟ့ၣ်သါတဖၣ်လၢ အဘၣ်တၢ်စိာ်ခီဟ့ၣ်လီၤပှၤန့ၣ် တမ့ၢ်တၢ်လၢအဂ့ၤသ့ၣ်သ့ၣ်န့ၣ်လီၤ. ဘၣ်ဆၣ်, လၢပဖိပလံၤ, မ့တမ့ၢ် ဖိသၣ်တဂၤဂ့ၤတဂၤဂ့ၤ အတၢ်အိၣ်မူအပူၤ, ပကဒုးအိၣ်ထီၣ် တၢ်စူၢ်တၢ်နာ် အတၢ်ဟ့ၣ်သါအဂီၢ်, တၢ်ဆၢကတီၢ် စဲၤခံလံန့ၣ် တအိၣ်နီတဘျီဘၣ်န့ၣ်လီၤ. ပကသူၣ်လီၤတၢ်စူၢ်တၢ်နာ်အချံတဖၣ် ခီဖျိလၢယွၤအတၢ်မၤစၢၤန့ၣ်လီၤ. ၁ ကရံၣ် ၃:၆-၉ စံးဘၣ်ပှၤလၢ ယွၤမ့ၢ်ကစၢ်လၢ အဒုးဒိၣ်ထီၣ်တၢ်စူၢ်တၢ်နာ်န့ၣ်လီၤ.
