ဖဲယဘၣ်လဲၤ တၢ်သးခုကစီၣ်အတၢ်လဲၤစှၤသီဆူ ကီၢ် ပံၣ်ရူ (Peru) အကတီၢ်န့ၣ်, ပှၤသးစၢ်ပိာ်ခွါဖိတဂၤ ဃ့ဝဲဒၣ်ကျိာ်စ့လၢယအိၣ်န့ၣ်လီၤ. လၢတၢ်ဘံၣ်တၢ်ဘၢအဂီၢ်, ပပှၤကရူၢ်ဖိတဖၣ်န့ၣ် တၢ်တဲဆိပာ်ပှၤလၢ ပသုတထုးထီၣ် ဟ့ၣ်လီၤကျိာ်စ့ဘၣ်အဃိ, မ့ၢ်ယမၤစၢၤအီၤကသ့ဝဲဒၣ်ဒ်လဲၣ်. ဖဲန့ၣ် ယသ့ၣ်နီၣ်ထီၣ်က့ၤတၢ်ဂ့ၢ်လၢ လံာ်မၤတၢ် အဆၢဒိၣ် ၃ အပူၤ, ပှၤတၢ်မၢဖိ စီၤပ့းတရူးဒီးစီၤယိၤဟၣ် အတၢ်မၤဆၢက့ၤ ပှၤအခီၣ်ဟးဂီၤတဂၤအဂ့ၢ်န့ၣ်လီၤ. ယတဲနၢ်ပၢၢ် ပှၤသးစၢ်တဂၤအံၤလၢ ယဟ့ၣ်အီၤ ကျိာ်စ့န့ၣ်တသ့ဝဲဘၣ်ဆၣ်, ယနီၤဟ့ၣ်အီၤတၢ်သးခုကစီၣ် ဘၣ်ထွဲဒီးယွၤအတၢ်အဲၣ် သ့ဝဲဒၣ် န့ၣ်လီၤ. ဖဲအဝဲစံးဘၣ်ယၤလၢ အမ့ၢ် ပှၤဖိၣ်ဃဲဖိတဂၤန့ၣ်ဒီး, ယတဲဘၣ်အီၤလၢ ယွၤ အသးအိၣ်ကဲထီၣ်အပၢ်န့ၣ်လီၤ. ဖဲန့ၣ်အမဲာ်ထံလီၤဝဲဒၣ်န့ၣ်လီၤ. ယဒုးသ့ၣ်ညါအီၤဒီး တၢ်အိၣ်ဖှိၣ်လၢအတူၢ်လိာ်ပှၤ အတၢ်အိၣ်ဖှိၣ်ဖိတဂၤ, ဒ်သိးကမၤစၢၤထွဲအီၤဆူညါ အဂီၢ်န့ၣ်လီၤ.
ဘၣ်တဘျီဘျီန့ၣ်, ပသးကလၢၢ်ဘၣ်ဝဲလၢ ပတၢ်စံးတၢ်ကတိၤတဖၣ်န့ၣ် တလၢတပှဲၤဘၣ်ဆၣ်, ဖဲပနီၤဟ့ၣ်ကစၢ်ယ့ၣ်ရှူးအဂ့ၢ်ဆူ ပှၤဂုၤပှၤဂၤအကတီၢ်န့ၣ်, သးမုၢ်စီဆှံ ကဟ့ၣ်သဆၣ်ထီၣ်ပသးအဂံၢ်အဘါသ့ဝဲဒၣ်န့ၣ်လီၤ.
ဖဲစီၤပ့းတရူး ဒီးစီၤယိၤဟၣ် ထံၣ်လိာ်သးဒီးပှၤတဂၤ ဖဲတၢ်လုၢ်ဟံၣ် အပဲတရီအကတီၢ်, အဝဲသ့ၣ် သ့ၣ်ညါဝဲလၢ တၢ်နီၤဟ့ၣ်ကစၢ်ခရံာ်အဂ့ၢ်န့ၣ် မ့ၢ်တၢ်ဟ့ၣ်အဒိၣ်ကတၢၢ်တမံၤန့ၣ်လီၤ. လံာ်မၤတၢ် ၃:၆ ပာ်ဖျါဝဲ “ ဒီးစီၤပ့းတရူး စံးဘၣ်အီၤ, ကျိာ်ဧိၤစ့ဧိၤ, ဒီးထူဧိၤလွဲဧိၤ တအိၣ်ဘၣ်ဒီးယၤဘၣ်. မ့မ့ၢ် တၢ်လၢအအိၣ်ဒီးယၤန့ၣ်, ယဟ့ၣ်နၤလီၤ. လၢပှၤနစၤရ့းဖိ ယ့ၣ်ရှူးခရံာ်အမံၤန့ၣ်, ဂဲၤဆၢထၢၣ်ဒီးဟးတက့ၢ်” န့ၣ်လီၤ. တၢ်လၢမုၢ်တနံၤအံၤန့ၣ်, ပှၤတဂၤအံၤ ဒိးန့ၢ်ဝဲ တၢ်အုၣ်က့ၤခီၣ်က့ၤ, ဒီးတၢ်မၤဘျါက့ၤအီၤန့ၣ်လီၤ. ဒ်သိးပကစိာ်ဆှၢက့ၤ ပှၤလၢအလီၤမၢ်တဖၣ်ဆူအအိၣ်အဂီၢ်န့ၣ် ကစၢ်ယွၤ စူးကါ ပဝဲနၤဒီးယၤတဖၣ်န့ၣ်လီၤ.
ပကဘၣ်ဟ့ၣ်တၢ်လၢ ခရံာ်အိၣ်ဖျဲၣ်တဘျီအံၤအဂီၢ်, ဒ်ပဃုဒိးန့ၢ် တၢ်ဟ့ၣ်အဂ့ၤကတၢၢ်တဖၣ်န့ၣ်ဒီး, မ်ပကသ့ၣ်နီၣ်ထီၣ် တၢ်ဟ့ၣ်အဂ့ၤကတၢၢ်နီၢ်နီၢ်န့ၣ် မ့ၢ်ဝဲ တၢ်သ့ၣ်ညါကစၢ်ယ့ၣ်ရှူး, ဒီးတၢ်အုၣ်က့ၤခီၣ်က့ၤ အထူအယိာ် လၢအဟ့ၣ်လီၤပှၤန့ၣ်လီၤ. လၢတၢ်နဲၣ် ဆှၢပှၤကညီတဖၣ်ဆူ တၢ်အုၣ်က့ၤခီၣ်က့ၤကစၢ်အအိၣ်န့ၣ်, ဒ်သိးကစၢ်ယွၤကစူးကါပှၤအဂီၢ်, မ်ပကဃုထံၣ်န့ၢ်ဆူညါန့ၣ်တက့ၢ်.
